Pe eya 3
3
Detɗa ge ndu dasana ne
1Ne kavaar ge Bage ɗiŋnedin ne ke nama ma buwal zi mwaɗak, bom waɗe nama ne son ne. Bom jan ndu gwale go: «A fareba, Dok jan go, aŋ za uwara ge ne gaaso zi ma to ɗaa?» 2Gwale jan bom go: «I zam uwara ge ne gaaso zi ma zam, 3Amma kadɗa ne uwara ge ne gaaso tuŋsi zi mbe no ɗe, Dok jya̰ go: ‹Aŋ gale za me na ɓaca, aŋ gale tá me na ɓaca›, ne da pe na kaage aŋ sú to.» 4Bom jan gwale go: «A go to, aŋ sú to bat. 5Amma Dok kwa kwa go, dam ge aŋ ne mbo zam na ya, aŋ ndwara fa̰ ma mbo tyan, aŋ mbo gá dimma ne na ge Dok go, ge kwar kwaɗa ma ne sone.»
6Gwale ndil go, uwara mbe na kwaɗa ne zamma pe, na kaŋ berme ndwara ne, na siŋli ne hon zwama pe. Na sḛ yel uwara, zam na, hon na obe ge ne ka poseya ne na, na sḛ zam me. 7Nama sḛ ma jwak, nama ndwara fa̰ ma tyan, a kwar go, bama ne go swala. A tit fere gaar ma ke ta batagay. 8Swaga ge saam ge gasamal ne ɗage la̰yya, a za̰ ko̰r ge Dok Bage ɗiŋnedin ne anna gaaso zi, ndu son ma ne na gwale, a woy ta uwara zi, Bage ɗiŋnedin Dok ndwara zḛ. 9Dok Bage ɗiŋnedin tol ndu son, jan na go: «Mo ya da ya ɗaa?» 10Na sḛ gwan ne na janna go: «Mbi za̰ mo ka̰l ge gaaso zi, mbi sya vo no, ne da pe mbi ne go swala, mbi woy tene no.» 11Dok Bage ɗiŋnedin jan go: «A wuɗi jya̰ mo ne go mo swala ɗaa? Mo zá uwara ge mbi ne tele mo go, mo za na to mbe ɗaa?» 12Ndu son gwan ne na janna go: «A gwale ge mo ne ho̰ mbi na mbe, ho̰ mbi uwara mbe ne, mbi za na no.»
13Dok Bage ɗiŋnedin jan gwale go: «Mo te ke go gyana ɗaa?» Gwale gwan ne na janna go: «A bom lase mbi ne, mbi za no#2Kor 11:3, 1Tim 2:14..»
14Dok Bage ɗiŋnedin jan bom go:
«Ne jo̰ mo ke no mbe ne ɗe,
ne kavaar ma buwal zi pet,
wak vḛneya mbo kat mo pal.
Mo mbo ka sar ne mo pul,
mo mbo gá mbur suwar lugɗum, ɗiŋnedin.
15Mbi mbo e ho̰l aŋ ne gwale buwal zi,
mo pehir ma ne na pehir ma buwal zi,
na sḛ mbo rot mo pala,
mo mbo syal na koo pitigil me.»
16Jan gwale go:
«Mo mbo in emel ne wak nonna gḛ,
mo mbo kat tolla ne yál njotɗa.
Kaŋ ge mo ne ɓyare ma,
mo mbo ɓol nama da ne mo obe ta.
Amma na sḛ mbo kat mo pala digi.»
17Jan ndu son go:
«Ne jo̰ mo za̰ mo gwale wak,
mo za uwara ge mbi ne tele mo go,
mo za na to no,
ne mo pe, wak vḛneya mbo kat suwar pal,
mo mbo ke da ne ṵwa̰se, mo ba ɗage ɓol kaŋzam
dam ma ge mo ne zi mwaɗak.
18Suwar mbo gá don kaŋ ge tun naa ma ne kabubu ma,
mo mbo gá zam kaŋ ge ne don ne ful zi ma.
19Mo mbo ɓol kaŋzam da ne ṵwa̰se,
ɗiŋ mo ba mbo gwan suwar se,
na ge a ne ke mo ne na.
Ago mo suwar lugɗum,
mo mbo gwan suwar lugɗum zi.»
20Adam hon na gwale dḭl Hawa, ndwara go, na sḛ naa dasana ma ná ne pet. 21Bage ɗiŋnedin Dok hon Adam ma ne na gwale gwabal, a kan na bama ta.
22Bage ɗiŋnedin Dok jan go: «Ndi ne se no, ndu dasana hatɗa kwa kwaɗa ma ne sone dimma ne nee go. Be ke kwaɗa ge na gwan yel uwara ge ndwara mbe no, na zam na ɗo, na ba ga kat ne ndwara ɗiŋnedin to.» 23Bage ɗiŋnedin Dok yan nama ne gaaso Eden zi ya zum, ne da pe nama gá gar suwar, na ge a ne ke nama ne na. 24Swaga ge ne ya̰ ndu dasana ya zum, é kavaar ge digi zi ya ma ge gaaso Eden wak le ge ham ge go, ne kasagar ge wak ol ɗaabeya, a ka pete na, ndwara koy viya̰ ge uwara ge ndwara ne.
Currently Selected:
Pe eya 3: FGN2013
Highlight
Share
Copy
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.
