Luka 11

Hateya ge Jeso ne kaɗeya pal

(Mat 6:9-13, 7:7-11)

1Dam a̰me ɗu, Jeso ka ke kaɗeya swaga a̰me go. Swaga ge ne á, na ndu ge ame hateya a̰me jan na go: «Bageyal, hate i ke kaɗeya dimma ne Yohanna ne hate na naa ge ame hateya ma go.» 2Jan nama go: «Swaga ge aŋ ne kaɗe, jya̰ me go: Bá, ya̰ mo dḭl na ka mbegeya, mo muluk na mbo ya. 3Ho̰ i kaŋzam mbyatɗa dam ne dam. 4Pore i sone ma, ago i sḛ ma pore naa ge ne ke i ya̰l ma pore me. Kaage mo ya̰ i det pe herra zi to.»

5Jan nama go uwale: «Kadɗa ndu a̰me ne aŋ buwal zi na kondore mbo ja ɓol na ɗaal ga̰l zi, jan na go: ‹Kondore, gobe mbi katugum ataa, 6ago, mbi kondore mbo ya gwasal mbi ta, mbi ne kaŋ a̰me ge hon na to.› 7Kadɗa ndu mbe gwan ne na janna ya go: ‹Da̰a̰me mbi to, zok wak fe fet, i ne mbi vya ma fi ya se. Mbi ne pool ge ɗage digi hon mo kaŋ a̰me to.› 8Mbi jan aŋ, ko kadɗa na ɗage ya digi hon na ne na ne ka na kondore pe to puy ɗe, ago ma̰ ɗage digi hon na kaŋ ge na sḛ ne ɓyare ma mwaɗak ne na ne da̰a̰me na pe. 9Mbi, mbi jan aŋ go: Kaɗe me, a mbo hon aŋ, ɓyare me, aŋ mbo ɓol, dabe me, a mbo hage aŋ. 10Ndu ge daage pet ge ne kaɗe, a hon na hon, ndu ge ne ɓyare, ɓol ɓol, ndu ge ne dabe, a hage na hage. 11A bá ge daage ne aŋ buwal zi ge na vya ne kaɗe na sii ɗo, ba hon na bom sii byalam go ɗaa? 12Ko kaɗe na kaŋ fa̰r ɗo, ba hon na hurtu ɗaa? 13Aŋ ge sone ma zo me, aŋ kwa kaŋ ge kwaɗa ma hon aŋ vya ma kwa, ba kat da ne Bá’a ge ne digi zi ya ba hon naa ge ne kaɗe na ma O̰yom ge mbegeya to ɗaa?»

Jeso zon gisil

(Mat 12:22-30, Mar 3:22-27)

14Yan o̰yom ge seŋgre ge ne far wak to. Swaga ge o̰yom ge seŋgre mbe ne wá zum, ndu mbe ɗage far wak, naa ka ke ajab. 15Amma naa a̰me ma ne nama buwal zi jan go: «A Beelzebul, ga̰l ge o̰yom ge seŋgre ma ne hon na pool ge yan o̰yom ge seŋgre ma ne.» 16A̰me ma, ndwara kugi na, a ka ɓyare go na ke kaŋ ŋgayya a̰me ge ne mbo ne digi zi ya. 17Amma, ne jo̰ na sḛ kwa dwatɗa ge nama ne kwa ɗe, jan nama go: «Kadɗa Muluk varseya, burmi uzi, na yàl ma ka gul se ɗu ne ɗu. 18Kadɗa Saytan varse varse tene pal, na muluk pe ma̰ mḛ digi gyana ɗaa? Ne jo̰ aŋ jan go na da ne pool ge Beelzebul ne ta mbi yan o̰yom ge seŋgre ma no. 19Amma kadɗa mbi yan o̰yom ge seŋgre ma da ne pool ge Beelzebul ne ɗe, aŋ vya ma yan nama da ne ma pool ɗaa? Ne pe no ɗe, a mbo gá aŋ naa ge kun sarya ma. 20Amma kadɗa mbi yan o̰yom ge seŋgre ma da ne pool ge Dok ne ɗe, ago muluk ge Dok ne det ja aŋ ta.

