Luka 24

Tanna ge Jeso ne

(Mat 28:1-10, Mar 16:1-8, Yoh 20:1-10)

1Dumas cya̰wak vḛ, a mbo ya siim pala go ne dukan ge bama ne nṵsi ma. 2A ɓol go njal viŋgri ya uzi ne táál wak go. 3Swaga ge a ne wá zi ya, a ɓol duur ge Bageyal Jeso ne to. 4Ne jo̰ a ka a̰reya zi, ndi, naa azi a dyan ta nama ta ne ba̰r saal taɗak. 5Vo wan nama, a cwage bama pala se, naa mbe ma jan nama go: «Aŋ te ɓyare ndu ge ne ndwara naa ge siya ma buwal zi kyaɗa ɗaa? 6Ne go go to, tan ya go. Dwa me ne fare ge ne jya̰ aŋ swaga ge gale ne ka Galile go, 7jya̰ go: ‹A ŋgat a ɓyan Vya ge ndu ne naa ge sone ma tok go, a pel na uwara kaŋgre pal, dam ge ataa go na tan digi#Luk 9:22, 17:25, 18:32-33.›.»

8Swaga mbe go, a dwat na fare mbe ma. 9A gwan ne siim pala ya, a mbo ya wan naa ge wol para ɗu ma, ne naa ge may ma fare mbe ma pe pet. 10Ka Maryam ge suwal Magdala, ne Johanna, ne Maryam ge Yakub ná, naa zaab ge may ma ge a ne nama ne ka dagre ma, a jan temeya ma go no me. 11Amma fare mbe ma kat nama ta dimma ne sigir baŋ go, a hon fareba naa zaab mbe ma fare janna pal to. 12Bitrus ɗage digi, sya mbo siim pala ya. Hugi se, kwa ba̰r ge a ne twa na zi ma ne kanna se. Mbo na mborra, ka ke ajab ne kaŋ ge ne ke.

Viya̰ Emmayus go

(Mar 16:12-13)

13Ndi, dam mbe go, naa azi ne nama buwal zi a ka mbo suwal vya a̰me ge a ne tol na Emmayus ya, ne Ursalima go mbo na ya her kaŋ ge ler azi go. 14A ka wan ta fare ge ne ke mbe ma pe pet. 15Swaga wan ta fare pe go, ne dol fare ta pal go, Jeso wat ya nama buwal zi, a ne nama ga mborra. 16Amma nama ndwara tyan na ta to bat. 17Jan nama go: «Aŋ te wan ta ma fare pe swaga mborra go go ɗaa?» A mḛ se, ndwara suya se leɗet. 18Ndu a̰me ɗu ne nama buwal zi, na dḭl Kleopas, gwan ne na janna go: «A mo ɗu kikit ne Ursalima diŋ ge ne wan fare ge ne ke ma̰ mbe no pe to ne ɗaa?» 19Jan nama go: «A ma kaŋ ke ne ɗaa?» A jan na go: «Fare ge ne ke Jeso ge Nazaret, na ge ne ka anabi ge pool, temel kerra zi, ne fare janna zi, Dok ndwara se ne naa dasana ma ta me. 20I naa ge ke tuwaleya ma ga̰l ma, ne i ga̰l ma, a ɓya̰ na naa tok go go nama hun na, a pé na kaŋgre pala digi no. 21Amma i é i jobreya na pal go na bage zur Israyela ne, amma, ndi dam ma̰ no ataa ge kaŋ mbe ma ne ke. 22A fareba go naa zaab a̰me ma ne i buwal zi, a e i ke ajab, a ɗage cya̰wak vḛ mbo siim pala ya, 23swaga ge a ne ɓó na duur to, a gwa̰ ya janna no go, maleka ma dya̰ ta bama ta, a jya̰ no go na da ne ndwara. 24Naa a̰me ma ne i buwal zi a mbo siim pala ya, a ɓó kaŋ ma dimma ne naa zaab ma jya̰ go, amma a be kwa na to.» 25Jeso jan nama go: «Naa ge be kwa fare to ma, naa ge dṵṵl be ge hon fareba fare waageya ge anabi ma ne pal ma! 26Kris te mbyat za̰ yál mbe go ɓya ɗo, ba ɗage wat uwareya ge na ne zi to’a?» 27E pe ne maktub ge Musa ne zi ya day, ɗiŋ det ya maktub ge anabi ma ne zi pet, ka wan nama fare ge a ne njaŋge na ne na pal ma pe. 28Swaga a ne ya̰ ya suwal ge bama ne ɓyare mbo na ya ta gwa, ke ne mo jo̰ na ne ɓyare kale zḛ go. 29A gwarge ta na ta janna go: «Gá ne i, ago swaga kale ya go, gyala mbo ne go dimma.» Wat ya diŋ, gá poseya ne nama. 30Swaga ge a ne nama ne ka kaŋzam wak go, hé katugum, é wak busu na pal, siɗi na se, hon nama. 31Swaga mbe go, nama ndwara tyan, a kwa na, amma fat ne nama buwal zi swaga. 32A ɗage jan ta go: «Swaga ge ne ka jan nee fare viya̰ zi, ne ka wan nee maktub ma pe, nee dulwak ma te be ka til nee to’a?»

