Luka 22

Yuda ma ka ɓyare viya̰ ge hun Jeso

1Vḛso ge katugum ge be jiya̰l hore ne, na ge a ne tol na Paska, yan’a gwa. 2Naa ge ke tuwaleya ma ga̰l ma, ne naa ge njaŋgeya ma ka ɓyare viya̰ ge hun Jeso, amma a ka sya ɓase ma vo.

3Saytan wat Yuda, na ge a ne tol na Iskariyot zi, na sḛ ka naa ge wol para azi ma buwal zi. 4Mbo za̰ tene ne naa ge ke tuwaleya ma ga̰l ma, ne naa ge koy zok ge mbegeya ma ga̰l ma, ndwara na ba ɓol viya̰ ge ɓyan na nama tok go. 5Nama sḛ ma ke laar saal, a za̰ ta go bama hon na bware. 6Na sḛ vin, ka ɓyare viya̰ ge na ba ɓyan na nama tok go, be ge ɓase ma kwarra.

Kaŋzam ge vḛso paska ne nṵsiya

7Dam ge katugum ge be jiya̰l hore ne, na ge a ba mbo vyan tame ne ke kaŋzam ge vḛso Paska ne pe yan’a. 8Teme Bitrus ma ne Yohanna, jan nama go: «Mbo me nṵsi me nee swaga ge nee ba mbo zam kaŋzam ge vḛso Paska ne go.» 9A jan na go: «Mo ɓyare go i mbo nṵsi na da ya ɗaa?» 10Jan nama go: «Mbo me suwal diŋ ya, aŋ ma̰ ɓol ndu a̰me ne in mam ne tòòl, kare me na pe mbo yàl ge ma̰ wat ya diŋ ya go. 11jya̰ me bageyal go: ‹Bage hateya jan go: zok gwasal ge i ne mbi naa ge ame hateya ma ba zam kaŋzam ge vḛso Paska ne zi ya da ɗaa?› 12Ge burgu digi, ma̰ ŋgay aŋ zok pul a̰a̰l, ge ne nṵsi nṵsi ne kaŋ ma. A swaga mbe go no, aŋ ba ke kaŋzam ne vḛso Paska pe.» 13A mbo, a ɓol kaŋ mbe ma dimma ne Jeso ne jya̰ bama go, a ke kaŋzam ne vḛso Paska pe.

Pe dolla ge ba̰a̰n ne

(Mat 26:26-30, Mar 14:22-26, 1Kor 11:23-25)

14Swaga ge swaga ne mbya, kat kaŋzam wak go poseya ne naa ge temeya ma. 15Jan nama go: «Mbi ke ene go mbi za Paska mbe no poseya ne aŋ ɓya, mbi ba ɗage njot yál. 16Ago mbi jan aŋ, mbi mbo gwan zam na to bat, ɗiŋ na wak wi muluk ge Dok ne zi ya.» 17He kop, swaga ge ne gwa̰ ne gugu hon Dok, jan go: «Ame me kop mbe no, va me ta na, 18ago, mbi jan aŋ, ne gá ne zḛ no mbi mbo gwan njot oyo̰r mam to bat, diŋ muluk ge Dok ne mbo ya.» 19Uwale, hé katugum, swaga ge ne gwa̰ ne gugu hon Dok, siɗi na se, hon nama na, jan go: «Ame me, no a mbi sḛ duur ne na ge a ne ho̰ na ne aŋ pe, swaga ke na go aŋ ka dwat ne mbi.» 20Go̰r zamma go, ke go no me ne kop, jan go: «Kop mbe no a wak tuli ge giya̰l ge swama ge mbi ne zi, na ge ne ka̰ se ne aŋ pe.» 21Ndi, na ge ne ɓyan mbi naa tok go, ya kaŋzam wak go poseya ne mbi. 22Vya ge ndu ne mbo mbo dimma ne a ne e ne na pe go. Amma woo ne ndu ge ne ɓya̰ na naa tok go pe. 23A ɗage ele ta go, na wuɗi ne bama buwal zi ke fare mbe ma̰ ne de.

