Salmos 25
25
Salmo 25
Sukan kakan‑ta'vi o nuu Su'si ma ja na sakanu ini ña'a ya te ko koto ña'a ya
1Iya Tátnuni, nuu maa ni ndonenuu sa, te kakan‑ta'vi sa.
2Su'si maa sa, nuu maa ni kúkanu ini sa,
te máko kua'a ni tnu'u ja tna'a sa ja kan‑nuu,
te máko jin jakundee ña'a ñayii ñatuu ka kunimani nuu sa ma.
3Ja ndandaa kúu ja ndaka ñayii ka kukanu ini ña'a i maa ni ma
chi másu jin tna'a i ja kan‑nuu,
kovaa jin ndatna'a maa ñayii ñatuu ka kandija
ja ká'an ni ma ja kan‑nuu.
4Iya Tátnuni, kaxtnu'u ni ichi maa ni a,
te kaxtnu'u ni naxe sa'a sa ja játna ini ni ma.
5Kaxtnu'u ni naxe sa'a sa ja ndaa ma,
vaa maa ni kúu Su'si sa, iya sa'a ja kaku sa nuu ja u'vi ma,
te maa in‑ni ni kúkanu ini sa ndaka kivi ndaka ora.
6Iya Tátnuni, ndaka'án ña'a ni sukan vivii kútoo ña'a ni ma,
te kúnda'vi ini ña'a ni ma,
vaa sukan ndimaa káxtnu'u ni nuu sa a.
7Kovaa máko ndaka'án ni ndaka ja u'vi ni yo sa'a sa ma
nuu ni kaa kuechi‑ka sa ma,
vaa so'o xeen ni kaa sa, te ñatuu ni kandija ña'a sa ma.
Su'va ndaka'án ña'a ni sukan kútoo ña'a ni ma,
sukan nda'vi ini ni ma, vi Iya Tátnuni.
8Iya va'a ini, iya sa'a ja ndaa kúu Su'si o a.
Chukan kúu ja ndáka'an‑so'o ya nuu ñayii ka sa'a ja u'vi ma
ja na jin ndasa'a i ja va'a ma, sukan kúni ya ma.
9Vaa ñayii kúkanu ini ja maa Su'si ma, sana kuu koo va'a i ma
chi maa ya kaxtnu'u ja sa'a i ja va'a ja ndaa ma,
sukan kúni ya ma.
10Te chukan kúu ja ñayii ka kandija sukan ni ka'an ya ma,
ndimaa jin kuni i sukan kútoo ña'a ya ma,
ji'in sukan kúnda'vi ini ña'a ya ma,
ji'in sukan ndija ya ja ká'an ya ma.
11Ja na koo jayiñu'u maa ni, Iya Tátnuni,
te sakanu ini ña'a ni, vaa kua'a xeen kuechi ndiso sa a.
12¿Nde in kúu ñayii yu'u
ja ndakan Iya Tátnuni ma kuenda nuu i ma?
Ñayii yukan ma chi maa ya kaxtnu'u ichi va'a ko kaka i ma.
13Te koo sii ini i, te ndimaa koo va'a i,
te sa'ya tata i ma chi jin nduta'vi i ñu'ú nuu ka iyo i ma.
14Te Iya Tátnuni ma chi káxtnu'u ya ndaka ja iyo
ja sa'a ya ma nuu i, vaa ni‑yu'u ni‑ini i ndánduku i ya ma,
te jin jaku'ni ini i ndaka ja ni skuiso ya ma.
15Chukan kúu ja maa sa
chi ndimaa nde'ya nde'ya‑ni sa Iya Tátnuni ma,
vaa maa ya sa'a ja kaku sa nuu yo'o skuili tachi ma,
ja tnii ña'a i te sa'a sa ja u'vi kúni i ma.
16Iya Tátnuni, konde'ya ña'a ni, te kunda'vi ini ña'a ni,
vaa iyo maa in‑ni sa ya'a, te jiniñu'u ña'a sa,
vaa ndó'o néni sa a.
17Vaa ini anua sa ya chi kúxii xeen ini i, vi Su'si.
Sa'a ni ja na jin ndiyo tnundo'o tnuneni iyo nuu sa a,
te kaku sa.
18Jikan‑ta'vi sa nuu ni ja konde'ya ni sukan ndó'o néni sa a,
te sakanu ini ña'a ni ndaka kuechi sa ma, te xnaa ni.
19Vaa jini maa ni ja ñayii ka kuni u'vi nuu sa a
chi su'va ni ka kukua'a‑ka i,
te ka saxiko ña'a i, te ka kuni i ja jin sa'a ña'a i ja u'vi.
20Ko koto ña'a ni, te sa'a ni ja kaku sa nuu ja u'vi ma.
Te máko kua'a ni tnu'u ja tna'a sa ja kan‑nuu ma,
vaa maa in‑ni ni kúkanu ini sa.
21Te ûni ni‑yu'u ni‑ini sa ká'an sa nuu ni a,
te másu xnda'vi ña'a sa,
vaa jini maa ni ja masu na ja u'vi sa'a sa,
vaa kúkanu ini ña'a sa ja maa ni, te koo va'a sa.
22Su'si maa sa, sa'a ni ja jin kaku ndaka ñayii ñuu Israel ma
nuu ndaka tnundo'o tnuneni ka tna'a i ma.
Currently Selected:
Salmos 25: xtm
Highlight
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
