Luki 20

1Gbe ɖokpó wá su, bɔ Jezu ɖo nǔ kplɔ́n mɛ lɛ́ɛ wɛ ɖo sinsɛnxɔ mɛ, bó ɖo Wɛn Ɖagbe Mawu tɔn jlá wɛ, bɔ vɔ̌sánú-xwlémawutɔ́gán lɛ́ɛ, kpódó sɛ́nkplɔ́nmɛtɔ́ lɛ́ɛ kpó, kpódó tomɛxó lɛ́ɛ kpó wá xwetɔ́n, 2bó ɖɔ n'i ɖɔ: “Đɔ acɛ e a ɖǒ, bó nɔ ɖo nǔ énɛ́ lɛ́ɛ wa wɛ ɔ́ nú mǐ; abǐ, ɖɔ mɛ e ná acɛ énɛ́ we ɔ́ nú mǐ.”

3Jezu ka yí gbe nú yě ɖɔ: “Nyɛ lɔmɔ̌ ma kan nǔ ɖokpó byɔ́ mi: 4mɛ̌ ká ná acɛ Jǎan, bɔ é wá lɛ yɛhwesin nú mɛ? Mawu wɛ a? Abǐ gbɛtɔ́ lɛ́ɛ wɛ? Mi ɖɔ nú má se.” 5Yě ká jɛ wě ɖe ɖo yěɖée tɛ́ntin jí ɖɔ: “Ényí mǐ yí gbe n'i ɖɔ Mawu wɛ ɔ́, é ná kanbyɔ́ mǐ ɖɔ: ‘Étɛ́wú mi ma ka ɖi nǔ nú Jǎan ǎ?’ 6Ényí mǐ ka yí gbe ɖɔ gbɛtɔ́ lɛ́ɛ wɛ ɔ́, to ɔ́ bǐ ná nyi awǐnnyaglo dó hu mǐ ná, ɖó mɛ bǐ wɛ nɔ mɔ Jǎan dó mɔ gbeyíɖɔ Mawu tɔn.”

7Énɛ́ ɔ́, yě gbɔ bó yí gbe ɖɔ émí kún tunwun mɛ e ná ɛ acɛ ɔ́ ó. 8Bɔ Jezu ɖɔ nú yě ɖɔ: “Hǔn nyɛ lɔ ɖo mɛ e ná acɛ mì bɔ un nɔ dó wa nǔ énɛ́ lɛ́ɛ na ɔ́ na ɖɔ nú mi wɛ ǎ.”

Jezu dó lǒ dó vǐwunzɔ́watɔ́ adǎnúwatɔ́ ɖé lɛ́ɛ wú

(Matíe 21.33-46; Maki 12.1-12)

9 Énɛ́ ɔ́ gúdo ɔ́, Jezu dó lǒ élɔ́ nú mɛ lɛ́ɛ ɖɔ: “Nya ɖé ɖó ayǐkúngban, bó dó vǐwun kɔn nyi jí, bó xáya nú vǐwunzɔ́watɔ́ ɖé lɛ́ɛ, lobo yi tomɛ xɔ azǎn. 10Ée vǐwun gbigbɛ hwenu wá su ɔ́, nya ɔ́ sɛ́ mɛsɛntɔ́ tɔn ɖokpó dó vǐwunzɔ́watɔ́ lɛ́ɛ gɔ́n, bónú é ná yi yí vǐwun étɔn wá n'i. Lo ɔ́, vǐwunzɔ́watɔ́ lɛ́ɛ xo e, bó nya ɛ asígbá alɔgbá. 11Nya ɔ́ lɛ́ wá sɛ́ mɛsɛntɔ́ ɖěvo dó, bɔ yě xo é lɔmɔ̌, bó ɖɔ nǔyá n'i, lobo nya ɛ asígbá alɔgbá. 12É lɛ́ wá sɛ́ mɛ atɔngɔ́ ɔ́ dó, bɔ yě gblé wǔ i, bó nya ɛ tɔ́n sín vǐwungbo ɔ́ mɛ. 13Nya ɔ́ wá ɖɔ dó xomɛ ɖɔ: ‘Nɛ̌ un ka ná wa gbɔn? Un ná sɛ́ vǐ ce vívɛ́ná ɔ́ dó kpɔ́n; afɔ nyɔ́ ɔ́, yě sixú ɖó sísí nú éyɛ́.’ 14Lo ɔ́, ée vǐwunzɔ́watɔ́ lɛ́ɛ mɔ ɛ ɔ́, yě ɖɔ ɖo yěɖée tɛ́ntin ɖɔ: ‘Vǐ e ɖo xu ɔ́ ná ɖu wɛ ɔ́ ɖíe. Mi nú mǐ ná hu i, bónú vǐwungbo ɔ́ ná húzú mǐtɔn.’ 15Bɔ yě dɔn ɛ tɔ́n sín vǐwungbo ɔ́ mɛ, bó hu i.” Jezu wá kanbyɔ́ ɖɔ:

