Génesis 27
27
Yakob ta gaña Isak i kita bendishon for di Esou
1Isak a bira mashá bieu. Su bista a bai asina atras ku e no tabata mira mas. El a yama su yu mayó Esou i a bis'é: ‘Mi yu!’ Esou a kontestá: ‘Ata mi akí, Papa.’ 2Isak a sigui papia: ‘Bo mes ta mira ku mi ta bieu kaba i ku mi por muri un ora pa otro. 3Kohe bo bog i bo flechanan; bai yag den mondi i tira un bestia pa mi. 4Prepará un dushi kuminda manera mi gusta i tres'é pa mi kome. Ora mi kaba di kome mi ta bendishoná bo promé ku mi muri.’
5Rebeka a tende tur loke Isak a bisa Esou. Asina Esou a sali bai yag, 6Rebeka a bisa Yakob: ‘Awor ei mi a tende bo tata papia ku bo ruman Esou. 7El a bis'é: “Bai yag den mondi i tira un bestia pa mi; despues prepar'é pa mi kome. Ora mi kaba di kome mi ta bendishoná bo den presensia di SEÑOR, promé ku mi muri.” 8Wèl, mi yu, skucha bon loke mi ta bai bisa bo: 9“Bai kaminda e karné i e kabritunan ta i trese dos lamchi di kabritu pa mi. Wak pa nan ta gordo. E ora ei mi ta prepará un kuminda dushi manera bo tata gusta. 10Bo ta hib'é pa bo tata kome, ya e ta bendishoná abo promé ku e muri.” ’ 11Pero Yakob a bisa su mama: ‘Bo sa ku Esou su kurpa ta tur na kabei i di mi no. 12Si mi tata fula mi brasa, lo e haña sa ku mi ta purba nèk e i en bes di bendishoná mi lo e maldishoná mi.’ 13Pero su mama a kontest'é: ‘Laga e maldishon kai riba mi, mi yu. Awor tende di mi i bai buska e kabritunan.’ 14E ora ei Yakob a bai buska e kabritunan i a trese nan pa su mama. Rebeka a prepará un dushi kuminda manera e tata tabata gusta. 15El a kohe e mihó pañanan ku su yu mayó Esou tabatin na e kas ei i a laga su yu mas chikí Yakob bisti nan. 16El a tapa brasa i e parti di garganta di Yakob ku no tabatin kabei ku kueru di e kabritunan. 17Despues el a duna Yakob e kuminda dushi i e pan ku el a traha.
18Yakob a bai serka su tata i bis'é: ‘Papa.’ E tata a kontesta: ‘Ya; ta kua di mi yunan?’ 19‘T'ami, bo yu mayó Esou; mi a hasi loke bo a ordená mi. Lanta sinta pa papa kome karni di e bestia ku mi a yag, pa despues papa bendishoná mi.’ 20Isak a bisa su yu: ‘Kon bo a hasi hañ'é asina lihé?’ El a kontestá: ‘SEÑOR, bo Dios, a yuda mi.’ 21Isak a bisa Yakob: ‘Yega serka, mi yu; laga mi fula bo brasa pa mi sa sigur ku ta Esou bo ta.’ 22Yakob a hala serka. E tata a fula su brasa i a bisa: ‘E stèm ta stèm di Yakob, pero e mannan si ta man di Esou.’ 23E no a rekonos'é, pasobra Yakob su mannan tabata tur na kabei meskos ku di su ruman Esou. E ora ei Isak tabata dispuesto pa dun'é su bendishon. Tòg el a bolbe puntra: 24‘Bo ta mi yu Esou di bèrdat?’ Yakob a rospondé: ‘Sí!’ 25‘Sirbi mi, mi yu, ya mi ta kome karni di loke bo a yag, pa despues mi bendishoná bo.’ El a sirbi su tata e kuminda i a dun'é biña. Isak a kome i bebe. 26Despues el a bisa Yakob: ‘Bini mas serka i duna mi un sunchi, mi yu.’ 27Yakob a hala serka i a sunchi su tata. Ora Isak a sinti holó di su pañanan, el a bendishon'é ku e palabranan:
‘Sí! Holó di mi yu
ta manera holó di un kunuku ku SEÑOR a bendishoná.