A wuɗi waɗe ne ga̰l ne

24Gool ɗage naa ge ame hateya ma buwal zi, a ka jan ta go na wuɗi waɗe ne ga̰l ne bama buwal zi ne de. 25Jeso jan nama go: «Gan ge pehir ge ɗogle ma ne ma ke muluk bama naa pal dimma ne bageyal go, naa ge pool ma e bama naa tol bama naa ge kwaɗa ma. 26Amma ne aŋ ɗe, kat go to. Ndu ge ne waɗe ne ga̰l ne aŋ buwal zi na saŋge tene dimma ne ndu jyale go, ndu ge ne ka ne aŋ pal na saŋge tene dimma ne ndu ge ne ke temel hon naa go. 27A wuɗi waɗe ne ga̰l ne ɗaa? A bage ne ka ne kaŋzam wak go, ko bage ne ke temel hon naa ɗaa? Te be ndu ge ne ka ne kaŋzam wak go to’a? Amma mbi ne aŋ buwal zi dimma ne ndu ge ne ke temel hon naa go. 28Aŋ ɗe, aŋ naa ge ne wa̰ ta ne mbi kugiya ge mbi ne zi ma ne. 29Dimma ne mbi Bá ne e muluk ne mbi pe go, mbi me mbi e muluk ne aŋ pe. 30Ne da pe, aŋ za ne njotɗa mbi tabul wak go muluk ge mbi ne zi ya, aŋ ka hool gan ma pal ndwara kun pehir ge wol para azi ge Israyela vya ma ne ma sarya.»

Jeso waage wak njuɗiya ge Bitrus ne

(Mat 26:31-35, Mar 14:27-31, Yoh 13:36-38)

31«Siman, Siman, ndi, Saytan ele go na saase aŋ dimma ne naa ne saase gḛme go, 32amma mbi kaɗe ne mo pe, na kaage hon fareba ge mo ne ba̰ to. Mo ɗe, swaga ge mo ne mbo gwan ja mbi ta, sirsi mon ná vya ma.» 33Bitrus jan na go: «Bageyal, mbi ka kat jejew mbo daŋgay zi, ko mbo siya zi dagre ne mo.» 34Jeso jan na go: «Mbi jan mo, Bitrus, baare tol fyaso ma̰ to gale, mo ma̰ njuɗi mo wak go mo kwa mbi to ɗiŋ ndwara ataa.»

Swaga mbyatɗa go ge aŋ abe kaŋ ma aŋ tok go

35Jeso jan nama go uwale: «Swaga ge mbi ne teme aŋ be bware aŋ tok go, be galam, be tyarko aŋ koo zi, a̰me woɗege aŋ ɗaa?» A jan na go: «To!» 36Jan nama go: «Se no, ndu ge ne bware, na abe na, ndu ge ne galam, na he na, ndu ge ne kasagar to, na yá na ba̰r uzi, na yá ɗu ne tene pe. 37Ago, mbi jan aŋ, kaŋ ge a ne njaŋge na mbi pal ma wak wi, jya̰ go: ‹A isi na naa ge ya̰l ma buwal zi›. Fare ge a ne jya̰ na mbi pal ma det ja bama wak wiya go.» 38A jan na go: «Bageyal, ndi kasagar ma no azi.» Jan nama go: «Mbyatɗa go.»

Kaɗeya ge Jeso ne njal olive pal digi

(Mat 26:36-46, Mar 14:32-42)

39Wat ya zum, mbo njal olive pala digi ya dimma ne na ne ha̰le go, na naa ge ame hateya ma kare na pe ya. 40Swaga ge ne dé ya swaga mbe go, jan nama go: «Kaɗe me, na kaage aŋ dé pe herra zi to.» 41Abe tene uzi ya ne nama ta mbo kaŋ ge ndu ne mbal tuul zum ya go ga, gur na koo se, ke kaɗeya, 42jan go: «Báá, kadɗa mo ɓyareya, he kop mbe ne mbi pal uzi nde. Na ka be mbi laar ɓyareya to, amma laar ɓyareya ge mo ne.»

[43Maleka dyan tene na ta ne digi zi ya ndwara hon na pool. 44Iigiya zi, ka gwan ke kaɗeya á tene, na ṵwa̰se ɗage torra dimma ne swama ne tor suwar zi go. 45Swaga ge ne ɗage ne na swaga kaɗeya go, mbo ya naa ge ame hateya ma ta, ɓol nama ne fi dam, laar pisil zi.]#22:45 Maktub ge zaŋgal a̰me ma ne swaga mbe no to. 46Jan nama go: «Aŋ te fi dam kyaɗa ɗaa? Ɗage me digi, kaɗe me, na kaage aŋ dé pe herra zi to.»