33A ɗage ne swaga mbe go, a gwan mbo Ursalima, a mbo ɓol ge wol para ɗu ma poseya ne bama kaam ma koteya. 34Naa ge ne kote ma jan nama go: «A fareba, Bageyal tanna go, dya̰ tene Siman ta!» 35Nama sḛ ma wan nama fare ge ne ɓo bama viya̰ go pe, ne dyanna ge na ne dya̰ tene bama ta swaga ge ne ɗage siɗi katugum se go.

Jeso dyan tene na naa ge ame hateya ma ta

(Mat 28:16-20, Mar 16:14-18, Yoh 20:19-23, Tkm 1:6-8)

36A gale ne swaga wan fare pe go, Jeso dyan tene ya nama buwal zi, jan nama go: «Ka me halas!» 37A ndace, vo wan nama, a ka dwat go bama kwa kḭḭm a̰me. 38Jan nama go: «Aŋ te iigi go gyana? Aŋ te ɓol tumriya aŋ dulwak zi go gyana ɗaa? 39Ndi me mbi tok ma ne mbi koo ma: A mbi sḛ ne. Tá me mbi gale, kwa me go, kḭḭm ne sḛ duur ma ne kal to, dimma ne aŋ ne kwa mbi ne se no go.» 40Swaga ge ne jya̰ nama fare mbe ma no, ŋgay nama na tok ma ne na koo ma. 41Laar saal ge nama ne zi, a gale ne be hon fareba to, a ka ke ajab. Jeso ele nama go: «Aŋ ne kaŋzam ge zamma ne go go to’a?» 42A hon na sii sḛ siɗiya dik swarra. 43Ame na, zam na nama ndwara go.

44Jan nama go uwale: «No a fare ge mbi ne ka jan aŋ swaga ge mbi gale ne ka poseya ne aŋ ne: A ŋgat go fare ge a ne njaŋge nama ne maktub eya ge Musa ne zi, ne ge anabi ma ne zi, ne Kaŋ mballa ma zi ma wak wi.» 45Hage nama haŋgal ne da pe nama wa̰ kaŋ njaŋgeya ma pe. 46Jan nama go: «A njaŋge go, Kris mbo njot yál, mbo tan ne siya ma buwal zi digi dam ge ataa go#Isa 53, Hos 6:2., 47go no a ba oy fare ge haseya ne pehir ma ta pet ne poreya ge sone ma ne pe dḭl ge na ne zi, pe eya ne Ursalima go. 48Aŋ naa ge sayda ma ne. 49Ndi, mbi mbo teme aŋ kaŋ ge mbi Bá ne ke aŋ na wak tuli ya aŋ pal. Aŋ ɗe, ka me suwal diŋ ɗiŋ aŋ ame pool ge ne mbo ne digi ya ɓya.»

Mborra digi ge Jeso ne

(Mar 16:19-20, Tkm 1:9-11)

50Mbo ne nama ɗiŋ Betaniya ta ya gwa, abe na tok ma digi, e nama wak busu. 51Swaga ge ne ka e nama wak busu go, a ne nama buwal varse, mbo pḭr zi ya. 52Nama sḛ ma, go̰r ge a ne gu na ndwara se, a gwan’a Ursalima diŋ ne laar saal ge be to. 53A ga katɗa zok ge mbegeya zi ɗaɗak, a ka uware Dok.

Currently Selected:

Luka 24: FGN2013

Highlight

Copy