Mututo 15

Pina ya Mushe

1 # Sin 15.3 Mushe ni Maisilaele kiha ba opelela Muñ'a Bupilo pina ye, ba li,

“Ni ta opelela Muñ'a Bupilo

kakuli u tuzi ka bulena.

U wiselize lipizi ni bapahami ba zona

mwa liwate.

2 # Lipi 118.14; Isa 12.2 Muñ'a Bupilo wa ni tiisa

ni ku ni matafaza.

Ki yena ya ni pilisize.

Ki Mulimu wa ka,

mi ni ta mu lumba,

Mulimu wa bo ndate, mi ni ta opela

butuna bwa hae.

3Muñ'a Bupilo ki mutabani.

Muñ'a Bupilo ki lona libizo la hae.

4“U nepezi likoloi ni mpi ya Faro

mwa liwate.

Manduna ba hae ba ba sepahala

ba minile mwa Liwate le Lifubelu.

5Ba apesizwe ki liwate le li tungile.

Ba tibile sina licwe.

6“Maata a lizoho la hao la silyo,

Muñ'a Bupilo, a komokisa!

Maata a lizoho la hao a lobaka sila

bubindi-bindi.

7Ka butuna bwa maata a hao u fenyize

lila za hao.

Buhali bwa hao bwa tuka,

mi bu ba cisa sina bucwañi.

8U futile, mi moya wa hao

u kubukanyize mezi.

Mezi a buba a yemi sina limota,

mi liwate le li tungile la tiya

mane ku y'o fita fa lilaho.

9Sila sa li,

‘Ni ta ba lelekisa, mi ni ta ba swala.

Ni ta aba liluwo la bona,

ni ba amuhe ze ni lata kaufela.

Ni ta zwisa sabule ya ka,

mi ka maata a ka, ni ta nga

ze ba na ni zona kamukana.’

10U futile hape, mi ba kwahezwi

ki liwate.

Ba tibile sina loto mwa mezi a sabisa.

11“Muñ'a Bupilo, ki mañi mwahal'a

milimu kaufela ya swana ni wena

kwa ku kena ko ku komokisa?

Ki mañi ya swana ni wena

kwa ku eza limakazo

ni likezo ze maata a sabisa?

12U nanuzi lizoho la hao la silyo,

mi lifasi li ba mizize.

13U etelezi ka lilato sicaba

s'o pilisize.

Ka maata a hao u si isize

mwa sibaka sa hao se si kenile.

14Macaba a utwile, mi a njanjiswa

ki sabo.

Ñalelwa ye swana ni ya butuku

bwa ku pepa i sweli Mafilisita.

15Cwale manduna ba Edomo

ba kalelilwe.

Banna ba Moabi ba ba maata

se ba kala ku ngangama.

Ya inzi mwa Kanana kaufela

u tula pilu.

16Sabo ni luwewe li ba wezi halimu.

Kabakala butuna bwa maata a hao,

ba se ba yemi ba kuzize sina macwe,

ku fitela batu ba hao ba fitelela,

Muñ'a Bapilo,

ku fitela bona batu ba hao luli ba

fitelela.

17U ta ba kenya ni ku t'o ba toma

fa Lilundu la hao,

fa sibaka s'o lukisize ku ba munzi

wa hao, Muñ'a Bupilo,

Tempele y'o ikahezi ka mazoho a hao,

Muñ'a Bupilo.

18Muñ'a Bupilo u ta busa kuya kuile!”

19Lipizi za Faro, likoloi za hae ni bazamaisi ba zona, ba keni mwa liwate, mi Muñ'a Bupilo a kutisa mezi, mi a ba kwahela. Haili Maisilaele, bona, ba sila liwate ba izamaela mwa mungulundu.

20Mupolofita wa musali, ya n'a bizwa Miriame, kaizel'a Aruni, a nga kalupa, mi basali kaufela ba t'o mu yema kwamulaho ba nze ba liza tulupa ni ku bina. 21Miriame a ba opelela, a li,

“Mu opelele Muñ'a Bupilo

kakuli u fenyize ka bulena.

U kashelize pizi ni mupahami

wa yona mwa liwate.”

Mawelu-welu a mezi a baba

22Mushe a fundula sicaba sa Isilaele ku zwa kwa Liwate le Lifubelu mi ba liba kwa Lihalaupa la Shuri. Ba zamaya mwa naheñi mazazi a malalu, ba sa fumani mezi. 23Cwale kiha ba t'o fita fa mawelu-welu a mezi a baba, kono ba palelwa ku a nwa kabakala ku baba kwa ona. Kikabakaleo ha n'a beilwe libizo la Mara. 24Batu ba bilaela ku Mushe, ba buza, ba li, “Cwale lu ta nwañi?” 25#Litu 38.5 Mushe a lapela ku Muñ'a Bupilo, mi yena a mu bonisa kakota. A ka nepela mwa mezi, mi mezi s'a fela ku baba.

Honafo Muñ'a Bupilo a ba fa mulao o tiile, mi hape i sa li honafo, a ba lika. 26A li, “Haiba mu ka ni utwa hande, na, Muñ'a Bupilo Mulimu wa mina, mi mu eza se ni bona kuli si lukile, mu mamela litaelo za ka ni ku buluka milao ya ka kamukana, ha ni na ku mi tiseza liziezi ze ne ni tiselize Maegepita, kakuli ki na Muñ'a Bupilo ya mi folisa.”

27Habusa ba t'o fita fa Elimi, fo ne ku na ni mawelu-welu a lishumi ka a mabeli ni linzalu ze mashumi a supile. Ba tibelela honafo, kwatuko a mezi.

Currently Selected:

Mututo 15: Lozi09

Highlight

Copy

Compare