Marc 15

D’uwe Jésu d’aw se’n non ngar Pilate’t

(An-in Matt 27.1-2,11-14; Luc 23.1-5; Jean 18.28-38 tɔ)

1Se ndɔgé ɓat loo ke kàde tee lé ɓai, maw njékuje nyan-mesege se ngatɔgege le Israelge se njékɔrgir gute-nduge, se gute njégangtàge ke rang malang ɔri nan tà dè nyan ke kum ra. Ei adi d’uwe Jésu dé tɔ’n d’aw se’n d’ule’n ji ngar Pilate’t. 2Pilate deje Jésu ede nè:

– Ké i a i ngar le kos Juipge nè wa?

Jésu ile Pilate dè’t ede nè:

– E kuwe i tam tài’t non.

3Maw njékuje nyan-mesege têti tàge bule undei tànn’t edi nè è ra nyange ke majelé ngain. 4Pilate tel deje Jésu ede nè:

– Ké oo tàge malang ke dé tête d’unde tài’t nè lé wa? Ké aw se tà karé bè le kile dè tàge’t nè nga lé sár wa?

5Nè Jésu tel ile Pilate dè tà’t nè nga lé njing ade tà ige Pilate sêl.

Ngar Pilate ule Jésu ji de’t le kade dé tɔl’n

(An-in Matt 27.15-26; Luc 23.13-25; Jean 18.39—19.16 tɔ)

6Se ɓal-ɓal loo ke d’ade ra nan Paque ɓaa, Pilate ɔr dangai karé ke doobulege deji nin inye’n dɔ ade de. 7Ndɔ ke dingem karé bè ke ri’n nè Barabbas tò dangai’t nan’t se madennge ke njékɔse tà se njékonɓeege. Loo ke ndɔ ke in-in ilei rɔ dè njékonɓeege’t nga, dingem nè tɔl doo karé kêm ndɔn’t nè. 8Dooge bule ɔsi nang in-in wum awi kêm kei le Pilate deji nin edi nè:

– Nyan ke i ra ade jè se ɓal-ɓal nga, i ra ade jè ɓila ta.

9Ngar Pilate ile de dè’t ede nè:

– Ké sei i ndigi le kade m’inye ngar le si sei Juipge nga dɔ m’ade sei ta wa?

10Pilate ger kêmn’t kété mbak titeke maw njékuje nyan-mesege rai jang se Jésu. Gir’n ke nè á ei uwei nin reei se’n, ulei nin jinn’t karè. 11Nè maw njékuje nyan-mesege umi tà kêm doobulege’t edi nè:

– I deji Pilate le kade ade d’inye Barabbas tá dɔ d’ade jèi.

12Pilate tel deje doobulege ede nè:

– A ɓaa, è ke sei Juipge i ɓari nin ngar le si nga, ké ri á i ndigi kade m’ra se’n tà wa?

13Doobulege unni gir rai nyan wuu-wuu edi nè:

– Ade dé ɓeré kàde kage-ke-dese’t.

14Pilate deje de ede nè:

– Ké majelé ri á n’ra wa?

Nè loo ke Pilate deje de tà nè bè ɓaa, dé tel dé ra nyan wuu-wuu d’ede nè:

– Ade dé ɓeré kàde kage-ke-dese’t ke ɓer kuwe bè.

15Pilate ndige le kade ra doobulege nel de. Gir’n ke nè á è ɔr’n Barabbas inye’n dɔ. E ade njérɔge undei Jésu se ndêin maru pa ɓita ule’n ji de’t le kade awi se’n ɓeri nin kàde kage-ke-dese’t ɓai.

Njérɔge ulei mbe dè Jésu’t

(An-in Matt 27.27-31; Jean 19.2-3 tɔ)

16Njérɔge awi se Jésu kêm geng’t le ngar ke bò loo ndi de’t. Ei ɓari gute njérɔ madedege ɔsi nja nan. 17Dé tɔr kubuge le’n ke rann’t kɔke ɓaa, d’ule’n kubu ke ker perm-perm a, dé pete jɔkɔ konn gêrêr d’ule dènn’t a tɔ. 18Go’t gugu njérɔge unni gir ra Jésu lapya edi nè:

– Ngar le Juipge, maje kade dèi mong káng-káng.

