Pe eya 40
40
1Go̰r kaŋ mbe ma no go ɗe, bage tyare gan ge suwal Masar ma ne jiya̰l wak ma ne bage swar na katugum a ke bama bageyal sone. 2Faraon laar vḛne na ga̰l mbe ma ta jwak, 3kan nama daŋgay zi, ga̰l ge koy daŋgay ma ne tok go, swaga ge a ne dibi Yusuf zi go. 4Ga̰l ge daŋgay ma ne hon nama koyya Yusuf tok go. A ke dam ma kaal swak daŋgay zi.
Yusuf wan kiya̰r janna ma pe
5Ɗaal ge ɗu zi, bage tyare gan jiya̰l wak ma ne bage swar gan katugum jwak, kiya̰r jan nama daŋgay zi. Kiya̰r ge daage ka da ne na pe wanna. 6Swaga ge Yusuf ne mbo ya nama ta cya̰wak, kwa nama ndwara suya leɗet. 7Ele gak ge Faraon ne ma, nama ge a ne ka̰ nama ne daŋgay zi ma go: «Kyaɗa ma̰ no aŋ ndwara ba su go leɗet ɗaa?» 8A jan na go: «Kiya̰r jya̰ i ne, ndu a̰me ge ba wan i nama pe ne go to.» Yusuf jan nama go: «Te be Dok mbya hare kiya̰r ma pe ne to’a? Wa̰ me mbi nama pe gale.»
9Ga̰l ge naa ge tyare gan jiya̰l wak ne wan Yusuf kiya̰r ge na ne pe, jan na go: «Kiya̰r ge mbi ne zi, mbi kwa oyo̰r mḛya mbi ndwara zi. 10Oyo̰r mbe ka da ne tok ga̰a̰r ataa. Swaga ge ne ɗufi, fol na wak, tol oyo̰r, a zon. 11Kop ge Faraon ne, ka mbi tok go, mbi hel oyo̰r mbe ma, mbi ɓerse na kop ge Faraon ne go, mbi hon Faraon na.» 12Yusuf jan na go: «Ndi, mo kiya̰r mbe pe wanna no: ‹Oyo̰r tok ge ataa mbe ma, na sḭ́ dam ge ataa. 13Gá ne zḛ dam ataa, Faraon mbo he mo pala digi, mbo gwan ne mo ya mo temel kerra zi, mo mbo gwan hon Faraon kop na tok go, dimma ne mo ne ka kerra dḛ zaŋgal go, swaga ge mo ne ka tyare na jiya̰l wak go›. 14Swaga ge mo ne mbo ɓol mo pala ya ɗe, dwa ne mbi, kwa mbi a̰se, mbi kaɗe mo, jya̰ Faraon fare ne mbi pe, mo ba ndage mbi ne zok no zi ya zum. 15Ago, a wa̰ mbi ne Ibriniya ma suwal ya da ne pool, mbi ne zi go no puy ɗe, mbi be ke a̰me ge a dol mbi daŋgay zi to.»
16Swaga ge ndu ge swar katugum ne kwa go, Yusuf wa̰ na fare pe zum kwaɗa, jan na go: «Kiya̰r ge mbi ne zi, mbi ka in gum ma ataa wiya ne katugum mbi pala digi. 17Gum ge ne pala digi dab ka da ne katugum ge Faraon laar ne wa̰ nama ma pe hini hini. Njoole ma ka mbo ya cot nama ne mbi pala digi.» 18Yusuf gwan ne na janna go: «Na pe wanna no: ‹Gum ge ataa ma no, a dam ma ataa ne. 19Gá ne zḛ dam ma ataa Faraon mbo pel mo uwara pala digi, njoole ma mbo zam mo duur uzi›.»
20Dam ataa go̰r go, Faraon ke vḛso ge na dam tolla ne. Ker kaŋzam hon na naa ga̰l ge temel ma mwaɗak, ndage ga̰l ge naa ge tyare gan jiya̰l wak ma ne ya zum, ndage ga̰l ge naa ge swar katugum ma ne ya zum me, na naa ga̰l ge temel ma ndwara go. 21Gwan par ga̰l ge tyare jiya̰l wak ne na temel zi. Na sḛ gá hon Faraon kop na tok go. 22Amma pel ga̰l ge naa ge swar katugum ma ne uwara pala digi, dimma ne fare ge Yusuf ne wa̰ nama pe go. 23Ga̰l ge tyare jiya̰l wak ge gan ne gwan dwat ne Yusuf to, vyale na.
Currently Selected:
Pe eya 40: FGN2013
Highlight
Share
Copy
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.
