Tsutɨarika 18
18
Yawé 'Apɨrahami kemɨtitaxatɨa nunutsi
1Merikɨtsɨ Yawé kaniuyuhekɨata 'Apɨrahami hetsɨa Mamɨre makuxiuyatsie, 'Apɨrahami 'ixuriki kiiyari hɨxie 'uxipiekaku tuka 'uxɨkakaku. 2Hikɨ 'Apɨrahami kepauka manukunierixɨ, yuhaikame 'ukitsi kaniwaruxeiya yateewa meti'ukame. Waruxeiyaka kaniutanautsa yuxamaru hɨxie tikeka watahɨaweke. Wahɨxie 'utihɨximakeka, 3mɨpaɨ kaniutayɨni:
—Neti'aitɨwame, xɨka yapera'eriwani, yemekɨ nepɨmatsiwawirie ne'aurie xeikɨa pemɨka'uyeyeikanikɨ. 4Haa nepɨta'aita kɨmana yu'ɨkate xemɨtihauxinikɨ, 'anake xepɨka'uxipieni 'ikɨ kɨye 'etɨpiwari hetɨa. 5Tixe'uximayatsiriwame manukatsie xemɨye'axɨakɨ, 'ikwai nekanita'aitamɨkɨ 'aixɨa xeteheu'erietɨ xemɨyehukɨ kexemɨtehu.
Mɨkɨ mɨpaɨ mekaniutiyuani:
—Kamɨtsɨ 'aixɨa pɨ'ane, mɨpaɨ ketineuyuri.
6'Apɨrahami kaneyani yapauka Tsara 'ixuriki kiiyarita, hikɨ mɨpaɨ Tsara katiniutahɨawe:
—Mexɨiwa 'aixɨa. Harina 'aixɨa mɨ'ane xeitewiyari kiruyari keneuhawiya, paa keneutiwewi.
7Meta 'Apɨrahami kaneyani 'unautsarɨmetɨ hakewa tewaxi memeyenakai, muwa xeime tsikeru kaniwayehana waiyakame waiyarieya mɨkatse'i, ti'uximayatame kaniyetuirieni, mɨkɨta mexɨima kanitawarɨka. 8Hikɨ katiniwarumini kunerekɨ retsikɨ meta tsikeru warɨkariyarikɨ. Kepauka memɨtekwakai 'Apɨrahami kɨyetɨa kaniuwekaitɨni wa'aurie.
9—¿Hakewari 'a'ɨya, Tsara?
'Apɨrahami mɨpaɨ katiniwaruta'eiya:
—Huma payeka 'ixuriki kiiyarita.
10Hikɨ xewitɨ mɨpaɨ katinitahɨawe:
—Xeiwiyari 'anuyeyayu tawarita nepɨmatsiha'iwatamie, 'ana 'a'ɨya Tsara nunutsi kanexeiyakamɨkɨ.
Tsara kanita'enakaitɨni yu'ixuriki kiiyari hɨxie, mɨyamɨtikuxatakai waritana yateewa pɨti'enakai. 11'Apɨrahami Tsara hamatɨa mepɨ'ukirawetsixitɨkai, Tsara mɨtihukata pɨkayɨwekairi. 12'Ayumieme, Tsara kaniutananeni mɨpaɨ tiku'eriwatɨ: «Pɨkayɨwe nemuyutemawieka mɨyamɨraniuwakɨ, neri 'ari nepɨkayɨwe, nekɨnatari pɨ'ukiratsi». 13Hikɨ Yawé mɨpaɨ 'Apɨrahami katiniutahɨawe:
—¿Titayari Tsara tiutanawe? ¿Kamɨtsɨ yurikati'erie mɨtiniwenikɨ mɨyayumaitɨ? 14¿Kamɨtsɨ Yawé hepaɨtsita tixaɨtɨ tixuawe katiyɨwetɨ? Yurika nekanayenemɨkɨ 'epauka, 'ana Tsara nunutsi kanexeiyakamɨkɨ.
15Tsara kaniutimani, katini'itaiya mɨpaɨ katinitahɨawe:
—Nematsi nepɨka'utanawekai.
Peru Yawé tawarita mɨpaɨ katinitahɨawe:
—Huu, peputananai.
'Apɨrahami tsurumatari kemɨtiwawikweitsitɨamɨkɨkai
16Hikɨ mekananuku'uni 'iwatamete mekanekɨne Tsuruma hepatsie. 'Apɨrahami wahamatɨa kaneyani waretateutɨanike. 17Yawé mɨpaɨ katiniku'eriwakaitɨni: «¿Nekapɨtitaxatɨani 'aumɨ 'Apɨrahami kenemɨtiyurieni? 18'Apɨrahami nuiwarieya mariwetɨ payani meta tɨrɨkaɨyetɨ, mɨkɨ kɨmana yunaitɨ nuiwarite kwiepa memɨtama 'aixɨa mepɨ'itɨarieni. 19Ne nepenayexei yuniwema muwata'ɨxatsitɨanikɨ meta watɨɨriyama, Yawé huyeya'utɨa memuhunikɨ, yamemɨteyuriekakɨri tita 'aixɨa mɨti'ane tita mɨtiheitserie. Hikɨ mɨpaɨ me'anekaku Yawé pɨraye'atɨani 'Apɨrahami kemɨtiutahɨawixɨ».
