Jean 8

Dinye ke d’uwe’n dè dingem ke rang’t

1Jésu tel aw dè mbal ke kage olivierge ndai tutu. 2Nè loo ke loo à ar ɓai ɓaa, è tel aw kêm kei’t le Nube. Kosdooge malang reei rann’t. E tête ra’n ndi nang unn gir ndó de nyan. 3Njékɔrgir gute-nduge se Pharisienge uwei dinye karé dè tò se dingem ke rang’t reei se’n undei nin non dooge’t malang. 4Go’t gugu ei edi Jésu edi nè:

– Njèndó dooge nyan, dinye nè nga d’uwe’n mêtch dè tò se dingem ke rang’t. 5Kêm magtub gute-ndu le jéi ke Moise ndang nga, è unn ndu’n ade jèi le tile dinyege ke titeke bè se kuberi her tɔl de kɔke. Ké tà ri á a i tam dè’t wa?

6Dé tam tàge nè nga titeke bè d’an-in’n kêm Jésu tede kile’n tà dènn’t. Nè è ule dè’n nang, tuje nyan nang se ngonn ji’n. 7Titeke njékɔrgir gute-nduge se Pharisienge deji Jésu tà ke kété kété nga, è in ndi dè rann’t ede de ede nè:

– Maje kade doo karé dann si’t ke ra majelé nja karé lé unn kuberi her ile’n dinye nè nga kété ade j’an-in.

8Jésu ule dè’n nang tel unn gir tuje nyan nang se ngonn ji’n. 9Loo ke dooge ooi tà nè bè ɓaa, in-in go nan’t mênênn-mênênn. Njé ke tɔgege kuwe ɔsi nang in-in kété ɓita njé ke rang uti go de ɓai. Jésu kuwe se kar’n bere á nain-in tà nan’t se dinye ke kété d’unde’n dann de’t nga. 10Loo ke Jésu ɔr dè’n dɔ ɓaa, è an doo ke rang karé lé. E deje dinye nè nga ede nè:

– Ké njé kile tà dèi’t nga ei ra wa? Ké doo karé bè géa ile tà dèi’t lé njing wa?

11Dinye nè ile jésu dè’t ede nè:

– Kuwe-ɓee, doo goto.

Nè Jésu tel ede’n ede nè:

– Man kuwe géa m’ile tà dèi’t lé tɔ. Ɔte aw loo lei. Nè unn gir’n ɗarinè ɓaa, i ra majelé kumi ke kété lé ta.]

Jésu è lookar le dooge dè nang nè

12Jésu tel unn tà tam ede doobulege ede nè:

– Man nga m’a m’ee lookar le dooge ke dè nang nè. Nanan ke unn rebe goom’t ɓaa à njiye dann loo ndul’t lé, nè à ndi dann lookar’t. Lookar nè nga, à ɔr non’n kaw se’n loo ndikumgajer se non.

13Pharisienge tami se Jésu edi nè:

– I tam tà ɔje’n dè rai i kuwe. Kɔrgo tà lei ke i ɔr nga, è kɔrgo tà ke get lé.

14Jésu tel ile Pharisienge dè’t ede nè:

– Né m’tam tà m’ɔje’n dè ra’m man kuwe géa, kɔrgo tà le’m man nga, è ngarankum kɔrgo tà kuwe tede m’ger loo ke m’in tutu á m’ree a, m’ger loo ke m’a m’aw ke tutu a tɔ. Nè sei ɓaa, i geri loo kin-in’m éké loo kaw’m lé a tɔ. 15Sei gangi tà se go kum kan loo le doo, nè man ɓaa, m’gangtà dè doo karé’t bè lé ɓai. 16Ke nè á m’gangtà géa, tà gang le’m è tà gang ke get tede man se kar’m lé nè Bɔ’m ke njèkule’m nga è se’m nan’t . 17Dé ndang kêm magtub gute-ndu’t le si d’ede nè: Ke nè á dooge joo ɔri tà ade aw go nan’t ɓaa, è ngarankum kɔrgo tà kuwe. 18Man m’ɔrgo tà m’ɔje’n dè’m man kuwe: Bɔ’m ke njèkule’m nga géa ɔrgo tà le’m tɔ.

19Pharisienge teli deji Jésu edi nè:

– Ké Bɔi nga è ra wa?

Jésu tel ile de dè’t ede nè:

– Sei geri man lé a, Bɔ’m géa i geri nin lé a tɔ. Ke nè á né i geri man ɓaa, ayé geri Bɔ’m nga tɔ.

