Tsutɨarika 19
19
Yawé kemɨtika'unaxɨ Tsuruma meta Kumuxa
1Merikɨtsɨ kanikuyɨrirɨmekaitɨniri kepauka niuki tuayamete Tsuruma memɨye'axɨa. Ruti kiekari kitenie kanakateitɨni mɨranutakɨkatɨretsie. Kepauka mɨkɨ mɨwaruxei, kananukukeni watahɨaweke, wahɨxie kwiepa kaniukahɨximakeni. 2Mɨpaɨ katiniwarutahɨawe:
—Neuxei 'iwatamete, nepɨxewawirie waɨkawa 'ikɨ tɨkaritsie nekiita xemuyuhayewanikɨ. Muwa yɨ'ɨkate xemetihauxini peyɨwe, 'uxa'akeri ximeri xekaniyehuni kexemɨtehu.
Peru mɨkɨ mɨpaɨ mekaniutiyuani:
—'Aixɨa pɨ'ane mɨyapemɨtarahɨawe, matsi tame kiekari hixɨapa teɨteri memayutixexeɨriwatsie tepetiheni.
3Peru Ruti katihayewakaku yukie wa'inietɨ mepekɨ 'utɨmana, kiitana mekaniu'axɨani. Ruti wa'ikwai muwa putiwarukawewiri 'aixɨa ti'anekame, paa mɨkakuxanariyarietɨka kaniutikwaxiya, mɨkɨ mekateniukwani.
4Hikɨ mekakakutsiwawekaku 'akuxi, kii 'aurie mekanaketɨkɨne teɨteri mana Tsuruma kiekariyaritsie kiekatari. Yunaitɨ teɨteri kiekatari mekaniyɨakaitɨni xewitɨ tɨma kayuhayewatɨ, temari 'ukirawetsixi yunaitɨ mekateniyɨakaitɨni. 5Ruti mekanewaye'inieni, mɨpaɨ mekatenitahɨawe:
—¿Hakewari 'ukitsi memu'axɨa 'akie metihenike? Keniwarayenɨ'a. Tame wahamatɨa tepɨkahini.
6Hikɨ Ruti yukiita hewayeyaka, reunaka kitenie, 7mɨpaɨ katiniwarutahɨawe:
—Neuxei nehamikuma, mɨpaɨ xepɨkayɨaka. 8Ne yuhutame nepɨwarexeiya neniwema 'ukari 'ɨimarixi 'akuxi, nekaniwarayenɨ'amɨkɨ tsepa kexemɨwayuriku mɨkɨ, peru 'ikɨ 'ukitsi 'axaxepɨkawayurieka, mɨkɨ mekaniu'axɨani nekiita memayehenikɨ.
9Peru mɨkɨ mɨpaɨ mekatenita'eiya:
—Mana keneukuye'a. 'Ikɨ 'ena pɨkakiekame, hikɨta tati'aitɨamɨkɨ. Hikɨtsɨari matsi 'ekɨ kwinimieme 'axatekamaniyuriekakuni 'ena mɨtiyehane pemɨkawatauniekɨ.
Hikɨ Ruti mekaneukutaima hurawa kitenie mekaniuti'uni 'itupari meheu'unake. 10Peru memuyuhuta 'ukitsi yumamate mekaniutitsera, Ruti mekaneutahana kiitana meta mekateneunani kitenie. 11Hikɨ mɨkɨ, 'itupari memeu'unakai temari 'ukirawetsixi mekaheunenieretɨ mekanayeitɨarieni, kitenie hakewa mehɨkɨtɨkai mepɨka'itaxeiri. 12Hikɨ Ruti mɨpaɨ mekateneye'eritɨani:
—¿Tawarita 'atɨɨriyama pekatiwarexeiya 'ena? Keniwaranuwitɨki xaɨtsie yunaime 'amunema, 'aniwema 'ukitsi meta 'ukari, yunaime kemɨ'ane memɨ'a'iwama, 'ikɨ kiekaritsie mepɨkayuhayewani, 13hikɨ tame tekanika'unakuni. 'Axamɨti'ane hiwerika Yawé hetsɨa paitɨ kaniye'ani, 'ari 'iyarieyatsie katineuyeyani. 'Ayumieme tame pɨtatsiheyenɨ'a temika'unakɨ.
14Hikɨ Ruti kanayeyani wata'inienike yuniwema wakɨnama memakɨnekekai, kemɨ'ane memɨwatiwitɨnikekai.
Mɨpaɨ katiniwarutahɨawe:
—Mexɨima. Kiekaritsie xekenayekɨni, Yawé kanika'unarɨmeni.
Matsi mɨkɨ yakɨ 'utaineme mepɨ'eriekai. 15'Ari kuhekɨarirɨmekaku tawarita Ruti yaxeikɨa mekatenikɨhɨawekaitɨni niuki tuayamete. Karima mɨpaɨ mekaniutiyuani:
—Keneyumexɨitɨatɨ. Keniwaranuwitɨki 'a'ɨya meta 'aniwema memuyuhuta, xemɨkakukukuwenikɨ kepauka kiekari mɨka'unarieni.
16Ruti kayumexɨitɨakaku, niuki tuayamete mamayatsie mekanikawɨre, 'ɨyaya meta niwemama memuyuhutakai, kiekaritsie mekaniwaranuyewitɨni, Yawé mɨwarutinenimayataxɨkɨ. 17Mewarayewitɨkari kiekaritsie, xewitɨ niuki tuayame mɨpaɨ kaniutayɨni:
—Xekeneuyuta'una. Yu'utɨma xepɨka'anakuneniereni mayeweritsie xepɨkahewa'uweni. Hɨritsie paitɨ xekeneuyuta'una, nɨkahɨrixɨa xe'ukwini.
