Simuluho 20

Abrahama ni Abimeleke

1Abrahama a zwa mwa Mamare, mi a tutela mwa naha ya Negebe, mi a y'o yaha mwahal'a Kadeshi ni Shuri. N'a pila mwa Gerari. 2#Sim 12.13; 26.7 Mwateñi n'a ize musal'a hae Sara ki kaizel'a hae. Cwalehe, Abimeleke mulena wa Gerari a y'o nga Sara, a mu tisa ku yena. 3Ka bona busihu bo, Mulimu a iponahaza ku yena kwa buloko, mi a li, “U ta shwa kakuli Sara ki musali ya nyezwi.”

4Kono Abimeleke n'a si ka kena kwa likubo za hae kale. Kih'a li, “Mulena, kana u ta bulaya mutu ya si ka fosa? 5Abrahama u ize, ‘Ki kaizel'a ka,’ mi ni yena kasibili u ize, ‘Ki muhulwan'a ka.’ Ni ezize cwalo ka lizwalo le li lukuluhile, mi ha ni si ka fosa.”

6Mulimu a mu alaba, i sa li kwa buloko, a li, “Ee, na ziba kuli u ezize cwalo u nz'o lukuluhile mwa pilu. Kikabakaleo ha ni ku silelelize kwa ku ni fozeza ka ku sa mu swala. 7Kono cwale, kutiseza musali yo ku munn'a hae. Ki mupolofita. U ta ku lapelela kuli u si ke wa shwa. Kono, ha u sa mu kutisi, na ku lemusa kuli u ta shwa, wena ni lubasi lwa hao kaufela.”

8Habusa, i sa li kakusasa, Abimeleke a biza batanga ba hae kamukana, a ba taluseza lika zeo kaufela, mi ba saba hahulu. 9Abimeleke kiha s'a biza Abrahama mi a mu buza, a li, “U lu ezize cwañi? Kanti se ni ku foselize ki sika mañi kuli mane u be u ni kenye mwa ziezi-tuna yeo, na, ni mubuso wa ka? Ha ku na mutu ni yo mukana ya n'a ka eza s'o ezize wena. 10Kiñi ha u ezize cwalo?”

11Abrahama a alaba, a li, “Ne ni hupula kuli kwanu ha ku na ya saba katulo ya Mulimu, ni kuli ba ka ni bulaya, mi ba ikungele musal'a ka. 12Ki kaizel'a ka luli. Ki mwan'a bo ndate, kono bo m'ahe ki ba sili. Kiha ni mu nyezi. 13Cwale Mulimu ha s'a ni zwisa haesu ku ni lumela mwa manaha a sili, ni mu bulelezi, ni ize, ‘U kona ku bonahalisa busepahali bwa hao ku na ka ku n'o bulelanga ko lu ka ya kaufela, kuli ni muhulwan'a hao.’ ”

14Cwale Abimeleke kiha s'a kutiseza Sara ku Abrahama munn'a hae, mi i sa li hona fo, a mu fa hape ni lingu, likomu ni batanga. 15A li ku Abrahama, “Naha ya ka kamukana ki ye. U ikahele k'o lata kaufela.” 16Ku Sara a li, “Ni fa muhulwan'a hao muwaya-waya wa silivela o eza sikiti, ili sisupo ku b'o ina ni bona kaufela kuli ha u na mulatu. Mutu kamukana u ta ziba kuli ha ku na s'o fosize.”

17Cwale Abrahama a lapelela Abimeleke, mi Mulimu a mu folisa. A folisa cwalo ni musal'a hae, hamoho ni batanga ba hae ba basali, mi ba kala ku pepa. 18Mulena n'a kwalile lupepo lwa basali kamukana ba ba mwa ndu ya Abimeleke, kabakala se ne si ezahalile ku Sara, musal'a Abrahama.

Currently Selected:

Simuluho 20: Lozi09

Highlight

Copy