Mututo 7
7
1Muñ'a Bupilo a li ku Mushe, “Bona, ni ta ku fa maata mi Faro u ta ku talima inge mulimu. Muhulwan'a hao Aruni u ta bulela ni yena inge mupolofita wa hao. 2U ta taluseza Aruni ze ni ku laela kamukana, mi yena u ta bulelela Faro kuli a lumelele Maisilaele ku zwa mwa naha ya hae. 3#Lik 7.36 Kono ni ta mu eza mahañi. Ni ka eza limakazo ze ñata ze komokisa mwa Egepita. 4Nihakulicwalo, Faro h'a na ku mi utwa. Cwale ni ta nata naha, ni utwise Maegepita butuku, ni etelele limpi za ka, ili sicaba sa ka sa Isilaele, ku si zwisa mwa Egepita. 5Maegepita kihona ba ta ziba kuli ki na Muñ'a Bupilo, ha ni ka ba nanulela lizoho, ni ku zwisa Maisilaele mwa naha ya bona.” 6Mushe ni Aruni ba eza mw'a n'a ba laelezi Muñ'a Bupilo. 7Mushe n'a na lilimo ze mashumi a supile ka li li liñwi, mi Aruni n'a na ni ze mashumi a supile ka li li liñwi ka ze talu ha ba y'o bulela ni Faro.
Mulamu wa Aruni
8Muñ'a Bupilo a li ku Mushe ni Aruni, 9“Haiba Faro a ka li ku mina, ‘Mu lu bonise niti ka ku eza makazo,’ u bulelele Aruni, u li, ‘Latela mulamu wa hao fafasi, fa pil'a Faro, u fetuhe noha.’ ” 10Mushe ni Aruni ba ya ku Faro, mi ba y'o eza mw'a n'a ba laelezi Muñ'a Bupilo. Aruni a latela mulamu wa hae fapil'a Faro ni manduna ba hae, mi wa fetuha noha. 11Cwale Faro a biza batu ba hae ba ba butali ni ba mabibo, mi ka mabibo a bona ba eza cwalo ni bona. 12Ba latela milamu ya bona fafasi, mi ni yona ya fetuha linoha. Kono mulamu wa Aruni wa miza ya bona. 13Faro a itatafaza pilu, mi a hana ku lumela, sina mw'a n'a bulelezi Muñ'a Bupilo.
Mali
14 #
But 11.6-8
Muñ'a Bupilo kih'a bulelela Mushe, a li, “Faro u na ni mahañi hahulu. U hana ku lukulula sicaba. 15Zamaya, u y'o bonana ni yena kakusasana, h'a ya kwa Nuka ya Nile. U y'o mu litela fa munanga wa nuka. U lwale ni ona mulamu o n'o fetuhile noha. 16Mi u y'o li ku Faro, ‘Mulena, Mulimu wa Maheberu, u ni lumile ku t'o ku bulelela cwana, u li, Tuhela sicaba sa ka, si zamaye, si y'o ni lapela mwa lihalaupa. Kono ni ka nako ye ha u si ka lumela. 17#Sin 16.4 Cwale s'a bulela Muñ'a Bupilo ki se. U ta ziba kuli luli ki na Muñ'a Bupilo ka se ni ka eza. Bona, ni ka nata mezi a mwa Nile ka ona mulamu wo, mi a ta fetuha mali. 18Litapi li ta shwa, mi Nile i ta nunka maswe hahulu kuli mane Maegepita ba palelwe ku nwa mwateñi.’ ”
19Muñ'a Bupilo a li ku Mushe, “Bulelela Aruni, u li, ‘Nanulela mulamu wa hao fahalimw'a mezi kaufela a mwa Egepita, ili linuka, maabwa, ni masanyana. Mezi a ta fetuha mali, mi naha kamukana i ta ba mali feela, mane ni mwa litubana ni mwa linkwana za batu.’ ”
20Mushe ni Aruni ba eza mw'a n'a ba laelezi Muñ'a Bupilo. Mwa meeto a Faro ni manduna ba hae, Aruni a nanula mulamu wa hae, a nata fa Nile, mi mezi a yona kamukana a fetuha mali. 21Litapi za shwa mwa Nile mi mezi a nunka maswe mane Maegepita ba palelwa ku a nwa. Kwa ba ni mali kai ni kai mwa Egepita. 22Ba mabibo ba mwa Egepita ba eza cwalo ni bona ka mabibo a bona, mi Faro a itatafaza pilu ku fita pili. H'a si ka teeleza bo Mushe ni Aruni, sina mw'a n'a bulelezi Muñ'a Bupilo. 23Faro a kutela mwa Kwandu a sa li zoteli ni hanyinyani. 24Maegepita kaufela ba yepa liliba fa munanga wa Nile kuli ba fumane mezi a ku nwa, kakuli ne ba sa koni ku nwa mezi a mwa nuka.
25Kwa fela mazazi a supile Muñ'a Bupilo ha s'a natile Nile.
Currently Selected:
Mututo 7: Lozi09
Highlight
Copy
Compare
Share
Want to have your highlights saved across all your devices? Sign up or sign in
Lozi Interconfessional Bible, Catholic Edition © Bible Society of Zambia, 2009.
