Luka 17

Sone kerra ma ne ɓyare poreya

(Mat 18:6-7,21-22, Mar 9:42, 11:22-26)

1Jeso jan na naa ge ame hateya ma go: «A ŋgat go kaŋ ge e naa wat sone zi ma ka. Amma woo ne ndu ge ne kat kaŋ syal koo ne naa pe! 2A golgo a vwal njal nan swara ge ga̰l na ka̰l zi, a dol na maŋgaɗam ga̰l yuwam pul se ya, ge te ya kat kaŋ syal koo ne vya jyale a̰me ɗu pe. 3Ke me haŋgal. Kadɗa mo ná vya ke sone ya, mḛre na, kadɗa na hase ya, pore na. 4Kadɗa na ke mo sone ya dam ge ɗu ge go ndwara ɓyalar, kadɗa na gwan ja mo ta ndwara ɓyalar janna go: ‹mbi ke sone›, pore na.»

Pool ge fareba honna ne

(Mat 17:19-20)

5Naa ge temeya ma jan Bageyal go: «Há fareba honna ge i ne ga̰l!» 6Bageyal jan go: «Kadɗa hon fareba ge aŋ ne na ka cecḛ dimma ne mutarde ndwara go puy, kadɗa aŋ jan fere mbe no ya go: ‹Mbugi tene, mo mbo dol tene maŋgaɗam ga̰l yuwam pul se ya›, na sḛ mbo gwan ne na pala aŋ pe se.»

Temel ge mo̰r ne mbya kerra

7«A wuɗi ne aŋ buwal zi, kadɗa na da ne mo̰r a̰me ge ne gar na kaŋ, ko ge ne koy na kavaar ma, swaga ge ne gwan ne gaaso ya, jan na go: ‹Mbo ya zam kaŋ avun cap?› 8Te jan na ma̰ zo go: ‹Ke mbi kaŋzam, e mo ba̰r ma, mo mbo ya e mbi kaŋzam, mbi ba zam ne njotɗa gale ɓya, ne go̰r go mo ba gá zam ne njot ge mo ne ma.› 9Ne mo̰r mbe ne ke laar ɓyareya ge na ne pe, da ne pool gwan ne gugu hon na ɗaa? 10Go no me, swaga ge aŋ ne ke kaŋ ge a ne hon aŋ wak kerra ma pet, jya̰ me go: ‹I mo̰r ma ne baŋ, i ke kaŋ ge i ne mbya kerra›.»

Jeso zon naa ge kun swama ma ɓyalar

11Swaga mbo Ursalima go, Jeso hé viya̰ suwal Samariya ma ne suwal Galile warbe go. 12Swaga ge ne ka wat suwal a̰me diŋ, naa ge kun swama ma wol a mbo ya na ndwara zi, a mḛ uzi ya kaal nde, 13a ndage bama ka̰l digi oyya go: «Bage hateya Jeso, kwa i a̰se!» 14Swaga ge ne kwa nama, jan nama go: «Mbo me ŋgay ta naa ge ke tuwaleya ma ta.» Swaga mborra go, a zon. 15Ge ɗu ne nama buwal zi, swaga ge ne kwa go na zon go ɗe, gwan’a na koo pal, ka uware Dok ne ka̰l ndaar. 16Mbo ya gur na koo Jeso ndwara se, ka gwan ne gugu hon na. Ndu mbe Samariya ne. 17Jeso ele swaga go: «Naa ge wol ma te be zon mwaɗak to’a? Ge lamaɗo ma ya le da ɗaa? 18Ne nama buwal zi mwaɗak, ndu ge gwan’a gwan ne gugu hon Dok to, a gwasal mbe no ɗeŋgo ɗaa?» 19Jeso gwan jan na go: «Ɗage digi, mbo. hon fareba ge mo ne má mo go.»

Mborra ge muluk ge Dok ne ya

(Mat 24:23-28,37-41)

20Farisi ma ele na go: «Muluk ge Dok ne mbo ya ma swaga go ɗaa?» Gwan ne nama janna go: «Muluk ge Dok ne mbo ya dimma ne kaŋ ge naa ndwara ne kwa na go to, 21ndu ne pool jan go: ‹Ndi me, ya go go, ko ya ya go› to bat. Kwa me go, muluk ge Dok ne ya aŋ buwal zi.»

22Jan na naa ge ame hateya ma go: «Dam ma mbo ya go, aŋ mbo ɓyare kwa Vya ge ndu ne dam a̰me go ɗu kikit, amma aŋ mbo kwa na to bat. 23A mbo jan aŋ go: ‹Ndi, ne ya go no›, ko ‹ndi, ne go go no!› Mbo me ya, ko sya me nama pe ya to bat. 24Dimma ne mam ne ser ne le ge no go ɗiŋ mbo le may ya go, ago dam ge Vya ge ndu ne mbo kat go no ca. 25Amma ɓyare go na njot yál gḛ ɓya, naa ge doŋ pe mbe no ma kuri na. 26Dimma ne kaŋ ge ne ke dam ge Nuhu ne go go, mbo kat go no me ne dam ge Vya ge ndu ne#Pe 7:24.. 27Naa ka zamma, a ka njotɗa, a ka sanna, a ka hon bama vya ma kat yàl, ɗiŋ dam ge Nuhu ne wa fak ga̰l zi go, mam yḛreya yan’a, bwat nama uzi kucup. 28Mbo kat dimma ne dam ma ge Lot ne go go. Naa ka zamma, a ka njotɗa, a ka yatɗa, a ka yat uzi, a ka ɗḭya, a ka sinna#Pe 19:24-25.. 29Amma dam ge Lot ne wa zum ne suwal Sodom diŋ go, ol ma ne swa-suwam swa ne digi ya, pur nama pe uzi kucup. 30Mbo kat go no me ne dam ge Vya ge ndu ne mbo dyan tene ya zum.

31Dam mbe go, ndu ge ne mbo kat ya zok jwaklak pala digi, na kaŋ ma gá zok zi, na ka̰ na koo ya se abe nama to. Ndu ge ne mbo kat ya gaaso zi ya, na gwa̰ ya ne go̰r to. 32Dwa me ne Lot gwale. 33Ndu ge ne ɓyare koy na sḛ, mbo ban na, amma ndu ge ban na sḛ ya, mbo koy na. 34Mbi jan aŋ, ɗaal mbe no zi, naa azi ge ne fi ne saŋgal ge ɗu go, a mbo he ɗu, a ya̰ ɗu. 35Naa zaab ma azi a mbo ka nan swara njal ge ɗu go, a mbo he ɗu, a ya̰ ɗu. [36Naa sonmo azi a mbo kat gaaso zi, a mbo he ɗu, a ya̰ ɗu.]#17:36 Swaga mbe no ne maktub ge zaŋgal a̰me ma zi to, a he na ma̰ da ne Mat 24:40.» 37Naa ge ame hateya ma jan na go: «Bageyal, mbo kat da ɗaa?» Na sḛ jan nama go: «Swaga ge kaŋ suya ne go, boge ma kote go#Ayu 39:30..»

Currently Selected:

Luka 17: FGN2013

Highlight

Copy