Pe eya 30
30
1Swaga ge Rachel ne kwa go, na be tol Yakub vya ɗu to ɗe, ɗage ke na ná vya Lea yil. Jan Yakub go: «Ho̰ mbi vya ma, kadɗa to, mbi su su!» 2Yakub laar vḛne Rachel ta, jan na go: «Mbi Dok ne ɗo, mbi tele mo be tol vya no ɗaa?» 3Rachel jan na go: «Mbi kale Bila no, mbo na ta, na tó vya ma hon mbi, go no me, ne na ta, mbi ba kat ne vya ma me.» 4Na sḛ hon na, na kale Bila, Yakub mbo na ta. 5Bila eme, tol Yakub vya son, 6Rachel jan go: «Dok saŋge mbi ya ndu ge dosol, na sḛ za̰ mbi, ho̰ mbi vya no. Hon na dḭl Dan#30:6 Dan: Dan sḭ go, dosol..» 7Bila, kale ge Rachel ne gwan eme, tol Yakub vya son ge azi. 8Rachel jan go: «Mbi ke kyarga ne mbi ná vya, mbi dó na no. Hon na dḭl Neftali#30:8 Neftali: Neftali sḭ go, kyarga..»
9Swaga ge Lea ne Kwa go, na mḛ́ ya be tol vya ɗe, wan na kale Zilpa, hon Yakub na. 10Zilpa ge Lea kale tol Yakub vya son. 11Lea jan go: A ma sḛ son ne go! Hon na dḭl Gad#30:11 Gad: Gad sḭ go, sḛ son.. 12Zilpa gwan tol Yakub vya son ge azi. 13Lea jan go: «A ma laar saal ne go! Ago vya kale ma mbo gá tol mbi gwale ge Laar saal. Hon na dḭl Aser#30:13 Aser: Aser sḭ go, Laar saal..»
14Swaga siyal ge gḛme ne go, Ruben mbo ful zi, ɓol fijil ge abe naa sḛ#30:14 Kaŋ mbe a dimma ne fijil go. Yahud ma sul na da ne abe naa sḛ pe., gene na ya hon na ná Lea. Rachel jan Lea go: «Ho̰ mbi fijil ge abe naa sḛ ge mo vya ne nde!» 15Lea gwan ne Rachel janna go: «Mo ne maŋge mbi obe ɗe, be mbyat mo go ga to’a, mo ɓyare gwan ɓyare maŋge fijil ge abe naa sḛ ge mbi vya ne iya ɗaa?» Rachel jan na go: «A kwaɗa, ma̰ no Yakub má̰ mbo dwam mo pe zi ge mo vya fijil ge abe naa sḛ byalam go.» 16Gasamal, swaga ge Yakub ne ɗage jyat ne gaaso ya ɗe, Lea mbo kun na, jan na go: «Ma̰ no mo dwam ma̰ mbi pe zi, ago, mbi pó mo pot ne fijil ge abe naa sḛ ge mbi vya ne.» Dam mbe go, Yakub mbo dwam na pe zi. 17Dok za̰ kaɗeya ge Lea ne, na sḛ her emel tol vya son ge anuwa̰y. 18Lea jan go: «Dok pó mbi, mbi tok-koyom, ne mbi ne ho̰ mbi obe mbi kale pe. Na sḛ hon na dḭl Isakar#30:18 Isakar: Isakar sḭ go, potɗa..»
19Lea gwan he emel, tol Yakub vya son ge pul myanaŋgal. 20Lea jan go: «Dok ho̰ mbi bobo ge kwaɗa, ge no ɗe, mbi obe mbo uware mbi, ne mbi ne tó na vya son myanaŋgal pe. Hon na dḭl Zabulon#30:20 Zabulon: Zabulon sḭ go, bobo ge kwaɗa..» 21Go̰r go, tol vya gwale ɗu, hon na dḭl Dina.
22Dok dwat ne Rachel, za̰ na kaɗeya, hage na swaga-vya wak se. 23Her emel, tol vya son, jan go: Dok ndage saaso ya ne mbi pal uzi. 24Hon na dḭl Yusuf#30:24 Yusuf: Yusuf sḭ go, honna ya pal tá., janna go: Bage ɗiŋnedin na gwan hon mbi vya ge ɗogle ya taa ɗu!