“Nɛ̌ nya énɛ́ ɔ́ ka ná wa vǐwunzɔ́watɔ́ énɛ́ lɛ́ɛ sín nǔ gbɔn?” 16“É ná wá, bó ná hu vǐwunzɔ́watɔ́ énɛ́ lɛ́ɛ, lobo ná sɔ́ vǐwungbo ɔ́ dó alɔ mɛ nú mɛ ɖěvo lɛ́ɛ.” Ée mɛ lɛ́ɛ se mɔ̌ ɔ́, yě ɖɔ: “Mawu ní ma lɔn ó.” 17 Lo ɔ́, Jezu kpɔ́n yě bó ɖɔ: “Xó élɔ́ e è wlǎn dó Mawuxówéma ɔ́ mɛ ɔ́, ani ɖɔ wɛ é ka ɖe:

‘Awǐnnya e xɔmɛtɔ́ lɛ́ɛ ma sɔ́ dó mɔ nǔɖéwanú ǎ, bó xo nyi kɛ́n ɔ́, wá húzú awǐnnya e ɖo tají é.’

18Mɛɖěbǔ jɛ awǐnnya énɛ́ jí ɔ́, mɛ ɔ́ ná gba hánnyá; mɛ e jí awǐnnya ɔ́ ka ná jɛ ɔ́, é ná li i kpɔ́ɖɔ́kpɔ́ɖɔ́.”

È ɖo na sú takwɛ́ Dadá Hlɔ̌ma tɔn tɔn a?

(Matíe 22.15-22; Maki 12.13-17)

19Gan énɛ́ mɛ ɖokpó ɔ́, vɔ̌sánú-xwlémawutɔ́gán lɛ́ɛ kpódó sɛ́nkplɔ́nmɛtɔ́ lɛ́ɛ kpán ɖo lě e yě ná wa gbɔn, bɔ alɔ ná jɛ Jezu wú ɔ́ ba wɛ, ɖó yě tunwun ɖɔ émí nyi mǎ wɛ é ɖe; lo ɔ́, yě ɖo xɛsi ɖi nú togun ɔ́ wɛ. 20Yě ká wá jɛ Jezu cɔ́ jí, bó ɖó mɛɖé lɛ́ɛ n'i, nú yě ná yi ba gbe ɖo nu tɔn. Yě ná wa yɛ n'i ɖɔ émí ɖo gbejí nú Mawu, bó ná kan nǔ byɔ́ ɛ dó ɖó mɔ n'i, bó ná sixú wlí i ɖo xó ɖiɖɔ tɔn lɛ́ɛ mɛ, lobo ná jó e nú gǎn hwɛɖɔtɔ́ tokpɔn ɔ́ mɛ tɔn lɛ́ɛ. 21Mɛ énɛ́ lɛ́ɛ wá kanbyɔ́ Jezu ɖɔ: “Mɛ̌si, mǐ tunwun ɖɔ xó e a nɔ ɖɔ ɔ́ kpódó nǔ e a nɔ kplɔ́n mɛ ɔ́ kpan bǐ wɛ sɔgbe. A nɔ kpɔ́n mɛɖé sín nukúnta dó ɖɔ xó ǎ, bó ka nɔ xlɛ́ Mawu sín ali ɔ́ mɛ titewungbe. 22Đo sɛ́n mǐtɔn mɛ ɔ́, è hɛn ɔ́, è nǎ sú takwɛ́ Dadá Hlɔ̌ma tɔn tɔn a, abǐ è nǎ gbɔ súsú?”

