Mat 21

Nkotulu Yesu ku Yerusalemi

(Mal 11.1-11; Luk 19.28-40; Yow 12.12-19)

1Bu bari mu kwekokosolo na Yerusalemi, batubuka ku bula bwa Betefange, ku mulaandu wa Mi-olive, haho, Yesu waheeke bayiki boolo. 2Nde waleele kuri bo ti: «Yendee ku bula buri ha mankula ma beenu, na hanaho, beenu sa lwamono mukasi mpuunda wakaangu na mwaana. Nyangunee na twalee kuri me. 3Na mbuti muutu wululeeriri ntoono, mubvutukileenu ti: "Mfumu wuri na nzala byo." Hanaho, nde sa kaheeke byo.»

4Mamama masalama mpisi heki ma leele mubikiri meende mu mana:

5«Leeleenu kuri mwaana mukyeetu wa ku Syoni ti:

Mono mbyaasi yaaku yiri mu kwiisa kuri ye,

wadzuuna, wanwaata ha yulu mpuunda ya mukasi,

na ha yulu mwaana mpuunda,

kibulu kiri na kifiki.»

6Bayiki ba Yesu bayende na bakukisa ma baleeriri Yesu. 7Bo batwaala mpuunda na mwaana waandi, bateeteke mansaanda na binkuta ha yulu byo na Yesu wadzakala ha yulu. 8Mpuumbu yayinene yayala binkuta bya bo mu nzila, baatu bakaka batabula bimpaala bya miti, bi bayala mu nzila. 9Mampuumbu maba ku matu na ku mambisa ma Yesu maba kwebikisa, maleele ti: «Hosana kuri Mwaana Davidi; wasakumunu wunde wukwiisa mu nkuumbu ya Mfumu; hosana mu bibeendu bibvuriri kudzaangama.»

10Yesu bu kakoto ku Yerusalemi, bvula dyodinso dyatekete dyaleele ti: «Wu ngo na?» 11Mampuumbu makweleele ti: «Wu ngo Yesu, mubikiri wa ku Nadzareti, dya Ngalili.»

Yesu mu Nzo-nzaambi

(Mal 11.15-19; Luk 19.45-48; Yow 2.13-22)

12Bu kakoto mu Nzo-Nzaambi, nde wabinga bobanso baba yarikaana na baba suumbaana munsa Nzo-nzaambi, wabwiisa mataabala ma baba yiingaana mboongo, na bidzakukulu bya baba yarikikaana mabeembe. 13Yesu waleele kuri bo ti: «Diri dyatinu:

"Nzo yaami sa bateele, yo nzo lusaambulu."

Ngo kasi beenu lumwaasa yo, ntari bangaa-bumfuna.»

14Bafwa miisu na babeele miilu, bakokosolo kuri nde mu Nzo-Nzaambi, na nde wabatsinikisa.

15Bakuutu ba bangaanga-Nzaambi na batini ba mangisi, babaka nkesi, bu bamwiini misamu myansisi mi kayirikiri, na mwaa-baala baba bikisaa mu Nzo-nzaambi ti: «Hosana mwaana Davidi!» 16Bo baleele kuri nde ti: «Buri ye wuri mu kuyuka mari mu kuleele bamaba?» Yesu wabvutula kuri bo ti: «Heehe! Buri beenu lwasii taanga ko ti: "Mu minwa mya mwaa-baala bantele na bansoombo, ye wayirika ndumusu yaaku"?» 17Bu kabasisa, nde wapala mu bvula na wayende ku Betanya ku kalutisa butsuku.

Yesu wabulila mungenge mpopi

(Mal 11.12-14, 20-24)

18Mu kipari, habaanaa weki bvutuka ku mabvula, nde wabaka nzala. 19Nde watalila mungenge mu nzila na wakokosolo kuri nde, ngo kasii mono kitotolo ko, ha yulu mani makaya kitsu. Na wamuleele ti: «Fuu kya bufulukutuu, ye wuri mbakila bimbutu ko!» Na ha nsi na nsi mungenge wakana. 20Bayiki baandi bu bamono bakimuka na baleele: «Dyaburi mungenge kakanini ha nsi na nsi?» 21Yesu kabvutula kuri bo, waleele ti: «Mu ngwanwa me nyiluleeriri, mbuti beenu lubeeri na kanyi, na lwahele kusa mpaka, kari mana ma lumwiini mu mungenge, luketi kuyirika kitsu ko, ngo na kuri mulaandu wu se, ha beeri lo luleeriri ti: "Yisika na yende bwa mu mubu", lo bubwo buyirimini. 22Momanso ma luloombo beenu mu lusaambulu, bu lusiiri kanyi sa lumataambula.»

Kuri kwafumuna lutuma lwa Yesu?

