Génesis 14
14
Abram ta salba Lòt
1Den e tempu ei Amrafèl, rei di Shinar, Ariok, rei di Elasar, Kedar-Laomèr, rei di Elam, i Tidal, rei di Goim, 2tabata na guera ku sinku rei: Bèra, rei di Sódoma, Birsha, rei di Gomora, Shinab, rei di Adma, Shèmebèr, rei di Seboim, i rei di Bèla, un pueblo tambe konosí komo Soar. 3E sinku reinan akí a bini huntu den e vaye Sidim, kaminda awor akí Laman Morto ta. 4Diesdos aña largu Kedar-Laomèr a dominá e sinku reinan i den e di diestres aña e reinan akí a lanta kontra dje.
5E aña despues Kedar-Laomèr i e reinan ku tabata na su banda a bai den region di Ashtarot-Karnaim i einan nan a derotá e refaítanan; despues nan a derotá e zuzitanan na Ham i e emitanan na Shawe Kiriataim.
6Tambe nan a derotá e horitanan den e serunan di Seír kaminda nan tabata biba i a persiguí nan te El Paran ku ta keda na rant di desierto. 7Despues Kedar-Laomèr i su hendenan a regresá En-Mispat, yamá Kadesh tambe. Nan a destruí tur loke nan a topa den e region di e amalekitanan i a hasi meskos den e region Hason-Tamar kaminda e amoritanan tabata biba.
8Despues e reinan di Sódoma, Gomora, Adma, Seboim i Bèla a bini huntu den vaye di Sidim, 9pa nan sinku bringa kontra Kedar-Laomèr, Tidal, Amrafèl i Ariok, ku ta e reinan di Elam, Goim, Shinar i Elasar. 10Vaye di Sidim tabata yen yen di pos di breu. Ora e reinan di Sódoma i Gomora tabata hui, nan a kai den e posnan ei. E otro reinan a hui bai den seru. 11E reinan ku a gana e bataya a bai ku tur kuminda i kos di balor ku tabatin na Sódoma i Gomora. 12Tambe nan a bai ku Lòt, subrina di Abram, i tur loke e tabatin, komo Lòt tabata biba na Sódoma.
13E ora ei un hòmber ku a logra hui a bin konta Abram, e hebreo, loke a sosodé. E tempu ei Abram tabata biba banda di e palunan di ekel ku tabata di e amorita Mamre. Mamre i su rumannan Eshkol i Aner a yega di sera un pakto ku Abram. 14Ora Abram a tende ku nan a kohe su subrina prezu el a reuní e hòmbernan ku a nase serka dje i ku por a usa arma. Nan tabata 318 na tur. Ku nan el a sali persiguí e reinan te na e siudat Dan. 15Den anochi Abram i su hendenan a parti den grupo i Abram a derotá e reinan. El a persiguí nan te na Hoba, ku ta keda nort di e stat Damasko. 16El a bini bèk ku tur e rikesa ku nan a bai kuné. Asina Abram a logra regresá ku su subrina Lòt i rekobrá tur esaki su propiedat tambe. Tambe el a bini bèk ku e muhénan i tur sobrá hende.
Melkisedèk ta bendishoná Abram
17Ora Abram a bini bèk, despues di su viktoria riba Kedar-Laomèr i e otro reinan, rei di Sódoma a sali pa risibié den vaye di Shawe ku awor yama vaye di rei. 18Melkisedèk, rei di Shalem, ku tabata saserdote di Dios Altísimo, a trese pan i biña pa Abram. 19El a bendishoná Abram ku e palabranan:
‘Dios Altísimo,
Kreador di shelu i tera, bendishoná bo.
20Alabá sea Dios Altísimo
ku a entregá bo enemigunan den bo man.’
Abram a duna Melkisedèk un désimo parti di tur loke el a kita for di e reinan.#Hebreonan 5:6—7:17
21Rei di Sódoma a bisa Abram: ‘Duna mi e hendenan i abo keda ku tur kos.’ 22Pero Abram a kontestá: ‘Mi ta hura na SEÑOR, na Dios Altísimo, Kreador di shelu i di tera, 23ku mi no ta bai ku nada di bo, ni un pida hilu ni un strèp di sandalia, ya bo no por bisa despues ku ta abo a hasi mi riku. 24Mi no ke nada pa mi mes, ku no ta loke mi hendenan a gasta na kuminda. Tambe mi ke pa Aner, Eshkol i Mamre, ku a kompañá mi, haña nan parti di e botin.’
Currently Selected:
Génesis 14: PBDC13
Highlight
Share
Copy
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013
