Wat zum 1

VIYA̰ GE DOK NE KE NE ZUR ISRAYELA VYA MA PE

(Wat 1—15)

Yál njotɗa ge Israyela vya ma ne Suwal Masar go

1No a Israyela, ndwara go Yakub, vya ma ge a ne mbo poseya ne bama bá suwal Masar ya ma dḭl ne, ndu ge daage mbo ya da ne na yàl wak: 2Ruben, Simeyon, Levi, Yuda, 3Isakar, Zabulon, Bayami, Dan, Neftali, 4Gad ne Aser. 5Yakub duur ma mwaɗak, naa wara ɓyalar. Yusuf ne suwal Masar ya me.

6Yusuf su, poseya ne na bá vya ma ne doŋ pe mbe ma mwaɗak. 7Israyela vya ma tol ta se, a zuli se lala̰y, a saŋge pool gḛ, a wi suwal.

8Swaga mbe go no, gan a̰me ge ɗogle, zam gan suwal Masar pal, na ge ne kwa Yusuf to. 9Na sḛ jan na naa ma go: «Ndi pehir ge Israyela vya ma ne zuli ya se gḛ, a hatɗa pool gḛ waɗe nee. 10Ɓó me nee zwama a̰me ge tele nama be ge a zuli ta se. Ne da pe swaga ge pore ne ɗage ya digi, na kaage nama ɓa̰ pe ne nee naa ge ho̰l ma nee pal ɗo, nama ba ɓol viya̰ ge ɗage ne suwal diŋ mborra to.» 11Masar ma é naa ge ndil temel ma Israyela vya ma pal, ndwara é nama ke temel ge dṵṵl ma. A go no, a sḭ suwal Pitom ma ne Ramses no hon Faraon ne kan kaŋzam ma pe. 12Amma swaga ge a ne ka ke nama yál gḛ, a ka gwan zuli ta se waɗeya, a ka ŋguy suwal. Masar ma kwane Israyela vya ma herleŋ. 13Go no, Masar ma é Israyela vya ma ke temel ge yál ma dimma ne mo̰r ma go. 14A e nama ke temel ge yál ma: njiyal kurbiya ma, ne jalab iyalla ma, ne gaaso temel kerra ma ge yál ma, ne temel yál ge daage ma kerra pet. No a temel ma ge a ne ka é nama kerra dimma ne mo̰r ma go ne.

15Naa zaab ge tol Ibriniya ma gwale ma ka naa azi, ge ɗu dḭl Chifra ge may dḭl Puwa me. Gan ge suwal Masar ne jan nama: 16«Swaga ge aŋ ne tol Ibriniya ma zaab, ndi me vya mbe ma kwaɗa, kadɗa na vya son ne, hṵ me na uzi, kadɗa na vya gwale ne ɗe, ya̰ me na ne ndwara.» 17Amma, naa zaab ge tol naa mbe ma a naa ge sya Dok vo ma ne, a be ke dimma ne gan ge suwal Masar ne ne jya̰ bama go to, a ka ya̰ vya ge sonmo ma ne ndwara. 18Gan ge suwal Masar ne tol naa zaab ge tol naa mbe ma ya, jan nama go: «Aŋ te ke go gyana ɗaa? Kyaɗa aŋ ba ka ya̰ vya ge sonmo ma ne ndwara ɗaa?» 19Naa zaab ge tol naa ma njuɗi bama wak jan Faraon go: «Ibriniya ma naa zaab a be dimma ne Masar ma naa zaab go to. Ago a pool, a tol bama vya ma zḛ be ge naa zaab ge tol naa ma gale ne be ge detɗa ya.»

20Dok ke naa zaab ge tol naa mbe ma kwaɗa. Israyela vya ma zuli ta se, a saŋge pool gḛ waɗeya. 21Ne jo̰ naa zaab ge tol naa mbe ma sya Dok vo ɗe, Dok hon nama hir. 22Faraon hon na ɓase ma na wak go: «Vya son ge ne tolla Ibriniya ma hir zi, dó me na maŋgaɗam Nil se ya, kadɗa a vya gwale ne ɗe, ya̰ me na ne ndwara.»

Currently Selected:

Wat zum 1: FGN2013

Highlight

Copy