20Jésu ndi ngɔr se ke kɔg-loo ngonm nar’t. E tam tàge nè nga loo ke ndi à ndó’n de nyan kêm kei le Nube. Nè doo karé bè géa uwe’n lé tede kàde’n le’n nain ɓai.

Jésu ede de tà tel kaw le’n ra Bɔn’t

21Jésu tel ede Pharisienge ɓai ede nè:

– M’a m’ɔte kaw, sei a sangi man pi, nè a weii dann kaiya’t le si. Loo ke m’a m’aw ke tutu nga, sei asikum kawi tutu lé.

22Juipge deji nan edi nè:

– Tam ke n’tanm n’ede nè: «Sei asikum kawi loo ke m’a m’aw tutu lé» nga, ké n’ee kuwe n’ayé tɔl rayé ta wa?

23Jésu tel ile de dè’t ede nè:

– Sei ɓaa, sei dooge ke dè nang nè, nè man m’in dɔ danrán. Sei ɓaa, sei le nang nè, nè man ɓaa m’ee le nang nè lé. 24Gir’n ke nè á kété m’ede’n sei m’ede nè a weii dann kaiya’t le si. Ke nè á umi kêm si dèm’t titeke man m’ee Krist nga lé ɓaa, a weii dann kaiyage’t le si kerɔte kuwe.

25Juipge teli deji Jésu edi nè:

– Ké i nga i nan wa?

Jésu tel ile de dè’t ede nè:

– Tà ke m’ede sei kété loo kunn gir’t kule’t le’m nga kuwe, m’nda dè’t njáng sár ɗarinè ɓai. 26M’aw se tàge ngain ke ɔji dè si le tam a, m’aw se tàge ngain le gang dè si’t a tɔ. Nè njèkule’m nga tam ngarankum tà. Tàge ke m’oo tann’t á m’ede dooge ke dè nang nè.

27Juipge geri titeke Jésu tam tà nè nga ɔje’n dè Bɔ’n lé. 28Jésu tel ede de ede nè:

– Loo ke ndɔn’t a i ɓeri Ngonn doo dɔ kàde kage-ke-dese’t pa ɓita a i geri titeke man nga m’ee Krist. Kêm ndɔn’t nè tá a i geri titeke man kuwe m’in se dè’m m’ra nyan karé lé, nè nyange ke Bɔ’m ndó’m á m’tam tà’n m’ede sei. 29E ke njèkule’m nga, è se’m nan’t. E inye’m se kar’m lé tede m’ra nyange ke taa kum’n se ndɔ’m-ndɔ’m.

30Dooge bule undei kêm de dè Jésu’t loo ke ndi à tam’n tàge nè.

Nganrankum ndi dè pal le ngannkà Abraham

31Jésu ede Juipge ke undei kêm de dènn’t ede nè:

– Ke nè á sei nain-in dann tà’t le’m ɓaa, sei njékuwe-girmge kerɔte kuwe. 32Sei a i geri ngarankum tà nga a, ngarankum tà nga ade a i ndii dè si pal a tɔ.

33Dé tel d’ede Jésu d’ede nè:

– Jè jè ngannkà Abraham. Ndɔ karé jè ra ɓer le doo ndan lé ɓai. Ké bain á i tam ede nè: J’a tel ndi dè jè pal wa?

34Jésu tel ede de ede nè:

– Kerɔte kuwe, man m’ede sei ndàt, nanan á ke inye ra’n nyein dann kaiya’t se ndɔ’n-ndɔ’n ɓaa, è ɓer le kaiya kuwe. 35Ɓer nga à ra ɓee se njénojege le’n sár se non lé. Nè ngonn ɓaa à ra ɓee se njénojege le’n sár se non. 36Ke nè á man Ngonn á m’ade i ndii dè si pal ɓaa, a i ndii dè si pal kerɔte kuwe. 37Sei ngannkà Abraham ade m’ger kuwe. Nè i sangi le kade dé tɔl’m tede tà le’m ke urkei kêm si’t lé. 38Man m’ede sei tà nyange ke m’an ra Bɔm’t, nè sei ɓaa, i rai nyange ke an-in ra bɔ si’t.

39Juipge teli edi Jésu edi nè:

– Kà jé jè nga è Abraham.

Jésu tel ede de ede nè:

– Ke nè á sei ngannkà Abraham kerɔte ɓaa, né ayé rai nyanra Abraham. 40Nè man njè kede sei ngarankum tà ke m’oo tà Nube’t nga, ɗarinè sei sangi kade dé tɔl’m. Abraham nga ndɔ ke ra nyan titeke bè lé. 41Nè sei i rai nyan ra bɔ si tcha-tcha.