23Jezu ka mɔ nǔ jɛ ayi e ɖó wɛ yě ɖe ɔ́ wú, bó ɖɔ nú yě ɖɔ: 24“Mi xlɛ́ gankwɛ́ Hlɔ̌manu lɛ́ɛ tɔn ɖokpó mì ma kpɔ́n;” bɔ yě xlɛ́ ɛ, bɔ é kanbyɔ́ yě ɖɔ: “Mɛ̌ ɖíe è ɖe ɖ'é jí e? Mɛ̌ sín nyǐkɔ ɖíe ɖ'é jí e?” Bɔ yě yí gbe n'i ɖɔ: “Dadá Hlɔ̌ma tɔn tɔn wɛ.” 25Bɔ Jezu ɖɔ nú yě ɖɔ: “Mi bó sɔ́ nǔ e nyí Dadá Hlɔ̌ma tɔn tɔn ɔ́ jó nú Dadá Hlɔ̌ma tɔn, bó sɔ́ nǔ e nyí Mawu tɔn ɔ́ jó nú Mawu.”

26Yě ká kpé wú, bó wlí i ɖo xógbe tɔn lɛ́ɛ ɖě mɛ ɖo mɛ lɛ́ɛ nukɔn ǎ. Xósin e é ná yě ɔ́ kpácá yě, bɔ yě gbɔ bó xwɛ.

Mɛkúkú lɛ́ɛ ná fɔ́n a?

(Matíe 22.23-33; Maki 12.18-27)

27 Sinsɛngbɛ́ e è nɔ ylɔ́ ɖɔ Saduseɛn lɛ́ɛ ɖě wǎ Jezu gɔ́n. (Yě wɛ nɔ́ ɖɔ mɛkúkú lɛ́ɛ kún ná fɔ́n ó). Yě kanbyɔ́ Jezu ɖɔ: 28 “Mɛ̌si, sɛ́n e Mɔyízi wlán ɖ'ayǐ nú mǐ ɔ́ ɖíe: ‘Ényí mɛɖé ɖó nɔví súnnu, bó da asi, lobo ma ka ji vǐ ǎ, bó kú jó asi ɔ́ dó ɔ́, nɔví tɔn ɔ́ ná sɔ́ asi ɔ́ da, bó ji vǐ ɖo xo tɔn mɛ, bó ná sixú ɖó donu nú nɔví tɔn e kú é.’ 29Nɔví nɔví tɛ́nwe ɖé lɛ́ɛ ka tíin. Mɛ nukɔntɔn ɔ́ da asi; é ka ji vǐ ǎ, bó kú jó asi ɔ́ dó, 30bɔ mɛ wegɔ́ ɔ́ sɔ́ asúkúsi ɔ́ da; élɔ́ ka ji vǐ ǎ, bó kú jó nyɔ̌nu ɔ́ dó; 31-32mɛ atɔngɔ́ ɔ́ lɔ wá sɔ́ asúkúsi ɔ́ da; élɔ́ ka ji vǐ ǎ, bó kú jó nyɔ̌nu ɔ́ dó. Mɔ̌ wɛ é nyí gbɔn nú nɔví nɔví tɛ́nwe énɛ́ lɛ́ɛ, bɔ yě bǐ kú ma ɖó vǐ donu; gǔdo gúdo ɔ́, nyɔ̌nu ɔ́ lɔ wá kú.” 33Hwenu e mɛkúkú lɛ́ɛ ná wá fɔ́n ɔ́, mɛ̌ sín asi wɛ nyɔ̌nu ɔ́ ka ná nyí ɖo yě mɛ tɛ́nwe lɛ́ɛ mɛ? Đó éɖíe ko nyí yě bǐ sín asi kpɔ́n e.

