Biy 2

Nyisulu Mpeeve Yangisi

1Kiluumbu kya Pantekote bu kyayisa, bobanso baba bakutukuna ha kibeendu kyokimosi. 2Na sisuu, kwayisa lusuku lwafumuna ku yulu, bunu kiteembu kyamakwa, kyalulusa nzo yoyinso, yi baba badzakala. 3Milaka miri bunu mya mbaawu, myamonoko kuri bo, myakabama na myasunduka ha yulu mosi mosi mu bo. 4Bobanso baluula mu Mpeeve Yangisi, na bo babaandika mu kudzoonso mu mandiinga makaka, bunu bwa baheeriri Mpeeve mu kudzoonso.

5Ku Yerusalemi kwaba dzakalaana Bayudayo bari na kinzaambi kyamakwa, bafumuni mu makaanda momanso mari ha butoto. 6Lusuku lulwo bu lwayukukina, mpuumbu baatu yakutukina, na yakimuka, bukuri muutu-muutu waba yukaana bo, badzoonso mu ndiinga bula. 7Bo bapamuka na bakimuka, baleele ti: "Buri bobanso ba, kari bari Ngalili bari mu kudzoonso ko? 8Ngo buri muutu-muutu mu beetu, kari mu kuyuka badzoonsolo mu ndiinga bula? 9Kuri bari Paroto, bari Medo, bari Elamite, na badzakala ku Mesopotamya, ku Yudaya, ku Kapadokya, ku Ponto, ku Asya, 10ku Firingya, ku Pamfilya, ku Ngipiti na bari mu mankoonsi ma Libya, ma ku Kirene na bari Loma. 11Bayudayo, na baatu bakimi, bakoto mu Nzaambi bo, bari Kerese na bari Arabya, beetu tuyuka bo, badzoonso mu mandiinga ma beetu, myabweeye mya Nzaambi. 12Bobanso bapamuka na madyeele mabawa; balelesene bo na bo ti: "Sa bi nki?" 13Bakaka basaana, baleele ti: "Malu maaku bari mu kwekolo."

Mya dzoonso Petelo

14Petelo, bu kateleme kintwaari na bo kuumi na mosi, watoombolo mbeembu yaandi, waleele kuri bo ti: "Bari Yudaya, na badzakala mu Yerusalemi beenu bobanso, dimadi dyayelemene kuba dyayabakana kuri beenu, kebeenu maampu ma me. 15Pele, ka ma luri mu kutsima beenu ko, ti bamaba bakolo malu, bukuri twakiri mu kilookolo kyabitatu. 16Mamama ma leeriri mubikiri Yoweli:

17"Mu biluumbu bya manunu, bwa leeriri Nzaambi,

me sa nyatsaamuna Mpeeve yaami ha yulu muutu-muutu,

na baala beenu ba babakalala, na baba bakyeetu sa babikula,

bituuti sa bamono mamono-miisu,

na binuni byeenu sa balooto mandosi.

18Na ha yulu bisari byaami se,

bya babakala na bya bakyeetu,

mu biluumbu bibyo,

me sa nyatsaamuna Mpeeve yaami,

na bo sa babikula.

19Me sa nyayirika bimaangu ku yulu,

na bidiimbu ha butoto:

sa kwaba makila, mbaawu na matuti ma mwiisi.

20Ntaangu sa yakituka mampimbisi,

ngoondo sa yakituka makila,

tekesele kiluumbu kyakinene na kyansisi kya Mfumu ki kwiisa.

21Haho, mpisi wunde wuteele nkuumbu Mfumu, sa kaba wabvuukusu."

22"Bari Isaheli, yukeenu maampu mamama: Yesu wa ku Nadzareti, Nzaambi wamusooriri mu kuyirika bimaangu, mya nkimukunu na bidiimbu mu ntoono beenu. Nzaambi wayirika byo mu nde ha kakati dya beetu, bunu bu luyaari beenu-meene 23Muutu wunde, bunu bwaba nzeengulu na nyaabulu ya Nzaambi, wayekulu mu myooko mya bahele na mangisi, bamudzusa mu kumukomono ha kuruwa. 24Nde Nzaambi kari kafulukisa, mu kumukuula mu myaangala mya lufwa, bukuri bwaketi kuba ko ti, lufwa lumukwaata. 25Mukwongo, Davidi waleele mu ntoono nde ti:

"Mu mpisi ntaangu, me nyaba monaana Mfumu ha busu bwa me,

bukuri nde wuri ha lubakala lwa me, mpisi me mpele kubwa,

26mu ntoono yiyo, mutima waami wuri mu kumono kiminu, ludima lwaami lukeembe,

na nyutu yaami sa yawuuma ha yulu nsiitu,

27bukuri ye wuri nyekele kiluunsi kya me, ku nsi ya bafwa ko,

ye ka wutala ko ti wangisi waaku kamono mbolulu.