Juipge teli edi Jésu edi nè:

– Jè nga, dé tò se nan ke kaiya’t á d’oje’n jè lé. Nè Nube kuwe karé bere luk-luk á è Bɔ jé.

42Jésu ede de ede nè:

– Ke nè á Nube è Bɔ si kerɔte ɓaa, né ayé tári man tede man m’in ra Nube’t á m’ree. E man kuwe m’in se dè’m m’ree lé, è è á ule’m ra si’t. 43Sei unni mbi si dè nyange ke m’ndó sei, gir’n ke nè á sei asikum ger girtàge le’m lé. 44Sei ɓaa, bɔ si ke le si è sú. Nyange ke ngur’n ra bɔ si pênn-pênn á sei ndigi rai. E nga, è njè tɔ koo dooge ká-ká, kété mari ke desêin sár tee ɓila. E nga, nda dè njann’t njáng dè ngarankum tà’t lé, tede ngarankum tà goto kêmn’t. Tà lanm ke è tam se ndɔge malang nga in-in kêm’n è’t kuwe tede è njè tà lanm a, è bɔ njé tà lanmge a tɔ. 45Nè man ɓaa, undei kêm si dèm’t lé tede ngarankum tà ke m’tam. 46Ké nan dann si’t asekum tɔje’m majelé ra’m wa? Ke nè á m’tam ngarankum tà ɓaa, ké bain á undei kêm si dèm’t lé wa? 47Nanan ke è le Nube ɓaa à ur mbi’n le koo’n tàge le Nube. Nè sei uri mbi si ooi tàge le Nube lé, tede sei sei lennge lé.

Jésu bòi dum dè Abraham

48Juipge teli deji Jésu edi nè:

– Tam ke jè tam kété j’ede nè i doo ke kêm ɓee-bò ke Samarie karè a, kumen tò kêmi’t a tɔ nga, ké è loon’t lé wa?

49Jésu ile de dè’t ede nè:

– Ḿ-m̀, kumen goto kêm’t. Man m’ile koje dè Bɔm’t, nè sei á ilei koje dèm’t lé. 50Man m’sang riɓar ke ɔje dè’m lé. Nè njèsang riɓar se njègangtà ke ɔje dè’m ndi non. 51Kerɔte kuwe, man m’ede sei ndàt, ke nè á doo karé an dè tà le’m sêw-sêw ɓaa, à wei ndan lé.

52Juipge edi Jésu edi nè:

– Ɗarinè jè ger titeke kumen tò kêmi’t kerɔte kuwe. Abraham wei ɓá, njéribe-dè-tàge ke tà Nube’t géa weii ɓá a tɔ. Nè i ɓaa i tam ede nè: «Ke nè á doo karé an dè tà le’m sêw-sêw ɓaa, yo à tɔl’n ndan lé.» 53Ké i nga i bòi i dum kà jé Abraham ke ndɔ wei nè nga wa? Njéribe-dè-tàge ke tà Nube’t ke ndɔ ke weii nga, ké i bòi i dum de wa? Ké i nga i ra rai ke nan wa?

54Jésu ile de dè’t ede nè:

– Ke nè á man kuwe m’ndi sang riɓar se dè ra’m ɓaa, riɓar le’m è nyan ke raikarè. Bɔ’m ke sei tami edi nè: «E Nube le si» nga á è njèkule ndubra dèm’t. 55Sei ɓaa i geri Nube lé, nè man ɓaa m’ger’n. Ke nè á m’tam m’ede nè m’ger’n lé ɓaa, m’ayé k’ee njè tà lanm titeke sei bè tɔ. Nè man ɓaa, m’ger’n, gir’n ke nè á m’an’n dè tà le’n sêw-sêw. 56Kà si Abraham nga ndɔ ke ra ranel kêmn’t tede le kan ndɔ ree le’m. Ndɔ ke è an ndɔ nè nga se kum’n a, ra ranel dè’t ngain a tɔ.

57Juipge deji Jésu edi nè:

– I nga, ɓali ase kɔr-mi lé ɓai, à ké an Abraham ra wa?

58Jésu ede de ede nè:

– Kerɔte kuwe, man m’ede sei ndàt, man m’ndi tutu kété ɓita kade d’oje kà si Abraham nga ɓai.

59Ke loon’t nè, Juipge ɔyi kuberi her raw tede le tile’n Jésu tɔl’n, nè è ɓɔyɔ ra’n dann doobulege’t unde loo njêl tee kêm kei le Nube aw.

Currently Selected:

Jean 8: GUL04

Highlight

Copy