Pe eya 28
28
1Isaku tol Yakub ya, e na wak busu na pal, hon na na wak go: «Kaage mo san Kanan ma vya gwale to. 2Ɗage, mbo suwal Paddan-Aram, ge Betuwel, mo báŋ ge mo ná ne ta ya. Sá̰ gwale ne ya go, ne Laban ge mo ná ná vya, vya ma buwal zi ya. 3Dok ge pool pet na e mo wak busu, na ho̰ mo hir gḛ, na zuli mo pe se lala̰y, ne da pe mo pehir ma zuli se ceɗed! 4Na ho̰ aŋ ne mo pehir ma wak busu ge na ne ho̰ Abraham, ne da pe, mo ame suwal ge mo ne ka ne na go dimma ne ndu ge mbay go mbe no, suwal ge Dok ne ho̰ Abraham na.» 5Isaku é Yakub viya̰ go mbo suwal Paddan-Aram, ge Laban ge Betuwel vya, Rebeka ná vya, ndu ge Arameya ta ya. Ago Rebeka Yakub ma ne Esawu ná ne.
6Esawu za̰ go, na bá Isaku é Yakub wak busu, na teme na ya mbo suwal Paddan-Aram mbo san gwale. Za̰ uwale go, swaga é na wak busu go, na ho̰ na wak go, na sá̰ Kanan ma vya gwale to bat. 7Kwar go, Yakub zá̰ na bá ma ne na ná wak, na mbo ya suwal Paddan-Aram. 8Esawu kwa uwale go, na bá ɓyare vya gwale ge Kanan ma ne ma to. 9Ɗage mbo ɓol Ismayel ge Abraham vya. San na vya gwale ge a ne tol na Mahalat, na ge Nabayot ná vya ya.
Kiya̰r ge Yakub ne
10Yakub ɗage ne suwal Bercheba go mbo suwal Haran. 11Na sḛ det ya swaga a̰me go, dwam na go. Ago gyala di na swaga mbe go. Her njal a̰me ɗu ne swaga mbe go, ɓyar na pala, dwam go. 12Kiya̰r jan na go: «Kaŋ é koo é ne suwar se, na pala njeel mbo ɗiŋ mbo tat ne dok pul kuɗi digi ya, maleka ge Dok ne ma ka ndé digi ya, a ka gwan’a se. 13Ndi Bage ɗiŋnedin mḛ́ na pala digi, jan go: ‹Mbi Bage ɗiŋnedin Dok ge mo bá Abraham ne, ne Dok ge Isaku ne. Suwar ge mo ne fí ne na go mbe no, mbi mbo hon aŋ ne mo pehir ma na. 14Mo pehir ma mbo zuli se ɓase dimma ne kuci ge ne suwar se go. Mo suwal mbo don mbo le sya, ne le ham, ne le kuu, ne le mbii. Ne aŋ ne mo pehir ma ta, naa ge ne suwar pal ma pet, a mbo ɓol wak busu. 15Mbi poseya ne mo, swaga ge daage pet ge mo ne mbo kadɗa ka mborra go, mbi mbo ka dol mbi ndwara mo pal, mbi mbo gwan ne mo ya suwal mbe no go. Ago mbi mbo ya̰ mo to bat, ɗiŋ mbi wi wak tuli ge mbi ne ke mo na.›»
16Yakub kore digi ne na swaga dam se, jan go: «A fareba, Bage ɗiŋnedin ya swaga mbe no go, amma mbi, mbi be wan na pe to!» 17Vo wan na, jan go: «Swaga mbe no, a swaga hon naa vo ne! A Dok yàl ne, a viya̰ wak ge digi digi ya ma ne ne!» 18Yakub ɗage digi cya̰wak vḛ, her njal ge na ne ɓya na pala ne na, dusi na digi, kan num na pal. 19Na sḛ hon swaga mbe dḭl Betel, ndwara go, Dok yàl, ago suwal mbe dḭl ka zaŋgal Luz. 20Yakub ke wak tuli, jan go: «Kadɗa Dok da ne mbi, kadɗa na koy mbi ya viya̰ go, hon mbi kaŋzam ne kaŋ parra, 21kadɗa mbi gwan ja be fare a̰me ɓol mbi mbi bá yadiŋ, go no, Bage ɗiŋnedin mbo gá Dok ge mbi ne. 22Njal ge mbi ne dusi na digi mbe no, mbo saŋge Dok yàl. Kaŋ ge daage pet ge mo ne mbo hon mbi nama ya, mbi mbo hon mo ɗu ne wol zi.»
Currently Selected:
Pe eya 28: FGN2013
Highlight
Share
Copy
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.