28Dios duna bo serena for di shelu;
i hasi bo kunukunan fértil
ku trigo i wendrùif na abundansia.
29E pueblonan lo sirbi bo
i e nashonnan lo bùig pa bo.
Goberná bo mes rumannan;
desendiente di bo mama
lo bùig pa bo.
Esun ku maldishoná bo
lo ta maldishoná
i esun ku bendishoná bo
lo ta bendishoná.’#Génesis 12:3#Hebreonan 11:20
30Asin'ei Isak a bendishoná Yakob. Yakob no a kaba di sali serka su tata ku Esou a yega for di yag. 31E tambe a prepará un dushi kuminda, hib'é pa su tata i bis'é: ‘Lanta sinta, Papa, i kome karni di e bestia ku bo yu a yag pa bo, pa despues bo bendishoná mi.’ 32Isak a puntr'é: ‘Ken bo ta?’ El a kontestá: ‘Ta mi, Esou, bo yu mayó!’ 33Isak a spanta formal i a puntra: ‘Ta ken anto a tira bestia i a trese karni pa mi? Promé bo yega mi a kome tur loke el a trese i mi a dun'é mi bendishon. E ta keda ku e bendishon.’ 34Asina Esou a tende e palabranan di su tata el a dal un gritu di amargura i bisa: ‘Bendishoná mi tambe, Papa!’ 35Pero Isak a kontest'é: ‘Bo ruman a bin gaña mi i el a bai ku e bendishon ku mi tabatin pa bo.’ 36‘Ku rason e yama Yakob!’ Esou a grita. ‘Ya ta di dos bia ku e ta kohe mi kabes abou!#27:36 Mira nota na Génesis 25:26. Promé el a kita e derecho di yu mayó for di mi#Génesis 25:29-34 i awor el a kita mi bendishon. Bo no a keda ku ningun bendishon pa mi?’ 37Isak a kontestá: ‘Ya mi a duna Yakob poder pa manda riba bo; i tur su rumannan mi a hasi su sirbidó. Mi a dun'é hopi trigo i hopi wendrùif. Kiko mi por hasi pa bo awor, mi yu?’ 38Esou a insistí: ‘Papa, ta e bendishon ei so bo tin? Bendishoná ami tambe.’ I el a grita yora.#Hebreonan 12:17
39E ora ei Isak a bis'é:
‘Lo bo biba leu for di kunuku fértil
i leu for di serena di shelu.
40Di bo spada bo tin ku biba
i lo bo tin ku sirbi bo ruman.
Pero ora bo lanta formal kontra dje
lo bo kita su yugo for di bo skouder.’#Génesis 36:8; 2 Reinan 8:20#Hebreonan 11:20
Yakob ta hui pa Esou
41Pa motibu di e bendishon Esou a haña mal rabia riba Yakob. El a pensa: ‘Tòg mi tata lo no tarda pa muri, asina e muri mi ta mata mi ruman Yakob.’
42Ora a konta Rebeka loke Esou tabatin pensá, el a yama Yakob i bis'é: ‘Wak, mi yu, pa tuma vengansa bo ruman ke mata bo. 43P'esei tende mi. Hui mesora bai serka mi ruman Laban ku ta biba na Haran. 44Keda poko tempu serka dje te dia e mal rabia di bo ruman plakia. 45Ora su rabia kita i e lubidá loke bo a hasi kuné, mi ta laga buska bo. Pasobra mi no ke pèrdè mi dos yunan riba e mesun dia!’#Sabiduria 10:10 46Despues Rebeka a bisa Isak: ‘Mi ta fadá i kansá di e muhé hetitanan di Esou; si Yakob tambe mester kasa ku un muhé hetita di e tera akí, anto e ora ei mi no tin pakiko di keda biba mas.’
Currently Selected:
Génesis 27: BPK13
Highlight
Share
Copy
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013