18Ruti mɨpaɨ kaniutayɨni:
—Neuxeitsɨ hawaikɨ, waɨkawamekɨ nepɨmatsiwawirie, neti'aitɨwame. 19'Ekɨtsɨ 'aixɨa pekanetiniuxeiya, ke'aixɨa nehetsiemieme pemɨtiuyuri pɨmariwe netukari pemutawikweitsitɨakɨ. Ne matsi nepɨkayɨwe nemɨneta'una hɨritsie paitɨ, nɨka netsi'anuku'axe kepauka mɨka'unarieni kiekari, tietɨtsɨ nemɨnemɨ. 20'Ena kiekari yateewa pukuma 'etsiyeutɨ, mana nepɨneta'una. ¿Xekaneneupitɨa mana pɨta nemɨneta'unakɨ? Mɨkɨ kiekari 'etsikaniyeuka, mɨkɨtsie nekaniyuti'awietamɨkɨ.
21Hikɨ xewitɨ mɨkɨ mɨpaɨ katinitahɨawe:
—Kepemɨnerawawiriwa yanepɨra'eriwa. Nepɨka'ika'una kiekari pemexaxata. 22Keneumienitsɨari xeiya, kene'ata'una mana paitɨ, peheta'ayuke yanepɨtiyurieni.
'Ayumieme mɨkɨ kiekari Tsuhaxi titewatɨ patɨa.#19:22 Hepɨrayukɨ Tsuhaxi 'etsimɨyewa kananuyɨneni.
23Ruti Tsuhaxi peta'a tau haneximekaku. 24Hikɨ Yawé tai wiyeriyari kaneyenɨ'ani meta 'atsupɨre taiyari kaniukawiwieni muyuawitsie mieme Tsuruma meta Kumuxa wahetsie. 25Mɨpaɨ katiniwaruka'una mɨkɨ kiekarite meta yunaime mana kiekatari, naime mayeweritsie meta tita mana mɨtixuawekai. 26Peru Ruti 'ɨyaya yu'utɨma kananakuniere 'una teteyari kanayani.
27Hikɨ 'uxa'arieka ximeri paitɨ 'Apɨrahami kananukukeni, kaneyani hakewa Yawé hamatɨa mɨrekuxatakai. 28Kaneutaniere Tsuruma meta Kumuxa wahepatsie meta naitsarie mayeweritsie, hikɨ mana kɨtsi kaniuxeiya mana hatineikame, huxunuta wa'atɨ pɨratineika.
29Mɨpaɨ Kakaɨyari pɨtika'unaxɨ mɨkɨ kiekarite makuweritsie mukumanekai, peru 'Apɨrahami kemɨrehɨawekai paye'eri, Ruti mana putawikweitsitɨa kiekari ka'unarieximekaku mana mukateikɨ.
Ruti meta niwemama
30Hikɨ Ruti marikakɨ Tsuhaxi kayuhayewamɨtɨ, kaneyani hɨritsie paitɨ yuniwema memuyuhuta warawitɨtɨ. Mana paitɨ terɨta kanayekateitɨni wahamatɨa. 31Merikɨtsɨ mɨixari muwa me'ayetetɨ, Ruti niweya 'amɨyumate yutaru mɨpaɨ katiniutahɨawe:
—Tapaapa pɨ'ukiratsiri, meta naitsarie 'ena mɨtiuyehanetsie mepumawe 'ukitsi memɨtatsitiwitɨnikɨ, naitsarie teɨteri kememɨteyutiwitɨkɨ. 32Hikɨmɨ, tepititawaitɨani, 'anari hamatɨana tekanikahikuni, mɨpaɨ teyɨme tanuiwarima tepɨwarayexeiya.
33Hikɨ mɨkɨ tɨkaritsie yupaapa mekaniuti'itɨani, hikɨ kahayu'eriwakaku, 'ana niweya 'amɨyumate kaniukahuni hamatɨana. 34'Uxa'arieka, 'amɨyumate mɨpaɨ yutaru katiniutahɨawe:
—Neuxei, ne hikɨ tɨkaritsie nepaapa hamatɨa nepukahui. Yaxeikɨata hikɨ taikai tepiti'itɨani, 'ekɨta hamatɨana pepɨkahuni, mɨpaɨ teyɨme tanuiwarima tepɨwarayexeiya.
35Mɨkɨ tɨkaritsieta yupaapa mekaniuti'itɨani, mɨkɨ kahayu'eriwakaku, niweya yakɨmɨyumate hamatɨana kaniukahuni. 36Mɨpaɨ me'uyɨka yuhutatɨ Ruti niwemama mekaniutihukataxɨani yupapatsie miemekɨ. 37'Amɨyumate xeime 'ukitɨme kaniutiniweni, Muhawi katiniterɨwa, muhawitsixi wapaapa matɨa.#19:37 Hepɨrayutsixi waniukikɨ, Muhawi 'etsiwatɨkaku yaxeikɨa pɨti'eniɨriɨkɨ yupaapa hetsiemieme. 38Taruyata yaxeikɨa, 'ukitɨme kaniutiniweni, Weni-'Ami#19:38 Hepɨrayutsixi waniukikɨ, Weni-'Ami 'etsiwatɨkaku yaxeikɨa pɨti'eniɨriɨkɨ ne'iwama wanu'aya. katiniterɨwa, 'amunitsixi wapaapa matɨa.
Currently Selected:
Tsutɨarika 19: hch
Highlight
Share
Copy
Want to have your highlights saved across all your devices? Sign up or sign in
© 2020, Wycliffe Bible Translators, Inc.
