Sunda hi suma a sunuzinid’a 12
12
A tchi Jacques, a ge Pierre dangeina
1Ata yi máma, amulâ Herot mi nde djop vun suma dingâ aduk suma toka. 2Mi tchi Jacques Jean wiyema ki mbigeu d’a fiyaka. 3Kid’a mam we vama mam luma le Juif-fâ tazi djivid’id’a, mi ve Pierre mi. Ni kur bur ma vun til ma lum kavungô ma bei angufina. 4Kid’a mi vum dad’a, mi gum dangeina, mi hum abo adesâ hi azigarâ ma fid’ina ad’u fid’i á ngomba, kayam mi nga hurum ala bugol kala hi Pa’îd’a, mam mba ndumï woi abu avok suma. 5Azigarâ a nga ngom Pierre kur dangeina, wani suma toka a nga tchen Alona kam ki hat hurâ bei ara ba.
Alona mi pat Pierre woi kur dangeina
6Ata yima Herot mi min á ndum mbei abu yorogona, kur andjege ndata, Pierre mi nga burâ sena kä aduk azigarâ mbà, mi nga djinda ki kindjingâ mbà mi. Suma ndjola a nga tchola avun gonga á ngom suma dangeina. 7Ata yi máma, malaikana hi Salad’ina mi nde tam mbei gen Pierre, b’od’a b’o kur gong nga dangeina. Mi tum Pierre fefed’emu, mi zlid’im akulo, mi dum ala: Ang tchol akulo atogo. Kindjing ma aboma mi tchuk kä. 8Malaikana mi dum ala: Ang djin d’ik mangâ furungû, ang tchuk atuguru mangâ asengû. Mi le hina mi. Malaikana mi dum ala: Ang tchuk baru mang nga ngola atangû, ang mbeï ad’unu. 9Pierre mi ndabua, nga mi tit ad’u malaikana. Mi we nga ala vama malaikana mi le ki sed’ema ni gagazi d’i, wani mi djib’er ala va nde ni iramu. 10Azi kal yam yima ndjol ma avo’â, a kal yam yima mbàna, a mbaza avun agrek ma kawei ma wura ma mi ndezi woi kur azî ma ngolîna. Vun máma mi mal lei avorozi katamu, azi buzuk keyo, a tchila yam palumba tu. Ata yi máma na wat, malaikana mi aramu.
11Djib’era hi Pierre-ra ti mba, mi dala: Ki tchetchemba, an we gagazi, Salad’a mi sunï malaika mama á sud’un ndei abo Herot kahlena pet suma Juif-fâ a ngazi kan á led’ina.
12Kid’a djib’er mamba ti mba dad’a, mi i avo hi Marie d’a Jean asumba, ni ma azi yum ala Mari’â, nata yima suma ablaud’a a nga toka kua á tchen Alonina. 13Kid’a Pierre nga mi tum vun agre’îd’a, gor ra sunda, simiyêt ala Rode, ti hut go á humba. 14Kid’a ti hum del Pierre-ra, ti le furîd’a, ti mal vuna d’i, ti ring krovo, ti dazi ala: Pierre mi nga tchola avun agre’â abua.
15Azi dat ala: Ndak gurut ni gurud’a.
Wani ti tchol ad’enga ala: Gagazi.
A dat ala: Ni malaika mama. 16Wani Pierre nga mi tum vun agre’â gagak. Kid’a azi malam vunid’a, a wumu, a le atchap. 17Mi lazi abom ala a ba, mi vazi ad’ud’a ni nana ba, Salad’a mi pad’amï woi kur dangeina ge. Mi dazi ala a de mi Jacques ki b’oziyod’a suma dingâ. Ata yi máma, mi i yima dingâ.
18Kid’a yina fo dad’a, azigarâ a nde tcha tata ngola, a dala: Vama le Pierre ni me ge? 19Kid’a Herot mi halam mi fum mbuo d’a, mi djop azigar suma ndjola, mi he vuna ala a tchazi woyo. Bugola, mi tchol Jude, mi i Sesare, mi kak sä kua.
Matna hi Herot-na
20 Herot hurum zal yam suma Tir-râ ki suma Sidon-na. Azi tok taziya, a i gevem ki hur ma tuna. A i fe Blastus amulâ vunam ma ad’u kä na. A tchenem ala mi zlabazi darigïd’a kamulâ, kayam ambas mazid’a ti fe tena ni kur ambasa hamulîd’a.
21Kid’a bur ma Herot mi ngazizina mi ndaka, mi tchuk baru mam mba amula atamu, mi kak yam zlam mba amula, nga mi dazi zlad’a. 22Suma a tum siwela gandjau ala: Ihî ni dela hAlonid’a, nga ni dela hi sa d’i. 23Ata yi máma na wat, malaikana hi Salad’ina mi tumumu, kayam mi subur nga Alona d’i. Mi tchuk ndjuvulâ, mi mid’a.
24Wani zlad’a hAlonid’a ti wet teyo, nga d’i zul avogovok mi.
25Kid’a Barnabas azi ki Saul a dap vun sun mazid’id’a, a tchol Jerusalem, a hulong Antiyos, a ve Jean ma a yum ala Mari’â ad’uziya.
Currently Selected:
Sunda hi suma a sunuzinid’a 12: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