Kaŋ ɓolla ge Yakub ne ma
25Swaga ge Rachel ne tó Yusuf go ɗe, Yakub jan Laban go: «Ya̰ mbi, mbi gwa̰ di, suwal ge mbi ne ya. 26Ya̰ i, ne mbi gwale ma, ne mbi vya ma mborra, ne da pe, mbi ke mo temel da ne nama pe. Ago, mo kwa temel ge mbi ne ke mo na kwa yaɗat.» 27Laban jan na go: «Mbi kaɗe mo, gá katɗa mbi ta! Mbi dok ma jya̰ mbi go, Bage ɗiŋnedin é na wak busu mbi pal da ne mo pe.» 28Há mbi kaŋ ge mo ne ɓyare go mbi pó mo na, mbi ba hon mo. 29Yakub jan na go: «Mo kwa temel ge mbi ne ke mo na kwar, ne zuliya ge mo kavaar ma ne zuli se. 30Mbi ndwara zḛ, mo kavaar ma ka ŋgeɗo, se no, a zuli ya se la̰y. Ne swaga ge mbi ne mbo ya mo diŋ go day, Bage ɗiŋnedin e na wak busu mo pal. A ma swaga go ge mbi dḛ ba mbo ke temel ne mbi yàl sḛ pe ɗaa?» 31Laban gwan ele na go: «Mbi ho̰ mo da ɗaa?» Yakub gwan ne na janna go: «Pó mbi a̰me to. Kadɗa mo vin mbi ya, ya̰ mbi gwan koy mo gii ma, dimma ne ge dḛ zaŋgal go. 32Ma̰ no, mbi má̰ an ndil mo gii ma mwaɗak. Mbi má̰ caɗe gii vya ge petɗa ndabcar ma, ne gii vya ge pisil ma, ko tame vya ma, ko ɓiya̰ vya ma, ge ne saaso ne bama ta ma mwaɗak uzi, mbo kat kaŋ potɗa ge mbi ne. 33Swaga ge mo dḛ ne mbo mbo ja ndil mbi kaŋ ge mo ne pó mbi ma, dosol ge mbi ne mbo ŋgay mo fareba ge mbi ne. Swaga ge mo ne mbo ɓol kavaar ge ndabcar ma, ko ge pisil ma ya mbi gii ma buwal zi, no mbi ndu ge syala ne.» 34Laban jan na go: «A kwaɗa! Mbi vin mo fare go.» 35Dam mbe go juju, Laban caɗe bemjere ge sḛ petɗa ndabcar ma uzi, caɗe ɓiya̰ ge sḛ petɗa ma ne ge sḛ ba̰a̰l saal ma, ne tame ge pisil ma uzi, hon nama koyya ge na vya ma tok go. 36Go̰r go, é nama mborra uzi ya kaal, kaŋ ge viya̰ kereya dam ataa go ne Yakub. Yakub ga koy gii ge Laban ne ge ne gá ma me.
37Yakub abe uwara pepliye ma, ne amande ma ne platan ma tok ge twagal ma, hage nama ɓolgo ma le a̰me ma uzi kekeler, ndwara ya̰ na kal saal zenna ya zum. 38Go̰r go, par uwara tok ge twagal ge na ne hage nama ɓolgo uzi mbe ma ge gii ma swaga njot mam go, nama ndwara go kwaya̰l. Ago swaga ge gii ma ne mbo ya njot mam, a ndwar ta ndwar. 39Gii ma ka ndwar ta uwara tok mbe ma ta, a tol vya ge petɗa ndabcar ma.
40Yakub varse tame ma se, e nama ndil gii ge ndabcar ma ne ge pisil ge Laban ne ma.
Go mbe no, Yakub ɓol vog ge gii ma ne ne na pala, ya̰ nama ɓanna digi dagre ne gii ge Laban ne ma to. 41Swaga ge gii ge sḛ so̰o̰l ma ne ɓyare ndwar ta ɗe, Yakub par uwara tok mbe ma ge gii ma swaga njot mam go, nama ndwara go kwaya̰l, ne da pe, nama ba ndwar ta uwara tok mbe ma ta. 42Amma swaga ge gii ge sḛ do̰yya ma ne ɗage ndwar ta ɗe, par uwara tok mbe ma nama ndwara go to. Go mbe no, gii ge sḛ do̰yya ma ka kat ge Laban ne, ge sḛ so̰o̰l ma ka kat ge Yakub ne me.
43Go mbe no, Yakub saŋge gan njwanjway, ɓol gii ma gḛ ge be to, ne dore ma, ne kale ma, ne jambal ma, ne kwara ma me.
Currently Selected:
Pe eya 30: FGN2013
Highlight
Share
Copy
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.
