Sunda hi suma a sunuzinid’a 14

Paul azi ki Barnabas a nga avo Ikoniyum

1Ata yi máma, Paul azi ki Barnabas a kal kur gong nga toka hi Juif-fîd’a avo Ikoniyum. A tchazi wala gak Juif-fâ ki Gre’â ablaud’a a he gagazid’a. 2Wani Juif suma a he nga gagazid’a d’uo na, a zut andjaf suma dingâ ala a kak djangûna ki b’oziyoina. 3Paul azi ki Barnabas a le burâ ngola kur Ikoniyum. A nga tchi wal zlad’a hi Salad’id’a ki hur ma ade’esâ. Salad’a tamba nga mi le glangâsâ yam zla mam mba sumad’a ala ni gagazi. Mi hazi ad’enga á lahle suma simata kahle suma ndandalâ mi. 4Wani ablau suma kur azì ma ngol mámina a wal kä mbà, suma hiuna ad’u Juif-fâ, suma hiuna ad’u suma a sunuzina mi.

5Kid’a andjaf suma dingâ ki Juif-fâ zlapa ki mazi suma nglona a ndjak vunazi á lazi ahle suma tchona á tchazi kahinad’id’a, 6Paul azi ki Barnabas a wäd’u zla ndata. Hina, a ring kur azì ma nglo ma Listre ki Derbe kur andaga d’a Likoni-d’ina kazì ma nga nguid’ina mi. 7A tchi wal Zla d’a Djivid’a kua mi.

Paul azi ki Barnabas a nga avo Listre

8Sana nga kur Listre ni ma a vud’um ki gugutud’a dei ma mi tit nga yam tu d’uo na. 9Mi hum wal la tchid’a hi Paul-la. Ata yi máma, Paul mi so iram kamu, mi wum ala mi he gagazid’a á fe lafiya d’a. 10Mi dum ki delem mba ad’enga ala: Ang tchol akulo kaseng d’ingêr. Sa máma mi lak akulo, mi nde tita. 11Kid’a ablau suma a we vama Paul mi luma, a tum sora ki vun Likoni-na ala: Alo ma teteng ma akulona mi tchuk asem kä hatei d’igi suma na. 12A yi Barnabas ala Zeus, a yi Paul ala Hermes, kayam Paul ni ma ngol ma de zlad’a. 13Ma ngol ma ngat buzuna halo ma a yum ala Zeus ma gong mam mba fileina nga avun azì ma ngolîna, mi mba kamuzlei suma andjofâ ki b’o aguna suma azi minizi djivid’ina. Mi mba ki sed’ezi avun azina zlapa kablau suma, a min ngat buzuna mi Barnabas azi ki Paul.

14Wani ata yima suma a sunuzina Barnabas azi ki Paul a hum hina na, a haû baru mazina woyo, a ring a kal aduk ablau suma, 15a de ki delezi akulo ala: Agi sumuna, agi lagi ni me na ge? Ami ni suma d’igi agi na mi. Ami mbagi ni Zla d’a Djivid’a ala agi aragi filei ma hawa ya’â woyo, agi mbud’ugi iragi yam Alo ma ari ma lakulod’a kandagad’a kalum ma ngolâ kahlena pet suma a nga kuruma. 16Kur atchogoi d’a kala, mi ar andjaf ma lara ge pet mi nga mi tit kur lovot mamba. 17Wani burâ ki burâ mam tamba nga mi tagï djivi mam mba mi lata woi akulo. Nga mi se kagiya, agi nga dud’ugi awuna vun simetna, nga mi hagi tena, nga mi hobogi hayagi ki tena, agi nga lagi furîd’a mi. 18Ki zla d’a de d’a ad’enga tua ba, suma a sunuzina a d’el ablau suma bei ngad’azi buzuna.

19Wani Juif suma hiuna a tcholï Antiyos sa Pisidi-d’a ki Ikoniyum, a mba, a zut ablau suma a dur Paul kahinad’a. A tanam mbei kele, a djib’er ala mi mit wa. 20Wani ata yima suma hata a mba á nguyuma, mi tchol akulo, mi kal hur azì ma ngolâ. Tcha ndjivinda Paul azi ki Barnabas a i Derbe.

Paul azi a hulong avo Antiyos sa Siri-d’a

21Bugol la azi tchi wal Zla d’a Djivid’a kur azì ma ngol mámid’a, suma ablaud’a a mbut suma hata. Paul azi ki Barnabas a hulong kur Listre, Ikoniyum ki Antiyos sa Pisidi-d’a. 22Azi nga he suma a he gagazid’ina ad’enga, a nga gigid’ezi ala a kak kur he gagazid’a. A dazi ala: Ni ki djop vuna ngola tua ba, ei mba kalei ki kur leud’a hAlonid’a. 23A man suma nglona, a tinizi kur Tok ka lara ge pet. A d’el tazi bei te tena, a tchen Alona kaziya, a hazi abo Sala ma azi hum gagazid’ina.

24Azi kal yam andaga d’a Pisidi-d’a, a mba Pamfili. 25Bugol la azi tchi wala zlad’a hAlonid’a kur Perge tchid’a, a i Atali. 26Ata yi máma, a djak kur batod’a, a i Antiyos. Ni yima azi tcholï kua adjeu kid’a suma nglona a tchen Alona kazi kayam mi ndjunuzi yam sun nda azi dabat wanda d’a.

27Kid’a azi mba Antiyos dad’a, a yï suma toka pet, a vazi ad’u ahle suma Alona mi lazi ki sed’ezina pet, ni nana ba, Alona mi mal lovot ta he gagazid’a mandjaf suma dingîna ge. 28Azi kak ki suma a he gagazid’ina burâ ngola.

Currently Selected:

Sunda hi suma a sunuzinid’a 14: BA

Highlight

Copy