Luka 19

Jeso ma ne Zakka

1Swaga ge Jeso ne wá suwal Jeriko diŋ, ka kaleya. 2Ndi, ndu a̰me na dḭl Zakka, na ge a naa ge tyare kaŋ ma ga̰l ne, na sḛ ka ndu ge ɓol kaŋ. 3Ka ɓyare go, na kwa go Jeso mbe wuɗi ne de, amma ɓol viya̰ to ne ɓase ma pe, ne da pe ka sore. 4Sya zḛ ya, mbo ndé Fere digi ne da pe na ba kwa na, ago Jeso kale ma̰ viya̰ mbe go. 5Swaga ge Jeso ne dé ya swaga mbe go, hé na ndwara digi, jan na go: «Zakka, ka̰ mo koo ya se avun cap, mbi kat ma̰ mo diŋ.» 6Har tene kan na koo ya se, ame na ne laar saal. 7Swaga ge naa ne kwa no, pet a ka or wak janna go: «Mbo ya ndu ge sone diŋ ya!» 8Zakka mḛ digi, jan Bageyal go: «Bageyal, ndi mbi hon a̰se ma mbi kaŋ ɓolla ma le ɗu, kadɗa mbi maŋge ndu a̰me kaŋ, mbi gwan ne na potɗa anda pal.» 9Jeso jan na go: «Ma̰ no, máya wat ja yàl mbe no diŋ, ne da pe, na sḛ Abraham vya ne me. 10Ago Vya ge ndu ne mbo ya ɓyare, ne má kaŋ ge ne ba̰ ma.»

Fare sḭ ge dinar ne

(Mat 25:14-30)

11A ya swaga za̰ fare mbe no go gale, Jeso gwan ke nama fare sḭ, ne da pe gá gwa ne Ursalima. A ka dwat go muluk ge Dok ne ma̰ mbo ya ne se se no. 12Jan go: «Ndu a̰me ge hir gan mbo suwal ge kaal ya ndwara go a ba mbo e na gan, na ba gwan’a. 13Tol na dore ma ya wol, hon nama dinar wol, jan nama go: ‹Saŋge me aŋ tok diŋ gwanna ge mbi ne ya.› 14Amma na naa ge suwal ma kuri na, a e temel na pe ya go: ‹I ɓyare go ndu mbe ka gan i pal to.› 15Swaga ge ne gwa̰ ne na swaga ame gan ya, tol na dore ge na ne va nama bware ma ya na ndwara se, ne da pe na ba kwa kaŋ ge nama ne ɓo ne bware ge na ne ho̰ nama mbe zi. 16Ge zḛ ge mbo ya, jan go: ‹Bageyal, mo dinar ɓo ya zi dinar wol.› 17Jan na go: ‹A siŋli! Dore ge kwaɗa! Ne jo̰ ka ɗeŋger kaŋ ge woɗege zi, ka suwal ma wol pal.› 18Ge azi mbo ya, jan go: ‹Bageyal, mo dinar ɓo ya zi dinar anuwa̰y.› 19Jan na go: ‹Mo me, ka suwal ma anuwa̰y pal.› 20Ge ɗogle mbo ya, jan go: ‹Bageyal, ndi mo dinar no, mbi fiŋli na ba̰r zi woyya. 21Ago mbi ka sya mo vo, ne da pe, mo ndu ge yál ne. Mo maŋge kaŋ ge mo ne e na digi koyya to, mo syat kaŋ ge mo ne zare na to.› 22Na sḛ jan na go: ‹Dore ge sone, mbi kun mo sarya fare ge ne ndage ne mo wak zi pal. Mo kwa kwa go mbi ndu ge yál ne, mbi maŋge kaŋ ge mbi ne e na digi koyya to, ne syat kaŋ ge mbi ne zare na to. 23Mo te e mbi bware naa ge er bware ma tok go to gyana ɗaa? Gwanna ge mbi ne ya no, mbi te ya mbo ya ame na ne mam pal.› 24Jan naa ge a ne mḛ swaga mbe go ma go: ‹Maŋge me dinar ne na tok go, ho̰ me na ndu ge ne dinar wol.› 25A jan na go: ‹Bageyal, da ne dinar wol!› 26Mbi jan aŋ, ndu ge daage pet ge ne kaŋ, a mbo gwan hon na pal ta, amma ndu ge be kaŋ, ko kaŋ ge na ne, a mbo gwan ame na ne na tok go uzi. 27Amma mbi naa ge ho̰l mbe ma, nama ge a ne ɓyare go mbi ka gan bama pal to ma, gene me nama ya go go, vya̰ me nama mbi ndwara go.»