20Hikɨ 'ayumieme Yawé 'Apɨrahami mɨpaɨ katiniutahɨawe:
—Nepɨka'inewieri hiwerika Tsuruma Kumuxa wahepaɨtsita mieme, waɨkawa 'axamepɨteyurie. 21'Ayumieme nepɨnierimie, xɨka 'aku yuritɨni 'axamete'u'iyarini kememutiyuane memutitsuana, yatɨ pɨtikatixaɨ nekatinetimaimɨkɨ.
22Yuhutatɨ 'iwatamete xeikɨa mekanekɨne Tsuruma, 'Apɨrahami 'akuxi kaniuyuhayewa Yawé hamatɨa. 23Hikɨ 'Apɨrahami Yawé hɨxie hurawa kaniuyani mɨpaɨ katinitahɨawe:
—¿Kamɨtsɨ yurikɨ petika'una heitseriemekɨ yamɨtikamie 'axamɨtiyuriene hamatɨa? 24Mɨkɨ kiekaritsie xɨka me'u'uwani huta tewiyari heimana tamamata heitseriemekɨ yamemɨtekahu. ¿Yunaime petiwaka'una, pekareiyehɨwirieni kiekari pewanaki'erietɨ heitserie memexeiya? 25Mɨpaɨ pemɨtiyurieneni matsi 'aixɨa pɨka'ane. Heitseriemekɨ yamɨtikamie xɨka 'umieni 'axamɨtiyuriene hamatɨa meta yaxeikɨa memɨte'anuyehuni yunaitɨ. Mɨpaɨ matsi hatsuaku pepɨkatiyurieneni. 'Ekɨ 'itsɨkame pekanihɨkɨtɨni 'ikɨ kwie naime hetsiemieme. ¿Tamɨ kemɨtiheitserie pekatiyurieni?
26Yawé mɨpaɨ katinita'eiya:
—Xɨka huta tewiyari heimana tamamata heitserie yamemɨtekahu Tsuruma kiekariyaritsie newarukaxeiya, wahetsiemieme kiekari naime nekatineuyehɨwiriemɨkɨ.
27'Apɨrahami mɨpaɨ katinitahɨawe:
—Ne nepɨnemate kenetineuyehɨwirieka kwinimieme nematiku'iwawiyakɨ neti'aitɨwame, ne tumuanari naxi nepɨhɨkɨ. 28Peru xɨka meheuyewekake yu'auxɨwitɨ mema'atɨkɨnekɨ huta tewiyari heimana tamamata. ¿Petika'una naime kiekari yu'auxɨwitɨ memeuyewetsekɨ?
Yawé mɨpaɨ katinita'eiya:
—Xɨka huta tewiyari heimana yu'auxɨwime newaretaxeiya heitserie memexeiya nepɨka'ika'una.
29'Apɨrahami tawarita mɨpaɨ kaniutayɨni:
—Keri xɨka huta tewiyari xeikɨa pewaretaxeiya.
Yawé mɨpaɨ katinita'eiya:
—Heitserie memexeiya mɨkɨ huta tewiyari meyupaɨmemekɨ nepɨka'ika'una kiekari.
30'Apɨrahami tawarita mɨpaɨ kaniutayɨni:
—Pepɨkaha'aka neti'aitɨwame, matsi kenenepitɨaka nemɨtikuxatanikɨ. Keri xɨka xeitewiyari heimana tamamata xeikɨa pewaretaxeiya.
Yawé mɨpaɨ katinita'eiya:
—Nepihayewa xeitewiyari heimana tamamata wahetsiemiemekɨ.
31'Apɨrahami tawarita mɨpaɨ kaniutayɨni:
—Kenetineuyehɨwirieka mɨya nematikuxaxatɨwakɨ neti'aitɨwame, peru xɨka pewaretaxeiya xeikɨa xeitewiyari heitserie memexeiya.
Yawé mɨpaɨ katinita'eiya:
—Mɨkɨ xeitewiyarikɨ nepɨka'ika'una.
32Mɨkɨ tawarita mɨpaɨ katinitahɨawe:
—Pepɨka'uyeha'arɨweni neti'aitɨwame, keneneupitɨa tawarita nemɨtaniunikɨ. Xɨkata tamamata pewaretaxeiya xeikɨa.
Yawé 'imatɨrieka mɨpaɨ katinitahɨawe:
—Mɨkɨ tamamata wahekɨ nepɨka'ika'una.
33Kepauka mɨtiutahayewaxɨ Yawé tikuxatatɨ kaneyani, 'Apɨrahami meta kanakunuani yukie 'ixuriki kiiyarita.
Currently Selected:
Tsutɨarika 18: hch
Highlight
Share
Copy
Want to have your highlights saved across all your devices? Sign up or sign in
© 2020, Wycliffe Bible Translators, Inc.