(Mal 11.27-33; Luk 20.1-8)

23Yesu wayende ku Nzo-Nzaambi. Bu kaba mu kuyikisa bakuutu ba bangaanga-nzaambi na bakulu ba bakala ba kaanda bakokosolo kuri nde, baleele ti: «Mu nki lutumu ye wuri mu kweyirikila mamo? Na wakuha lutumu lumalu?» 24Yesu wabvutula, waleele kuri bo ti: «Me se kifuuri kimosi me nyiluha, kiri mbuti beenu lumpeeri mvutu, tumi me se nyiluleeriri mu nkya lutumu me nyiri mu kweyirika mamo: 25Mbotokulu ya Yowane, yaba ya kuri? Ya ku yulu hoti ya baatu?» Bo balelesene bo na bo ti: «Mbuti tuleeriri ti: "ya ku yulu", lo nde bee leeriri ti: "Hango buri lwaheriri kusiila kanyi mu nde?" 26Na mbuti tuleeriri ti: "Ya baatu", tubata mpuumbu. Bukuri bobanso bahololo Yowane bunu mubikiri. 27Bo babvutula kuri Yesu, baleele ti: "Beetu tuyaari ko.» Yesu wababvutula ti: «Me se nyiluleele ko, mu nkya lutumu me nyiri mu kweyirika mamo.»

Nkuma ya baala boolo

28«Beenu nki lutsimini? Muutu mosi waba na baala boolo. Bu kakokosolo kuri watete, wuleele ti: "Mwaana me, yende sala bwalolo ku nseke bviinya." 29Nde wabvutula, waleele ti: "Me nyahele kutya." Mwaa-mantaangu bu maluta, nde wayiinga kitsimi na wayende. 30Bu kakokosolo kuri wakaka, waleele bwobumosi. Ngo nde wabvutula waleele ti: "Mfumu, me nyikweende", Ngo kasi wahele kweende. 31Na mu bo boolo wayirika kutya kwa taayi?» Bo baleele «watete». Yesu waleele kuri bo ti: «Mu ngwanwa me nyileele kuri beenu ti: Batori ba mpaku na bakyeetu ba biyala sa balutekisile mu Kimfumu kya Nzaambi. 32Bukuri Yowane wayisa kuri beenu mu nzila ya nsungumunu, beenu lwasii siila kanyi mu nde; kasi batori ba mpaku na bakyeetu ba biyala basiila kanyi mu nde. Ngo beenu lwamono, kasi ha mambisa haho lwahele kuyiinga dyeele, mu kusiila kanyi mu nde.»

Nkuma ya bakamuni ba bviinya bababi

(Mal 12.1-12; Luk 20.9-19)

33«Yukeenu nkuma yikimi: Muutu mosi waba ngaa-nzo, wakuna nseke bviinya, wadyengesile yo mu lupaangu, wahaka bulu dya kukamukina malu, watuunga nzo yadzaangama, wayukusina na bakamuni ba bviinya na wayende ku budyeengi. 34Ntaangu ya kutolo bimbutu bu yatubuka, nde waheeke bisari byaandi kuri bakamuni ba bviinya, bee baholo kikuuku kya nde. 35Bakamuni ba bviinya, bakwaata bisari bya nde, balata wamosi, badzusa wakaka, na wa batatu bamudzusa mu matari. 36Nde wabweese kuheeke bisari bikimi bibvuriri mu lutaangu ti na byatete; na bo bayirika bwobumosi kuri bo. 37Mwaa-mantaangu bu maluta, nde waheeke mwaana waandi kuri bo, waleele ti: "Bo sa babvumina mwaana me." 38Bakamuni ba bviinya bamono mwaana, balelesene bo na bo ti: "Wumawu ngo mukondiri-saala. Waseenu, tumudzuseenu, mpisi tumuholee na saala." 39Bamukwaata, bamutuba ku mbisa nseke, na bamudzusa.»

40«Hango, ntaangu yikwiisa ngaa-nseke, nki kasa kuri bakamuni ba bviinya?» 41Bo babvutula kuri nde ti: «Nde sa kadzusa bababi babo mu kibakala, na sa kaha nseke kuri bakamuni bakimi, bamuha bimbutu, mu ntaangu ya bo.»

42Yesu waleele kuri bo ti: «Buri beenu lwasii taanga mu Matinu ko?

"Tari dyaloosiri batuungi,

didyo ngo dyeki dyanguri ha kuumbu;

mimyo kuri Mfumu miri myafumuna,

na mya nkimukunu ha miisu mya beetu."»

43«Hango-nkuumbu, me nyileele kuri beenu ti, Kimfumu kya Nzaambi, sa baluyusula na kyo, na sa baha kyo kuri kaanda dibuta bimbutu. [44Mpisi wubwa ha yulu tari di sa kakosoko; na mpisi wuri dimubwirikiri, sa dyamunyifuna.]»

45Bakuutu ba bangaanga na Bafarisi bayuka mankuma ma Yesu, babakila ti Yesu mu bo kadzoonsolo. 46Basaka bwa kumukwaatila ngo babata mampuumbu, bukuri baba hololo Yesu bunu mubikiri.

Currently Selected:

Mat 21: MW2013

Highlight

Copy