Mututo 6

1Muñ'a Bupilo kiha s'a li ku Mushe, “Cwalehe, u ta bona se ni ka eza ku Faro. Ni ta mu hapeleza ku ba lukulula, mi ba ta ya. Hande-nde u ta hapelezwa ku ba lumelela ku zwa mwa naha ya hae.”

Pizo ya Mushe i kutelwa lwa bubeli

2 # Sim 17.1; 28.3; 35.11; Mut 3.13-15 Mulimu a bulelela Mushe, a li, “Ki na Muñ'a Bupilo. 3Ni iponahalize ku Abrahama, ku Isaka ni ku Jakobo, ni li Mulimu ya Maata Kaufela. Ha ni si ka izibahaza ku bona ka libizo la ka la Muñ'a Bupilo. 4Hape, ni isweli bulikani ni bona, ni nze ni ba sepisa kuli ni ta ba fa naha ya Kanana, ili naha mo ne ba pilile ba li bazwahule. 5Cwale ni utwile sitongo sa Maisilaele, ba ba ezizwe batanga ki Maegepita, mi ni se ni hupuzi bulikani bwa ka. 6Kabakaleo, u y'o bulelela Maisilaele, u li, ‘Ki na Muñ'a Bupilo. Ni ta mi lukulula mwa misebezi ya ku hatelelwa ki Maegepita, ye ba mi hapeleza ku eza. Ni ta mi pilisa kwa butanga bwa bona. Ka lizoho la ka le li maata, le li se li nanulezwi ku utwisa butuku, mina ni ta mi pilisa. 7Ni ta mi eza sicaba sa ka, na, ni be Mulimu wa mina. Mu ta ziba kuli ki na Muñ'a Bupilo, Mulimu wa mina, ya mi lukulula mwa misebezi ye tata ye mu hapelezwa ki Maegepita. 8Ni ta mi tisa mwa naha ye ni kile na sepisa ku i fa Abrahama, Isaka ni Jakobo. Ni ta mi fa yona, i be ya mina luli. Ki na Muñ'a Bupilo.’ ” 9Mushe a bulelela Maisilaele cwalo, kono ba hana ku teeleza, kabakala ku zwafiswa ki butanga.

10Muñ'a Bupilo kih'a li ku Mushe, 11“Zamaya, u y'o bulelela Faro, mulena wa Egepita, kuli a lumelele Maisilaele ku zwa mwa naha ya hae.”

12Kono Mushe a li ku Muñ'a Bupilo, “Cwale bona, Maisilaele kasibili ha ba sa ni kolwi, Faro bo, yena u ka ni kolwa cwañi, na, ni li lisafa kwa ku bulela?”

13Muñ'a Bupilo a laela Mushe ni Aruni ku y'o bulelela Maisilaele ni Faro, mulena wa Egepita, kuli ba laezwi ku zwisa Maisilaele mwa naha ya Egepita.

Masika a Mushe ni Aruni

14Ze ki zona litoho za masika a bona. Bana ba Rubeni, mweli wa Isilaele, ki Hanoki, Palu, Hezironi ni Kami. Masika a Rubeni ki ona ao. 15Bana ba Simioni ki Jemuele, Jamini, Ohadi, Jakini ni Zohare, ku t'o feleleza ka Saule ya n'a pepilwe ki musali wa Mukanana. Lo ki lona lusika lwa Simioni. 16#Lipa 3.17-20; 26.57-58; 1 Lita 6.16-19 Mabizo a bana ba Livi ni baikulu ba bona ki a. Ki Gerishoni, Kohati ni Merari. Livi yena a pila lilimo ze mwanda ni mashumi a malalu ka ze supile. 17Bana ba Gerishoni ki Libini ni Shimei, hamoho ni masika a bona. 18Bana ba Kohati ki Amirami, Izihari, Heberoni ni Uziele. Kohati a pila lilimo ze mwanda ni mashumi a malalu ka ze talu. 19Bana ba Merari ki Mahali ni Mushi. Ao, ki ona masika a Livi ni baikulu ba bona.

20Amirami a nyala Jokebedi, ndat'ahe wa musali, ya n'a pepile Aruni ni Mushe. Amirami a pila lilimo ze mwanda ni mashumi a malalu ka ze supile. 21Bana ba Izihari ki Kora, Nefegi ni Zikiri. 22Bana ba Uziele ki Mishaele, Elizafani ni Sitiri.

23Aruni a nyala Elisheba mwan'a Aminadabi, kaizel'a Nashoni. Yena a mu pepela Nadabi, Abihu, Eliazare ni Itamare. 24Bana ba Kora ki Asiri, Elikana ni Abiasafi. Ao ki ona masika a bana ba Kora. 25Eliazare, mwan'a Aruni, a nyala yo muñwi wa bana ba Putiele, mi a mu pepela Finehasi. Ze ki zona litoho za masika a Livi ka ku ya ka limba za bona.

26Bao, ki bona bo Aruni ni Mushe, b'a n'a ize ku bona Muñ'a Bupilo, “Mu y'o zwisa Maisilaele mwa naha ya Egepita, sitopa ka sitopa.” 27Ki bona ba ba bulelezi Faro, mulena wa Egepita, ku lukulula Maisilaele. Ki bona bo Mushe ni Aruni bao ba ba ezize cwalo.

Taelo ya Muñ'a Bupilo ku Mushe ni Aruni

28Muñ'a Bupilo a bulela ni Mushe mwa naha ya Egepita. 29A li, “Ki na Muñ'a Bupilo. U y'o bulelela Faro, mulena wa Egepita, ze ni ku bulelela kamukana.”

30Kono Mushe a li ku Muñ'a Bupilo, “Wa ziba kuli, na, ha ni sikwala kwa ku bulela. Cwale Faro u ka ni utwa cwañi?”

Currently Selected:

Mututo 6: Lozi09

Highlight

Copy

Compare