Mborra ge Jeso ne ndwara mbo Ursalima

(Mat 21:1-11, Mar 11:1-11, Yoh 12:12-19)

28Swaga ge ne jya̰ fare mbe ma no, dol tene naa ndwara zḛ ndwara mbo Ursalima ya. 29Swaga ge ne ya̰ ya gwa ne Betfage ma ne Betaniya, gwa ne njal ge a ne tol na olive, teme na naa ge ame hateya ma azi, 30jan nama go: «Mbo me suwal ge ne aŋ ndwara zḛ ŋga mbe no diŋ ya. Swaga ge aŋ ma̰ watɗa diŋ ya, aŋ ma̰ ɓol kwara vya ge ndu ne ndwa na ɗu to ne vwalla. Sá me na, gene me na ya. 31Kadɗa ndu a̰me ma̰ ele aŋ ya go: ‹Aŋ te sá na kyaɗa ɗaa?› Jya̰ me na go: ‹A Bageyal ɓyare na ne›.» 32Naa ge a ne teme nama ma mbo, a ɓol kaŋ mbe ma dimma ne Jeso ne jya̰ bama go. 33Swaga sá kwara vya go, naa ge kwara ma jan nama go: «Aŋ te sá kwara vya mbe gyana ɗaa?» 34A gwan ne janna go: «A Bageyal ɓyare na ne.» 35A gene na ya Jeso ta, a kan bama ba̰r ma na pal, a e Jeso ndwar na pal. 36Swaga mborra go, naa ka zen bama ba̰r ma viya̰ go. 37Swaga ge ne ya̰ ya gwa ne Ursalima ne viya̰ ge ne soole ne njal ge olive ne ya se, ɓase ge na naa ge ame hateya ma pet ne laar saal, a ka uware Dok ne ka̰l ndaar, ne kaŋ ajab ma ge bama ne kwa ma pe pet. 38A ka janna go: «Uwareya na ge ne mbo ya, gan, dḭl ge Bageyal ne zi! Halas digi zi ya, ne hormo swaga ge ne digi ma zi ya me.» 39Farisi a̰me ma mbut nama ge ne ka ɓase ma buwal zi ma jan Jeso go: «Bage hateya, mḛre mo naa ge ame hateya mbe ma.» 40Jeso gwan ne nama janna go: «Mbi jan aŋ, kadɗa a ma̰ zane ya, njal ma ma̰ oy digi!»

Jeso fyal suwal Ursalima pal

41Swaga ge ne ya̰ ya gwa, ne kwa suwal pala ɗe, par na wak fyaso na pal, 42jan go: «Te go mo kwa, dam mbe no pul zi, viya̰ ge ɓol halas kwa! Amma se no, a woy woy ne mo ta! 43Ago dam ma mbo ya go ne mo pe, ge mo naa ge ho̰l ma mbo tor suwar ver mo zi, a mbo terse mo ya zi. 44a mbo rot aŋ ne mo vya ma mo diŋ, a mbo burmi zok se a mbo ya̰ njal a̰me eya na kon pal to, ne da pe, mo be wan dam ge Dok ne dya̰ tene ya mo ta mbar mo pe to.»

Jeso yan naa ne zok ge mbegeya zi zum

(Mat 21:12-17, Mar 11:15-19, Yoh 2:13-22)

45Uwale Jeso wat zok ge mbegeya zi, yan naa ge ker tujar ma ya zum, 46jan nama go: «A njaŋge go: ‹Zok ge mbi ne, a mbo tol na zok kaɗeya›, amma aŋ ɗe, aŋ saŋge na ya swaga woy ta ge syala ma ne#Isa 56:7, Irm 7:11..»

47Jeso ka hate naa dam ne dam zok ge mbegeya zi. Amma naa ge ke tuwaleya ma ga̰l ma ne naa ge njaŋgeya ma, ne naa ga̰l ma ka ɓyare viya̰ ge hun na, 48amma a ɓol fare a̰me ge kerra to, ne da pe ɓase ma ka ame na hateya da ne sḛ tuli.

Currently Selected:

Luka 19: FGN2013

Highlight

Copy