19Dé tunde dè Jésu se kage vbak-vbak a, dé tibe yoro kumn’t a, d’ɔse keje de nang nonn’t titeke d’ile koje dènn’t bè. Dé ra se’n nyange malang d’ade nan gute-gute. 20Loo ke njérɔge ulei mbe dènn’t ase de ɓá ɓaa, ei ɔri kubu ke ker perm-perm ke kété ulei rann’t nè nga kɔke tel ulei nin kubuge le’n rann’t gugu. Go’t gugu ɓita ei ndɔri Jésu awi se’n ngang loo’t nata le tɔl’n ɓai.

Njérɔge awi se Jésu ɓerii kàde kage-ke-dese’t

(An-in Matt 27.32-44; Luc 23.26-43; Jean 19.17-27 tɔ)

21Simon karé bè ke ɓee le’n è Cyrène. E bɔ Alexandre se Rufus. Loo ke è in kêm ngonn ɓee karé’t bè ree le dere ɓaa, njérɔge undei tɔg dènn’t le kade taa kage-ke-dese le Jésu oto. 22Dé ndɔr Jésu d’aw se’n kêl loo karé ke dé ɓar’n Golgotha: se tà koje jéi ɓaa è «Ngó non dooge.» 23Dé nan le kade Jésu yibe nduu ke pɔti nan’t se walé nyan karé ke ate ke ri’n nè myrrhe kade an-in. Nè è mbate sár. 24Njérɔge ɓeri Jésu kàde kage-ke-dese’t. Go’t gugu, ei turi jala dè kubuge’t le kan-in ké nan à unn kubu le’n ke non éké kubu le’n ke nè wa? Dé kai nan kubuge le Jésu ke rann’t nga titeke bè. 25Njérɔge ɓeri Jésu kàde kage-ke-dese’t se kade ke jisɔ-jimi ke se ndɔgé. 26Dé ndang tàge kêm begre nyan’t, dé ɓer dɔ dènn’t d’ɔr’n gir nyan ke ade dé ɓer’n kade kage-ke-dese’t nga d’ede nè: Doo nè nga, è «Ngar ke bò le Juipge.» 27Kêm ndɔn’t nè nga, dé ɓer njékaltàge tà gute-ndu’t joo kàde kage-dese’t kɔte Jésu’t. Dé ɓer è ke karé dè jikonn’t a, è ke karé dè jigeln’t a tɔ. 28Titeke bè á, tà ke dé ndang kêm Magtub’t le Nube d’ede nè: «Dé tute’n nan’t se njékaltàge tà gute-ndu’t» nga, aw loon’t deĵ. 29Dooge ke deri loon’t nè nga taji Jésu a, tugei dè de nêk-nêk a tɔ, edi nè:

– Kanm ke tutu. Hai! i njè tuju kei le Nube le tel ra rang kêm ndɔ mute bere nga, 30i kuwe aje yo i rise nang dè kage-ke-dese’t ade j’an.

31Maw njékuje nyan-mesege se njékɔrgir gute-nduge kuwe géa, ei tami dann de’t tulei mbe dè Jésu’t edi nè:

– N’ade njé ke rang aji yo, nè n’ee kuwe n’ase kaje yo lé. 32Krist ke è ngar ke bò le kosdooge ke Israel nga, gar-gar maje kade i rise nang ɗarinè kàde kage-ke-dese’t. Ke nè á è rise ade j’àn ɓaa, j’à j’unde kêm jé dènn’t kerɔte.

Njé ke dé ɓer de kàde kage-ke-dese’t kɔte Jésu nga géa taji nin ke le de a tɔ.