Wanna ge Jeso ne

(Mat 26:47-56, Mar 14:43-49, Yoh 18:3-11)

47Ne swaga jan fare go gale, ɓase ma yan’a. Na ge a ne tol na Yuda, ɗu ne naa ge wol para azi ma buwal zi, ka mborra nama ndwara zḛ. Mbo ya Jeso ta ndwara abe na nà sḛ zi. 48Jeso jan na go: «Yuda, da ne abeya sḛ zi ta ɗo mo ba ɓyan Vya ge ndu ne naa tok go ɗaa?» 49Naa ge a ne nama ne ka ma swaga ge a ne kwa no, a jan na go: «Bageyal, i sya nama ne kasagar ɗaa?» 50A̰me ɗu ne nama buwal zi fete ga̰l ge naa ge ke tuwaleya ma ne dore togor matoson uzi ya. 51Jeso jan go: «Ya̰ me baŋ, mbyat go!» Tat dore mbe togor, zon na. 52Jeso jan naa ge ke tuwaleya ma ga̰l ma, ne naa ge koy zok ge mbegeya ma ga̰l ma, ne naa ga̰l ma ge a ne mbo ya wan na ma go: «Aŋ te mbo ya ne kasagar ma, ne calaŋ ma gyana wan mbi dimma ne naa ne wan syala go ɗaa? 53Mbi ka kat ne aŋ ɗaɗak zok ge mbegeya zi, aŋ be wan mbi to. Amma a aŋ swaga mbya ne, a swaga ge pool ge tṵ ne mbya ne.»

Wak njuɗiya ge Bitrus ne

(Mat 26:57-58,69-75, Mar 14:53-54,66-72, Yoh 18:12-18,25-27)

54A wan na, a mbo ne na, a gene na kep tuwaleya diŋ ya. Bitrus ka kare na pe ne kaal ya. 55A mbar ol yapul go uwalla, Bitrus mbo ya kat nama buwal zi. 56Kale a̰me kwa na ne katɗa ol wak go, ndil na ɗer, jan go: «Ndu mbe no ka dagre ne na me.» 57Amma njuɗi na wak, jan go: «Gwale, mbi kwa na to!» 58Ta swak, ndu ge ɗogle kwa na, jan go: «Mo me, mo nama ndu ne!» Bitrus jan go: «A be mbi to!» 59Swaga gwan kale mbo kaŋ ge ler ɗu go, ndu ge ɗogle mḛ na koo fare mbe pal, jan go: «Fareba, ndu mbe no ka poseya ne na, a Galile ne!» 60Bitrus jan go: «Ndu son’o, mbi wan fare ge mo ne jan mbe pe to!» Swaga jan fare mbe go gale, baare tol fyaso. 61Bageyal saŋge tene se, ndil Bitrus. Bitrus dwat ne fare ge Bageyal ne jya̰ na go: «Baare tol fyaso ma̰ to gale, mo ma̰ njuɗi mo wak go mo kwa mbi to ɗiŋ ndwara ataa.» 62Wat ya zum, fyal fyaso ge zwala.

63Naa ge a ne koy Jeso ma, a cot ta ne na, a ka iyal na me. 64A vwal na ndwara, a ka ele na go: «Jya̰ i gale, a wuɗi iya mo ne ɗaa?» 65A gwan sal na sáso ma ta gḛ.

Jeso ge Yuda ma naa ge kun sarya ma ndwara se

(Mat 26:59-66, Mar 14:55-64, Yoh 18:19-24)

66Swaga ge swaga ne ko̰y, ga̰l ge ɓase ma ne ma, naa ge ke tuwaleya ma ga̰l ma, ne naa ge njaŋgeya ma, a kote. A mbo ne na bama naa ga̰l ge kun sarya ma ndwara se ya, 67A jan go: «Kadɗa mo Kris ne, jya̰ i.» Jeso jan nama go: «Kadɗa mbi ma̰ jan aŋ ya puy, aŋ hon fareba ma̰ to. 68Kadɗa mbi ma̰ ele aŋ fare ya, aŋ gwan ne mbi fare janna ma̰ to. 69Amma ne ga ne zḛ no, Vya ge ndu ne mbo kat Dok ge pool tok matoson pal.» 70Nama sḛ ma pet, a jan go: «Mo Dok vya ne’a?» Na sḛ jan nama go: «Aŋ sḛ ma jan ne go, mbi na ne.» 71A jan go: «Nee gwan ɓyare ma sayda pe iya ɗaa? Nee sḛ ma za̰ na ya go ne na wak zi.»

Currently Selected:

Luka 22: FGN2013

Highlight

Copy