Salmos 16
16
Salmo 16
Su'si ma kúu iya táa ndaka nawa jiniñu'u o ma
1Su'si maa sa, ko koto va'a ña'a ni,
vaa nuu maa in‑ni ni kúkanu ini sa.
2Ini anua sa ya ni jiña'a Iya Tátnuni ma:
“Maa ni kúu iya tátnuni nuu sa a.
Masu nawa iyo ñuu ñayivi a ja va'a‑ka ja kukanu ini sa,
nú masu ja nuu maa in‑ni ni, vi Su'si”,
kúu sa jiña'a sa ya.
3Ndaka ja ka xnani ñayii ma su'si i ma
ja ka iyo nuu ñu'ú ya,
chi inundi'ya xeen ka ka'an maa ndaka ñayii
ja ni‑yu'u ni‑ini i ka ndikin i ma.
4Kovaa ndaka ñayii ka jinukuechi
nuu tna'a ja ka jani ini i ja su'si ka kuu ma
te inundi'ya xeen ka ka'an i ma
chi jin ndo'o jin neni xen‑xeen‑ka maa i.
Kovaa saña chi masu ndachiñu'u sa ja ka ka'an i
ja su'si i ka kuu ma,
te ni masu ndakune'e sa ja ka nani i ma,
te ni masu ka'ni sa in kiti ja kati sa niñi ti ma
nuu altar tna'a ja másu Su'si ka kuu ma.
5Kovaa maa ni, vi Iya Tátnuni,
kúu iya táa ndi'i kuiti nawa jiniñu'u sa ma,
te maa ni jini naxe ko kuu sa.
6Vivii kaa ñu'ú nuu skuta'vi ña'a ni ja koo sa a,
te játna ini xeen sa ndaka ja iyo a.
7Chukan kúu ja ká'an sa ja vii ja va'a ja kuu Iya Tátnuni ma,
vaa maa ya ndákan‑so'o nuu sa a,
vaa visi onde jakuaa ma,
te sa'a ya ja ndákani ndáka'vi ini sa,
te ndása'a sa kuenda.
8Saña chi ni yo jini sa ja ndimaa yoxtnuu kua'an yoxtnuu vee
Iya Tátnuni ma nuu sa a.
Vaa maa ya iyo ichi xiñi kua'a sa ya,
te ûni konukuiñi vava'a sa, te másu nawa sa'a ja kotuu sa.
9Te chukan kúu ja ni ndusii ini xeen ini anua sa ya,
te ni kutachi xen‑xeen sa, te ndátatu ni‑ka'nu ni‑tu'u sa,
vaa kúkanu ini xeen ña'a sa,
te koteku sa ni‑kani ni‑jika, vi Su'si.
10Vaa másu xndoo ña'a ni ini yavi
kinee ñu'ú‑nde'yu sa ma ja tivi i,
te másu kua'a ni tnu'u ja ñayii
jâ ni nduvii ni ndundoo ini i ma,
te ndutne'e‑ka tuku i in‑ka jichi.
11Vaa maa ni ni kaxtnu'u ichi va'a ja sa'a ja koteku sa a,
te maa ni sa'a ja koo sii ini xen‑xeen sa,
vaa iyo ni ji'in sa a,
te játna ini xen‑xeen sa ja ni‑kani ni‑jika,
te koo sa xiñi kua'a ni a.
Currently Selected:
Salmos 16: xtm
Highlight
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
