Mututo 9

Lifu la lifolofolo

1Muñ'a Bupilo a li ku Mushe, “U ye ku Faro, mi u y'o li ku yena, ‘S'a bulela Muñ'a Bupilo, Mulimu wa Maheberu, ki se, u li, Lukulula sicaba sa ka, si y'o ni lapela. 2Mwendi u ka si hanisa hape ku zamaya, ni ku si tibela. 3Ha mu ta eza cwalo, ni ta ku utwisa butuku ka ku kulisa lifolofolo za hao, ili lipizi, limbongolo, likamele, likomu, lingu ni lipuli. 4Ni ta kauhanya mwahal'a lifolofolo za Maisilaele ni za Maegepita, mi ha ku na simunanu sa Maisilaele se si ta shwa. 5Muñ'a Bupilo u tomile nako. U ize, u ka eza cwalo kamuso.’ ”

6Habuso Muñ'a Bupilo a eza mw'a n'a bulelezi, mi limunanu za Maegepita kamukana za shwa, kono ne ku si na nihaili i liñwi feela ye ne shwile ku za Maisilaele. 7Faro a buza se si ezahalile, mi a utwa kuli kwa limunanu za Maisilaele ha ku si ka shwa nihaiba i liñwi feela. Kono Faro a itatafaza pilu, mi a hana ku lukulula sicaba.

Litombo

8Muñ'a Bupilo a li ku Mushe ni Aruni, “Mu ñwate mulola fa liyonga ka mazoho, mi Mushe a y'o u nepela mwahalimu fapil'a Faro. 9U ta hasana sina lilulinyana feela mwa naha kamukana ya Egepita, mi u ka tahisa litombo ze ta ba mambongola kai ni kai, kwa batu ni kwa lifolofolo.” 10#Sin 16.2 Cwale ba nga mulola fa liyonga, mi ba y'o yema fapil'a Faro. Mushe a u nepela mwahalimu, mi wa tisa litombo kwa batu ni kwa lifolofolo. 11Ba mabibo ba palelwa ku taha fapil'a Mushe kakuli ne ba tezi litombo sina Maegepita ba bañwi kaufela. 12Kono Muñ'a Bupilo a tatafaza pilu ya Faro, mi yena a hana ku ba lukulula, sina yena Muñ'a Bupilo mw'a n'a bulelezi Mushe.

Simbwewewe

13Muñ'a Bupilo a li ku Mushe, “Kamuso i sa li kakusasa, u pakelele ku Faro, mi u y'o li ku yena, ‘S'a bulela Muñ'a Bupilo, Mulimu wa Maheberu, ki se, u li, Lukulula sicaba sa ka, si zamaye, si y'o ni lapela. 14Hakusicwalo, butata kaufela ni ta bu libisa ku wena kasibili, kwa manduna ni batu ba hao, ili kuli mu zibe kuli ha ku na ya swana ni na mwa lifasi kamukana. 15Kambe ne ni nanuzi lizoho la ka ku ku nata ka butuku, wena ni batu ba hao, kambe mu felile mbuu kaufel'a mina. 16#Baro 9.17 Kono ni sa mi pilisize kuli mu bone maata a ka, mi butumo bwa ka bu hasane mwa lifasi kamukana. 17Kono nihakulicwalo, u sa ikuhumusa ka sicaba sa ka, mi u hana ku si lukulula. 18Utwahe, kamuso ka yona nako ye, ni ta nelisa simbwewewe, se si si ka bonwa kale mwa Egepita haisali naha i tomwa. 19Cwale u fe taelo ya kuli limunanu, ni ze mu na ni zona fande li beiwe mwa mukunda. Simbwewewe si ta wela batu ni lifolofolo kaufela ze si ka silelezwa, mi li ta shwa kamukana.’ ” 20Manduna ba bañwi ba Faro ba saba kabakala s'a n'a bulezi Muñ'a Bupilo, mi ba kenya batanga ba bona ni limunanu za bona mwa mandu. 21Nihakulicwalo, ba bañwi ha ba si ka isa pilu ku ze ne bulezwi ki Muñ'a Bupilo, mi ba tuhela batanga ba bona ni limunanu fande.

22Muñ'a Bupilo kih'a li ku Mushe, “Nanulela lizoho la hao kwahalimu, mi simbwewewe si ta wela mwa naha kamukana ya Egepita, fa batu, lifolofolo ni fa licalo kaufela ze mwa masimu.” 23Cwale Mushe a nanulela mulamu wa hae mwahalimu, mi Muñ'a Bupilo a lumela mishika ni simbwewewe, mi lumonyi lwa pula lwa t'o fita fafasi. Muñ'a Bupilo a nelisa simbwewewe mwa Egepita. 24#Sin 8.7; 16.21 Kwa ba ni liñungwa le lituna ni simbwewewe, mi mamonyi a benya kafa ni kafa. Ya ba liñungwa le li maswe le li si ka bonwa kale mwa Egepita haisali i ba sicaba. 25Simbwewewe sa bulaya lika kamukana ze ne li li fande mwa Egepita kaufela, i ka ba batu kamba lifolofolo. Sa wisa licalo kamukana mwa masimu, mi sa yendula likota kaufela. 26Mwa sibaka sa Gosheni, mo ne ba pila Maisilaele, ki mona feela mo ne ku si na simbwewewe.

27Faro a biza Mushe ni Aruni, mi a li, “Nako ye ni ikutwa kuli ni fosize. Muñ'a Bupilo u lukisize. Haili na, ni batu ba ka, lu fosize. 28Mu lapele ku Muñ'a Bupilo! Ku likani, lu se lu katezi ka mishika ye ni simbwewewe. Ni sepisa ku mi lukulula. Mu zamaye. Mu si ke mwa sinya nako.”

29Mushe a li ku yena, “Ni sa zwa feela mwa hae, ni ta nanulela mazoho a ka ku Muñ'a Bupilo. Mishika i ta kuza, mi ha ku sa na ku ba ni simbwewewe. Kihona u ta ziba kuli lifasi ki la Muñ'a Bupilo. 30Kono ni ziba kuli wena, ni manduna ba hao, ha mu si ka saba kale Mulimu Muñ'a Bupilo.”

31Makuku ni lico ze buzwa kapili za sinyeha, kakuli lico zeo ne li se li buzwize, mi makuku n'a s'a tubuzi. 32Kono buloto ni mabele zona, ha li si ka sinyeha, kakuli ne li si ka buzwa kale.

33Mushe a siya Faro, mi a zwela kwa mandamino. Ka tapelo a nanulela mazoho a hae kwahalimu ku Muñ'a Bupilo, mi mishika ni simbwewewe za fela, mane ni yona pula ya sa. 34Faro h'a bona kuli pula, simbwewewe ni mishika li felile, a fosa hape, mi a ina cwalo ni manduna ba hae. 35Ka mahañi a hae, h'a si ka lumelela Maisilaele ku ya, sina mw'a n'a bulelezi Muñ'a Bupilo ka Mushe.

Currently Selected:

Mututo 9: Lozi09

Highlight

Copy

Compare