21Swaga ge ndu ge pool, ge ne kaŋ pore ma koy na yàl ne, na kaŋ ɓolla ma kat koyya jyan. 22Amma kadɗa bage ne waɗe na ne pool mbo ja det na, hal na pal, maŋge na kaŋ pore ma ge na sḛ ne e na saareya ne nama pal ma ne na tok go, pál na kaŋ ma, var naa nama uzi. 23Ndu ge dagre ne mbi to, a ho̰l ne mbi, ndu ge ne kote poseya ne mbi to, a bage kar uzi ne.

Gwanna ge o̰yom ge seŋgre ne ya

(Mat 12:43-45)

24Swaga ge o̰yom ge seŋgre ne ndage ne ndu zi, mbo ɓyare swaga ɗigli tene ge babur pul ge be mam go, amma ɓol to. Jan tene go: ‹Mbi gwan mbo mbi zok ge mbi ne ndage ne na zi ya zum ya.› 25Swaga ge ne gwan’a, set na gisiya ɗaŋɗaŋ, nṵsiya ndanda. 26Go no, gwan mbo abe o̰yom ge sone gḛ ma ya na pe go ɓyalar, a gwan’a na zi, a gá kat na zi. Ndu mbe katɗa ge hṵsi no mbo gwan saŋge sone gḛ waɗe ge dḛ zaŋgal.»

Laar saal ge fareba

27Swaga ge ne ka jan fare mbe go, gwale a̰me ndage na ka̰l ne ɓase ma buwal zi ya, jan go: «Laar ge ne ḭ mo emel ma ne pam ge ne wá mo ma da ne laar saal!» 28Amma Jeso gwan ne na janna go: «Laar saal nama ge a ne za̰ fare ge Dok ne, a ke temel na pal ma.»

Naa ɓyare kaŋ ŋgayya

(Mat 12:38-42)

29Ne jo̰ ɓase ma kote ya na ta, ɗage janna go: «Doŋ pe mbe no a doŋ pe ge sone ne, ɓyare kaŋ ŋgayya a̰me, amma a mbo ke nama kaŋ ŋgayya a̰me to, mbo kat kaŋ ŋgayya ge Jonas ne ɗeŋgo. 30Dimma ne Jonas ne ka kaŋ ŋgayya ne naa ge suwal Ninive ma pe go, Vya ge ndu ne mbo kat go no me ne doŋ pe mbe no pe. 31Dam sarya go, gan gwale ge mbii ge mbo ɗage mḛya poseya ne doŋ pe mbe no me, mbo kun fare na pal, ne da pe, na sḛ ɗage ne suwar pe ndegɗe ya mbo ya za̰ zwama ge Salomon ne. Ndi, ndu ge waɗe Salomon ya go go uwale#1Gan 10:1-10.. 32Dam sarya go, naa ge suwal Ninive ma mbo ɗage mḛya poseya ne doŋ pe mbe no, a mbo kun fare na pal, ne da pe, a gwa̰ ya Dok ta swaga ge Jonas ne ka waage nama fare go. Ndi, ndu ge waɗe Jonas ya go go#Jon 3:5..»

Ndwara kwaya̰l ge duur ne

(Mat 5:15, 6:22-23)

33Ndu e ɗuli ol go na woy na woy, ko na kubi na puwa̰l ga̰l zi to, amma e na ɗuli kal digi, ne da pe na ho̰ kwaya̰l naa ge ne wat ya zok zi ma ta pet. 34Ndwara fa̰ kwaya̰l ge duur ne, kadɗa mo ndwara fa̰ kwaɗa, mo sḛ duur mwaɗak ya kwaya̰l zi. Amma kadɗa mo ndwara fa̰ moy, mo sḛ duur ya tṵ zi me. 35Ndi kwaɗa, na kaage kwaya̰l ge ne mo zi na ka tṵ to. 36Kadɗa mo sḛ duur mwaɗak kwaya̰l, be ge na swaga a̰me kat tṵ zi to, mbo kat kwaya̰l zi mwaɗak dimma ne ɗuli ne zen kwaya̰l mo ta go.