28Ye wayaabisiri kuri meenu manzila ma bumwooyo,

ye Nzaambi sa luulusa me mu kiminu."

29"Bampaangi, bu nyiri na miswa, mya kudzoonsolo mu nsiitu, ha busu bwa beenu, mu ntoono Davidi mwa-nkaanka, ti nde se wafwa na wadziiku, na mukala waandi wuri ha kakati dya beetu, natee kiluumbu ki. 30Hango, nde waba mubikiri, na Nzaambi walabiri maalu kuri nde ti, mosi mu bilesi bya ye, sa kadzakala ha mboloko yaaku. 31Bu katekesele kumono, wadzoonso mu ntoono mfulukulu Kiristo ti:

"Nde basii muyekele ku nsi ya bafwa ko,

na nyutu yaandi yasii mono mbolulu ko."

32Yesu didyo, Nzaambi wamufulukisa mu bafwa, na beetu bobanso turi bambaangi ba myo. 33Nde wadzaangusu ha lubakala lwa Nzaambi, bu kataambula kuri Taayi, lusiilulu lwa Mpeeve Yangisi yi kari kanyaka, mamo beenu [se] luri mu kumono na kuyuka. 34Mukwongo, Davidi wahele kunwaata ku mayulu; ngo nde waleele nde-meene ti:

"Mfumu Nzaambi waleele kuri Mfumu yaami ti:

dzakala ha lubakala lwaami,

35natee me nsiiri bataatu baaku nkata-miilu myaaku."

36Hango, nzo yoyinso ya Isaheli yiyelemene kuyaaba kwa ngwanwa ti: Nzaambi wasa Yesu wu lwakomini beenu, Mfumu na Kiristo!"

37Bu bamana kuyuka mamo, bo bamono mpasi mu mitima, na baleele kuri Petelo na kuri bantumu bakaka ti: "Bampaangi, beetu buri tuyelemini kusa?" 38Petelo waleele kuri bo ti: "Yiingeenu madyeele [bubwo kaleeriri] na mosi-mosi mu beenu kataambula mbotokulu mu nkuumbu ya Yesu Kiristo, mu mpemusunu ya masumu ma beenu, tumi lutaambula kikabu kya Mpeeve Yangisi. 39Mukwongo, lusiilulu basa lwo kuri beenu, kuri baala beenu, na kuri bobanso bari la, bobanso bari Mfumu Nzaambi yeetu wabateele mbila."

40Mu maampu makimi malaka, nde watswiikisa na wabasyaamisa, waleele ti: "Bvuukeenu kweenu mu kiseendu kyakibi ki!" 41Hango, bo bu bataambula maampu maandi, bababotoko, na mu kiluumbu kikyo, kampe mafuunda matatu ma baatu mayikimini.

Kidziingu kya dibuundu

42Bobanso basyaama mu nyikusulu dza bantumu, mu kintwaari, mu mbukununu mpa na mu nsaambulu. 43Mpisi nde watubuka mu kiteesu kya kuba na kibvumi; bantumu bayirika bimaangu na bidiimbu byalaka. 44Bobanso basiiri kanyi, baba kibeendu kimosi, na byobinso byaba byantwaari, 45baba yarikaana lubaku na bitotolo byaaku, na baba kabulaana mboongo kuri bobanso, bunu bwaba manzala ma mpisi muutu. 46Mpisi kiluumbu, baba namitinaana kuba mu kintwaari mu Nzo-nzaambi, mu kubukuna mpa, na kukabula byandya ku nzo, 47badumusa Nzaambi na bataambula mabweese kuri makaanda momanso. Mfumu waba bweesaana mpisi kiluumbu, lutaangu lwa baatu babvuuku mu kintwaari.

Currently Selected:

Biy 2: MW2013

Highlight

Copy