Matthieu 17

Njékuwe-gir-Jésuge an-in nin dann ndubra’t le’n

(An-in Marc 9.2-13; Luc 9.28-36 tɔ)

1Loo ke ra ndɔ mute-mute ɓaa, è ɔr Pierre se Jacques se ngokon’n Jean njɔl aw se de se kar de bere dè mbal ke ngal lêng-lêng. 2Ke loon’t nè kuwe ra’n tel waks tàkum de’t. Tàkum’n ndoin kein-kein tite kàde a, kubuge ke rann’t tel nda káng-káng a, unji njai-njai tite lookar bè. 3An! ke loon’t nè kuwe, Moise se Elie teei hɔi ke ra de’t ndai ɔji tà se Jésu. 4Pierre ede Jésu ede nè:

– Kuwe-ɓee, è soo’t kade jè ndii loo ke nè’t kuwe ta. Ke nè á i ndige ɓaa, m’a ra kei kubu mute loo ke nè’t: karé lei a, karé le Moise a, karé le Elie a tɔ.

5Loo ke tà nain tà Pierre’t ɓai ɓaa, bum ke ndoin ree lirr utu dè de lêt. Ndu Nube ɓar dann bum’t nè nga, ede nè:

– E nè nga è Ngonn’m ke m’tár’n ngain a, ra’m nel’m dènn’t ngain a tɔ. Ooi tà tànn’t.

6Loo ke njékuwe-gir-Jésuge ooi tà nè nga bè ɓaa, ɓel unde de ndàt gang de ade tosoi, sebi kum de nang. 7Jésu ree ngɔr ke ra de’t ule de yêk-yêk ede nè:

– I ɓeli lé, in-in dɔ.

8Loo ke ei ɔri dè de dɔ ɓaa, ei an-in Jésu kuwe se kar’n bere á nda. 9Loo ke Jésu se njékuwe-girnge in-in dè mbal’t à risi nang ɓaa, Jésu unn ndu’n ade de ede nè:

– Nyan ke sei an-in nè nga, i tami tà’n adi doo karé ke rang oo lé sár kade man ke m’ee Ngonn doo m’unde’n loo m’tee’n dann njé ke koo’t.

10Njékuwe-gir-Jésuge deji nin edi nè:

– Ké bain á njéndang magtubge tami edi nè: Gar-gar Elie à tel ree kété ɓita Krist Ngonn doo à tel ree ɓai wa?

11Jésu tel ile de dè’t ede nè:

– E kum kuwe, nè gar-gar Elie à tel ree gɔl nyange malang kade tel tò loon’t gugu. 12Nè man m’ede sei titeke Elie nga tel ree ɓá ta, nè dooge geri nin lé a, rai se’n nyan titeke kêm de ndige lé a tɔ. Man ke m’ee Ngonn doo nga géa, d’ade ra se’m nyantosowur titeke bè tɔ.

13Njékuwe-gir-Jésuge geri titeke è tam tà nè nga ɔje’n dè Jean ke njèkule dooge manné njonm.

Jésu aje ngonn ke dingem ke kɔnon ra’n

(An-in Marc 9.14-29; Luc 9.37-43a tɔ)

14Loo ke Jésu se njékuwe-girnge reei teei ra doobulege’t ngɔr ɓaa, dingem karé aw ra Jésu’t ɔse keje’n nang nonn’t ede’n ede nè:

15– Kuwe-ɓee, an! kumtondoo le ngonn’m ke dingem nè nga kɔkrɔ karè. Ngonn nè kɔnon ra’n ndoo ngain. Dɔ-dɔ è toso poro a, toso manné a tɔ. 16M’ree se’n ra njékuwe-girige’t, nè asikum kɔri ratur nè nga rann’t lé.

17Jésu tel tam ede de ede nè:

– Sei njé kunn mbi dè tà’tge se njéndɔje lɔk-lɔkge. Ké m’a m’ndi se si ndɔ kandang ɓai wa? I reei se ngonn nè nga ke ram’t nè.

18Jésu ndáng ndil ke majelé nè nga ade unde loo tee kɔke kêm ngonn’t nè. Kum kàdenn’t nè kuwe, ratur ɔr dè ngonn’t nè nga kɔke. 19Loo ke Jésu nain se kar’n bere ɓaa, njékuwe-girnge agi meen-meen ke rann’t deji nin edi nè:

– Ke bain á tɔg jé ase rɔ ndil ke majelé nè nga kɔke lé wa?

20Jésu tel ede de ede nè:

– E tede kundekêm le si ke tin lé. Kerɔte kuwe, man m’ede sei ndàt, ke nè á kundekêm le si è tite kum kage Mutarde bè ɓaa, sei asikum kedi mbal nè kedi nè: «Ɔr rai loo ke nè’t kɔke aw i nda nú bè» ɓaa, mbal nè nga à ɔr ra’n se gir son’n bere kaw kuwe tɔ. Nyan karé bè ke à dum si goto. 21Nè ndil ke majelé ke tite è ke nè nga, ke nè á ɔgi kêm si ɓo ɔji tà se Nube lé ɓaa, sei asikum rɔ nin kɔke lé.

Jésu tel ede de tà kwei se kunde loo tee le’n dann njé koo’t

(An-in Marc 9.30-32; Luc 9.43b-45 tɔ)

22Ndɔ karé bè njékuwe-gir-Jésuge ɔsi nja nan kêm ɓeekon ke Galilée ɓaa, è ede de ede nè:

– Man ke m’ee Ngonn doo nga, nain ngɔr kade d’uwe’m d’ule’m ji dooge’t. 23Dooge à tɔli man nè ndɔ ke njèkon’t mute ɓaa, m’a m’unde loo tee dann njé ke koo’t.

Tà nè nga ade njékuwe-gir-Jésuge kêmkon ngain.

Kuge tir ke ɔje dè ra kei le Nube

24Loo ke Jésu se njékuwe-girnge reei teei kêm ɓee-bò ke Capernaum ɓaa, njétaa tirge ke ɔje dè ra kei le Nube osoi ra Pierre’t deji nin edi nè:

– Ké njèndó sei nyan à uge tir ke sile joo nga lé wa?

25Pierre ede de ede nè:

– Oiyo, à uge kuwe.

Loo ke è tel aw kêm kei ɓaa, Jésu unn tà kété deje’n ede nè:

– Simon, ké tàgir lei è bain dè tà’t nè wa? Ngarge ke dè nang nè nga, ké nanange á tanni nyan éké taai tir ji de’t wa? Ké tanni nyan éké taai tir ji ngann njéɓeege éké ji dooge ke dɔ’t wa?

26Pierre ile jésu dè’t ede nè:

– E ji dooge ke dɔ’t.

Jésu ede Pierre ede nè:

– Né è bè ɓaa, ngann njéɓeege ndii dè de pal karè. 27Nè né è bè géa , è tà le kade j’ilei de kage lé. Aw tà ba-bò’t ile kui. Kanje ke desêin ke a uwe’n nga, loo ke a i teen tà’n ɓaa, a inge nar ke kum sile sɔ. Ɔr i ree’n ade de tede le’m a, tede lei a tɔ.

Currently Selected:

Matthieu 17: GUL04

Highlight

Copy