Mḛreya ge Jeso ne mḛre Farisi ma

(Mat 23:1-36, Mar 12:38-40)

37Swaga ge ne ka jan fare go, Farisi a̰me tol na na mbo ya zam kaŋ na yadiŋ. Mbo na diŋ ya, a kat kaŋzam wak go zamma. 38Farisi mbe ke ajab ne na ne za kaŋ be ge usi na tok pe. 39Bageyal jan na go: «Se no, aŋ ge Farisi ma, aŋ usi kop ma ne seɗe ma go̰r ne zum, amma aŋ dulwak ma ne zi wi da ne kaŋ maŋgeya ma ne sone kerra ma. 40Dale ma, bage ne ke go̰r ne zum, te be ke pul ne zi ne me to’a? 41Ke me bobo kaŋ ge ne aŋ dulwak zi, go no kaŋ ma pet a mbo hat harcal ne aŋ pe.

42Woo ge aŋ ne, Farisi ma, aŋ hon kaŋ wak ɗu ne wol zi ge nana ma, ne ru#11:42 Nana ma ne ru ma a kaŋ ge hur tuli ge naa ne kan nama kaŋ ma pal sḭya ma ne. ma, ne kaŋ ge ne don ne gaaso zi ma ne mwaɗak, amma aŋ ya̰ dosol kerra ma ne laar wan Dok uzi. No a kaŋ ge ne mbya kerra ma ne, be ge ya̰ ge may ma uzi to.

43Woo ge aŋ ne, Farisi ma, aŋ laar wa̰ swaga katɗa ge zḛ ge Sinagog ma zi, ne wak sanna viya̰ ma go.

44Woo ge aŋ ne, aŋ dimma ne siim pala ge ne burmi se, ge naa ne gá mbo viya̰ na pal be wan pe go.»

45Bage ne kwa eya ma tyatyat a̰me jan na go: «Bage hateya, mo fare janna mbe no, mo sal i me!» 46Jan go: «Aŋ ge ne kwa eya ma tyatyat ma me, woo ge aŋ ne, aŋ e kaŋ ge dṵṵl neneg ge ndu ne day in na to naa pal, amma aŋ sḛ ma aŋ day ge e aŋ tok vya ma na ta to bat. 47Woo ge aŋ ne, aŋ sin táál ge anabi ma ge aŋ bá ma ne hṵ nama ne. 48Go mbe no, aŋ naa ge sayda ma ne, aŋ vin kaŋ kerra ge aŋ bá ma ne, ago nama sḛ ma hṵ anabi ma, aŋ sḛ ma sin nama sḭḭm pala ma no me. 49Da ne pe no, zwama ge Dok ne jan no go: ‹Mbi mbo teme nama anabi ma ne naa ge temeya ma ya, a mbo hun nama ne ke nama yál,› 50ne da pe, a ele swama ge anabi mbe ma ne pet ge ne ka̰ se ne pe dolla ge dunya ne ya day ne doŋ pe mbe no tok go. 51Ne swama ge Habila ne ya day diŋ mbo ya swama ge Zakariya ne go, na ge a ne hṵ na twal tuwaleya ma ne zok ge mbegeya buwal zi#Pe 4:8, 2Maa 24:20-22.. O̰, mbi jan aŋ, a mbo ele na doŋ pe mbe no tok go.

52Woo ge aŋ ne, naa ge ne kwa eya ma tyatyat ma, aŋ dibi viya̰ wak ge kwarra ne digi. Aŋ sḛ ma be wat zi to, aŋ ka tele nama ge ne ɓyare wat zi ma me.»

53Swaga ge ne wá ya zum, naa ge njaŋgeya ma ne Farisi ma a ɗage juliliya ne pore na pal, a ka e na gwan ne fare janna bama fare eleya ma pal gḛ. 54A ka hé na pe ne fare ma ndwara wan na ne fare a̰me ge ne ndage ne na wak zi.

Currently Selected:

Luka 11: FGN2013

Highlight

Copy