Mututo 14

Ba sila Liwate le Lifubelu

1Muñ'a Bupilo a li ku Mushe, 2“Bulelela Maisilaele kuli ba kutele kwamulaho, ba y'o tibelela fapil'a Pihahiroti, mwahal'a Migidoli ni liwate fapil'a Baale-Zefoni. Mu tibelele fapil'a munzi wo kwatuko a liwate. 3Faro u ka nahana kuli, ‘Maisilaele ba potoloha-potoloha mwa naha, ba kwalezwi ki lihalaupa.’ 4Ni ka tatafaza pilu ya Faro. U ta ba latelela, mi ni ta lumbwa ka ku tula Faro ni mpi ya hae kaufela. Maegepita ba ta ziba kuli ki na Muñ'a Bupilo.” Maisilaele kiha ba eza ka mo ne ba bulelezwi.

5Faro, mulena wa Egepita, h'a t'o bulelewa kuli sicaba si tobile, yena ni manduna ba hae ba cinca mihupulo ya bona, ba li, “Kanti lu ezizeñi? Lu tuhelezi batu ba Isilaele ba tobela butanga bwa bona.” 6Faro a lukisa koloi ya hae ya ndwa, mi a longana ni batu ba hae. 7Kih'a nga likoloi ze nde ze mianda ye silezi ni ze ñwi cwalo, za ya, li longile balwani kaufel'a zona. 8Muñ'a Bupilo a tatafaza pilu ya Faro, mi a lelekisa Maisilaele ba ba ne ba inzi mwa pabalelo ya Muñ'a Bupilo. 9Maegepita ni lipizi za bona kamukana, likoloi za Faro, bazamaisi ba zona, ni mpi ya hae, ba ba matela mane ba y'o ba swala fo ne ba tibelezi, ili kwatuko a liwate, fakaufi ni Pihahiroti fapil'a Baale-Zefoni.

10Faro a sutelela. Maisilaele ha ba y'o kumbuluka, ba bona Maegepita ba taha ku bona ba nze ba caula. Ba saba hahulu, mi ba huwa ku kupa tuso ku Muñ'a Bupilo. 11Ba li ku Mushe, “Kana ki kabakala ku tokwa mabita mwa Egepita ha u lu tisize mwa lihalaupa mo, kuli lu t'o shwela mwateñi, nji? Bona s'o ezize ka ku lu zwisa mwa Egepita! 12Kana ne lu si ka ku bulelela, pili lu si ka funduka, kuli ku ta ba cwalo? Lu ize, ‘U lu tuhele, lu be batanga ba Maegepita.’ Ku ne ku lukile ku ba batanga, ku fita ku t'o shwela mwa naheñi mo.”

13Mushe a alaba sicaba, a li, “Mu si ke mwa saba! Mu tiye lipilu, mi mu talimele mw'a ka mi piliseza kacenu Muñ'a Bupilo. Ha mu sa tola mu bona hape Maegepita bao be mu bona kacenu. 14Muñ'a Bupilo u ta mi lwanela. Mina mu itulele feela.”

15Muñ'a Bupilo a li ku Mushe, “Kiñi ha mu huweleza ku na cwalo? Bulelela Maisilaele kuli ba zamaye. 16Nanula mulamu wa hao, mi u otololele lizoho la hao fahalimw'a liwate kuli li kauhane, mi Maisilaele ba kone ku zamaya mwahal'a lona fa mubu o omile. 17Maegepita ni ta ba eza mahañi kuli ba ba latelele, mi ni ta lumbwa ka ku tula Faro, mpi ya hae kamukana, likoloi za hae, ni bazamaisi ba zona. 18Ha ni ka ba tula, kihona Maegepita ba ta ziba kuli ki na Muñ'a Bupilo.”

19Lingeloi la Mulimu, le ne li zamaya sicaba sa Isilaele fapili, la kutela kwamulaho a bona. Lilu le ne li ba etelela la tutela kwamulahw'a bona. 20La taha mwahal'a mpi ya Maegepita ni ya Maisilaele. Lilu la ba mwahali, mi la tisa lififi le lituna, mane limpi ze peli zeo za palelwa ku sutelelana busihu kaufela, mane kwa ba kwa sa.

21Mushe a otololela lizoho la hae fahalimw'a liwate, mi Muñ'a Bupilo a kauhanya liwate ka moya o mutuna wa kwa upa, o' fukile busihu kaufela, mi liwate la ba la fetuha mwa lundandala. Mezi n'a kauhanyizwe. 22#1 Bakor 10.1-2; Maheb 11.29 Maisilaele ba zamaya mwa lundandala, mwahal'a mamota a mezi kafa ni kafa. 23Maegepita ba ba lelekisa, mi ni bona ba kena mwa liwate ni lipizi za Faro kamukana, likoloi ni bazamaisi ba zona. 24Ku si ka patalala kale, Muñ'a Bupilo a talima mpi ya Maegepita a nz'a li mwa mulilo ni mwa lilu, mi a ba lyanganisa. 25A shokola mahutu a likoloi za bona, kuli li zamaye ka tata, mi Maegepita ba li, “A lu sabeñi Maisilaele, kakuli ba lwanelwa ki Muñ'a Bupilo ya lu hasanya.”

26Muñ'a Bupilo a li ku Mushe, “Otololela lizoho la hao fahalimw'a liwate, mi mezi a ta kwahela Maegepita, likoloi za bona, ni bazamaisi cwalo.” 27Mushe kih'a otololela lizoho la hae fahalimw'a liwate, mi lizazi ha li pazula mezi a kutela mw'a n'a inezi. Maegepita, ha ba li ba like ku saba mezi, kihona ba matela mwateñi, mi Muñ'a Bupilo a ba kasheza mwa liwate. 28Mezi a kuta, a kwahela likoloi, bazamaisi ba zona, ni mpi ya Faro kaufela ye ne ba latelezi mwa liwate, mane ku tokwisa ni wa lubandangoti. 29Maisilaele bona ba zamaya fa mubu o omile, mwahal'a mamota a mezi kafa ni kafa.

30Ka lona lizazi leo Muñ'a Bupilo a pilisa Maisilaele kwa Maegepita, mi Maisilaele ba ba bona ba nze ba tunumani fa munanga wa liwate, ba shwile. 31Ba bona ni maata a Muñ'a Bupilo mw'a ezelize kwa Maegepita, mi ba saba Muñ'a Bupilo. Ba ba ni sepo ku yena ni ku mutang'a hae Mushe.

Currently Selected:

Mututo 14: Lozi09

Highlight

Copy

Compare