34Jezu yí gbe nú yě ɖɔ: “Súnnu kpódó nyɔ̌nu kpó e ɖo ayǐkúngban jí din lɛ́ɛ wɛ nɔ da asi, bó nɔ da asú. 35Lo ɔ́, mɛ e Mawu mɔ ɖɔ fínfɔ́n sín kú jɛ xá, bɔ yě ná nɔ gbɛ e jǎwe ɔ́ mɛ lɛ́ɛ sɔ́ na da asi ǎ, yě ká sɔ́ na da asú ǎ. 36Mɔ̌ jɛ́n yě ma sɔ́ sixú kú ǎ é nɛ́; ɖó yě ná cí wɛnsagun Mawu tɔn lɛ́ɛ ɖɔhun, bó ná nyí Mawu ví, ɖó yě fɔ́n sín mɛkúkú lɛ́ɛ mɛ. 37 Mɛkúkú lɛ́ɛ ná fɔ́n sín kú xó ɔ́ ɖɔ wɛ Mɔyízi ɖe ɖo sɛ́nwéma e ɖɔ xó dó zungodwe e ɖo zo ji wɛ ɔ́ wú ɔ́ mɛ; hwenu e é ylɔ́ Aklúnɔ ɖɔ Mawu Ablaxámu tɔn, Mawu Izáki tɔn, Mawu Jakɔ́bu tɔn ɔ́, mɛkúkú lɛ́ɛ ná fɔ́n xó ɔ́ ɖɔ wɛ é ɖe. 38Hǔn, Mawu ɔ́, é nyí Mawu mɛkúkú lɛ́ɛ tɔn ǎ; Mawu mɛ e ɖo gbɛ lɛ́ɛ tɔn wɛ é nyí; ɖó, ɖo Mawu nukɔn ɔ́, yě bǐ wɛ ɖo gbɛ.”

39 Sɛ́nkplɔ́nmɛtɔ́ ɖé lɛ́ɛ ka yí xó, bó ɖɔ nú Jezu ɖɔ: “Mɛ̌si, a ɖɔ xó ganjí.” 40Bɔ yě sɔ́ glá, bó kan nǔ ɖěbǔ byɔ́ Jezu ǎ.

Étɛ́ Klísu ka nyí nú Davídi?

(Matíe 22.41-46; Maki 12.35-37)

41Jezu ɖɔ nú yě ɖɔ: “Nɛ̌ è ka sixú ɖɔ Klísu ɔ́, Davídi ví wɛ é nyí gbɔn? 42 Đó Davídi ɖésú wɛ ɖɔ ɖo Ɖɛhanwéma tɔn mɛ ɖɔ:

‘Aklúnɔ ɖɔ nú Aklúnɔ ce ɖɔ: Jǐnjɔ́n ɖisí ce xwé,

43káká nú má sɔ́ kɛntɔ́ towe lɛ́ɛ

dó bló afɔɖótɛn towe.’

44Davídi nɛ́ ylɔ́ ɛ ɖɔ Aklúnɔ nɛ́; nɛ̌ é ka sixú lɛ́ nyí vǐ tɔn gbɔn?”

Jezu ɖɔ è nǐ cɔ́ mɛɖée dó sɛ́nkplɔ́nmɛtɔ́ lɛ́ɛ wú

(Matíe 23.1-36; Maki 12.38-40)

45Togun ɔ́ bǐ ɖo tó ɖó Jezu wɛ, bɔ é ɖɔ nú ahwanvú tɔn lɛ́ɛ ɖɔ: 46“Mi cɔ́ miɖée dó sɛ́nkplɔ́nmɛtɔ́ lɛ́ɛ wú, ɖó nǔ e nɔ víví nú yě lɛ́ɛ wɛ nyí ɖɔ: yě ní ɖo awu gaga mɛ, bó ɖo sa ɖi wɛ; è nǐ nɔ́ dó gbe yě ɖo tokplétɛn lɛ́ɛ; yě nɔ́ ba ná jínjɔ́n zinkpo nukúnɖéjí lɛ́ɛ mɛ ɖo kplɔ́ngbasá lɛ́ɛ, bó nɔ́ ba ná jínjɔ́n tɛn nukɔn nukɔntɔn lɛ́ɛ mɛ ɖo jǒnɔgbé.” 47Yě nɔ klá jɛ nǔ e nyí asúkúsi lɛ́ɛ tɔn é bǐ nu, bó ka nɔ́ ɖo ɖɛ gaga xo wɛ, bó ná dó ɖe xlɛ́ gbɛtɔ́ lɛ́ɛ ɖɔ mɛ ɖagbe wɛ émí nyí. Mawu ná dɔn tó nú yě, bɔ é ná syɛ́n ɖésú.

Asúkúsi wamamɔnɔ ɖé ná nǔ Mawu

(Maki 12.41-44)

Currently Selected:

Luki 20: Fon13

Highlight

Copy