Sɛ́nflínmɛ Xónusɔ́ɖóte
Xónusɔ́ɖóte
Sɛ́nflínmɛ wéma ɔ́, xó tɛnmɛ tɛnmɛ e Mɔyízi ɖɔ lɛ́ɛ wɛ ɖ'é mɛ. Togun Mawu tɔn ɔ́ wá Mɔwabu tomɛ, bó kó ɖibla yi Kanáa tomɛ. Amɔ̌, Mawu kó ɖɔ nú Mɔyízi ɖ'ayǐ ɖɔ é kún ná yi ayǐkúngban e sín akpá émí dó nú tɔ́gbó tɔn lɛ́ɛ ɔ́ jí ó. Énɛ́ ɔ́, cóbónú Mɔyízi ná kú ɔ́, é flín sɛ́n Mawu Mavɔmavɔ tɔn lɛ́ɛ togun ɔ́.
Nǔ e jɛ ɖo xwe kanɖé e Izlayɛ́li ví lɛ́ɛ flú gbɔn gbětótló mɛ xɔ ɔ́, Mɔyízi to flín bǐ yě hwɛ̌. É tínmɛ nú yě ɖɔ Mawu wɛ xlɛ́ ali yě, é wɛ kpé nukún yě wú. Énɛ́ wú ɔ́, yě ɖó ná nɔ gbejí n'i.
Énɛ́ ɔ́ gúdo ɔ́, Mɔyízi lɛ́ vɔ́ ɖɔ Mawu Mavɔmavɔ sɛ́n wǒ lɛ́ɛ kpódó sɛ́n ɖě lɛ́ɛ e Mawu ná togun tɔn lɛ́ɛ kpó. Lo ɔ́, sɛ́n énɛ́ lɛ́ɛ wɛ è nǎ xwedó kpowun ǎ. Togun ɔ́ ɖó ná yí wǎn nú Mawu Mavɔmavɔ kpó ayixa tɔn bǐ kpó. É ɖó ná nɔ gbejí nú akɔ e Mawu Mavɔmavɔ jɛ xá ɛ é. Ényí togun ɔ́ ɖó sísí nú akɔjijɛ énɛ́ ɔ́, Mawu Mavɔmavɔ ná xo ɖɛ dó jǐ tɔn; amɔ̌, ényí é má ɖó sísí ná ǎ ɔ́, kɛntɔ́ tɔn lɛ́ɛ ná ɖu ɖo jǐ tɔn. Wěma ɔ́ sín akpáxwé énɛ́ ɔ́ wú wɛ è ylɔ̌ wěma ɔ́ ɖɔ “Sɛ́nflínmɛ wéma”.
Đo wěma ɔ́ sín vivɔnu ɔ́, Mɔyízi mɔ ɖɔ kú émítɔn ko sɛkpɔ́. Énɛ́ ɔ́, é sɔ́ Jozuwée bɔ é jɛ tɛn tɔn mɛ. Mɔyízi ji han dó kpa Mawu ɖó ɖagbewiwa tɔn lɛ́ɛ wú. Énɛ́ ɔ́ gúdo ɔ́, é xo ɖɛ dó akɔta Izlayɛ́li tɔn wěwe lɛ́ɛ jí; é kú ma yi ayǐkúngban e sín akpá Mawu dó nú tɔ́gbó tɔn lɛ́ɛ ɔ́ jí. Amɔ̌, mǐ nɔ́ xa ɖɔ è kún sɔ́ mɔ gbeyíɖɔ Mɔyízi tɔn ɖɔhun ɖěbǔ ɖo Izlayɛ́li ó. Ɖó è ko wlán ɖɔ: Mawu Mavɔmavɔ kpó e kpó nɔ́ kpé nu bó nɔ́ ɖɔ xó (34.10). É wɛ nyi gbehwán sɛ́ dó Izlayɛ́li ví lɛ́ɛ ɖɔ:
“Izlayɛ́li, ɖǒtó: Mawu Mavɔmavɔ, Mawu mǐtɔn wɛ nyí Mawu ɖokpó géé e ɖe é. A nǎ yí wǎn nú Mawu Mavɔmavɔ, Mawu towe kpó ayi towe bǐ kpó, kpó lǐndɔ̌n towe bǐ kpó, kpódó hlɔ̌nhlɔ́n towe bǐ kpó.” (6.4-5)
Nǔ tají tají e ɖo wěma ɔ́ mɛ lɛ́ɛ
Xó nukɔn nukɔntɔn e Mɔyízi ɖɔ lɛ́ɛ:
É flín Izlayɛ́li sín tan togun ɔ́ (1.1—4.43)
Xó wegɔ́ e Mɔyízi ɖɔ lɛ́ɛ:
É flín Mawu Mavɔmavɔ sín sɛ́n lɛ́ɛ togun ɔ́ (4.44—28.68)
Xó gǔdo gúdo tɔn e Mɔyízi ɖɔ lɛ́ɛ:
Izlayɛ́li ɖó ná ɖó sísí nú akɔjijɛ Mawu Mavɔmavɔ tɔn (29—30)
Mɔyízi xo ɖɛ dó Izlayɛ́li ví lɛ́ɛ jí (31—33)
Mɔyízi kú (34)
Currently Selected:
Sɛ́nflínmɛ Xónusɔ́ɖóte: FONDC
Highlight
Copy
Compare
Share
Want to have your highlights saved across all your devices? Sign up or sign in
La Bible en langue fon © Alliance Biblique du Bénin, 2012.