Tà Jésu tête nyonk dɔ kàde kage-ke-dese’t

(An-in Matt 27.45-56; Luc 23.44-49; Jean 19.28-30 tɔ)

33Kàde nda dann ɓee bɔp, loo unn gir tuge ndul bigm sár kàde mute ke tà loo sɔl’t. 34Loo ke kàde ke mute ke tà loo sɔl’t ase ɓá ɓaa, Jésu non se ndu’n ke bòi ede nè:

– Eloi, Eloi, lema sabachthani? (Gir’n nè: «Nube le’m, Nube le’m, ké bain á inye’m wa?»)

35Njé ke nange ke ndai loon’t ooi ndu Jésu nga tami edi nè:

– Ooi, n’ee nga n’non n’ɓar Elie kade dinyé.

36Doo karé dann de’t an-in ngɔde aw ule kann njan dann mann nduu’t ke mase njákr-njákr’t njonm. E ule kann njan nè nga tà káde nyan’t ree’n. E nan le kule tà Jésu le kade njibe. E tam ede nè:

– I nginei ade j’an-in, ké Elie à ree le kɔré kàde kage-ke-dese’t risé nang wa?

37Nè Jésu tel non se ndu’n ke bòi ɓerer ɓita tà’n tête nyonk ɓai.

38Tà kubu ke bòi ke dé gang’n gile kei ke tò se ninn’n le Nube danné joo nga, unn gir ribe dɔ sár oso’n nang banjang. 39Njèkan dè njérɔge ke aru karé ke nda tàkum Jésu’t an’n loo ke tà’n tête’n nyonk nga, è tam ede nè:

– Loo naje’n goto, doo nè nga è Ngonn Nube ke dagi kerɔte kuwe.

40Dinyege ke nange ndai heb an-in nyan ke d’ade ra se Jésu nga sêw-sêw. Marie ke ɓee le’n è Magdala, Salomé se Marie ke kon Jacques ke ndêin a, se Joses a tɔ, ei se de nan’t. 41Loo ke ndɔ ke Jésu nain kêm ɓeekon ke Galilée ɓai nga, dinyege nè danni nin loo kile mber’t a, ndiri nyan adi use a tɔ. Dinyege ke rang bule géa ndɔ ke danni nin awi se’n kêm ɓee-bò ke Jérusalem a tɔ.

Joseph ke Arimathée dubu ninn Jésu

(An-in Matt 27.57-61; Luc 23.50-56; Jean 19.38-42 tɔ)

42Ndɔ’n nè nga, è ndɔ kuwe dè nja nyan ra nan Paque. Loo ke nain ngɔr kade kàde ur ɓaa, 43Joseph, doo ke ɓee le’n è Arimathée, unde loo tee pan. Doo nè nga è balkum njégangtà le Juipge ke d’ile koje dènn’t ngain. Joseph nè ndi ngine ndɔ ke Nube ayé kon’n ɓee nga tchên. E njiye masas aw ra Pilate’t deje’n ninn Jésu. 44Kàde Pilate gete get-get dè ninn Jésu’t ade ule kule ɓar njèkan dè njèrɔge ke aru karè. Loo ke è ree ɓá ɓaa, Pilate deje’n ede nè:

– Ké Jésu nga tà’n tête ɓá kerɔte wa?

45Njèkan dè njérɔge ke aru karè ede ngar Pilate ede nè:

– Jésu wei ɓá kerɔte.

Pilate inye loo ade Joseph ɔr ninn Jésu kàde kage-ke-dese’t aw dubu. 46Joseph aw ndogo tà kubu ke nda káng-káng. E ɔr ninn Jésu kàde kage-ke-dese’t, um’n ngire, taɓai è aw unde’n kêm bolè mbal ke dé son kété mari. Go’t gugu ɓaa, Joseph ndubri kuberi mbal utu’n tà be ɓade. 47Marie ke ɓee le’n è Magdala se Marie ke kon Jacques ke ndêin ndai teri loo ke d’unde ninn Jésu tutu nga.

Currently Selected:

Marc 15: GUL04

Highlight

Copy