Sunda hi suma a sunuzinid’a 18

Paul mi nga avo Korente

1Bugol ahle ndazina, Paul mi tchol Aten mi i Korente. 2Mi fe ma Juif-fâ, simiyêm ala Akila, ambas mamba ni Pong. Azi kamamba Prisil a tcholï Itali, a mba Korente kur bur máma, kayam ma te yamba Klaut mi he vuna ala Juif suma kur Rom-ma pet a buzuk keyo. Paul mi i geveziya. 3Kayam sun mazi d’a led’a ni tu, mi kak ki sed’eziya. A le sunda zlapa, kayam azi ni suma tchil tandana. 4Kur bur ma sabat ma lara ge pet, Paul nga mi tchi wala kur gong nga toka hi Juif-fîd’a, nga mi ve Juif-fâ ki Gre’â ki zlad’a.

5Kid’a Silas azi ki Timote a tcholï Maseduwan a mba fumba, Paul mi he tam ata yina pet á tchi wal zlad’a hAlonid’a. Nga mi le glangâsâ mi Juif-fâ ala Jesus ni Mesi. 6Wani Juif-fâ a nga hum zla mamba d’i, a nga ngulumu. Kayam ndata, mi gas baru mama woyo, mi dazi ala: Le agi bagi woyo ni, ni tcho magid’a; zla nga kan ndi. Ki tchetchemba, an nga ni i ata andjaf suma dingâ.

7Mi tchol ata yi máma, mi kal avo hi sana simiyêm ala Titiyus Justus, ni ma nga mi kud’or Alonina, aziyam nga gen gong nga toka hi Juif-fîd’a mi. 8Krispus ma ngolâ hi gong nga toka hi Juif-fîd’ina, mi he gagazid’a yam Salad’a ki suma avo hatama pet. Suma Korente-na ablaud’a suma a hum zlad’a hi Paul-lina a he gagazid’a, a lazi batemba mi.

9Kur andjeged’a, Salad’a mi nde tam mbei ir Paul, mi dum ala: Ang le mandar ri, ang tchi wala, ang ba d’i, 10kayam an nga ki sed’engû. Sama ndak á vang á lang tchod’a nga d’i, kayam sum mana ablaud’a a nga kur azì ma ngol máma. 11Paul mi kak kua bizad’a tu ki tilâ karagaya, nga mi had’azi zlad’a hAlonid’a.

12Kur atchogoi ndata, Galiyon ni ma te yamba kur ambas sa Akai-d’a. Kur bur máma Juif-fâ a ndjak vunazi tu yam Paul, a im ata yima ka sariyad’a. 13A dala: Sama wana nga mi mbut hur suma kä ala a kud’or Alona d’igi gata hi Moise-sa ti de na d’i.

14Wani kid’a Paul mi mal vunam á ded’id’a, Galiyon mi de mi Juif-fâ ala: Agi Juif-fâ, ladjï mi tchi ni matna, d’oze mi le ni tcho d’a ngola ni, nata yad’u, an mba ni humugiya. 15Wani le ni kayam zla d’a tchi tuguyod’a yam zlad’a d’oze yam simina d’oze yam gat magid’a tata ni, ni zla magid’a. An min ka sariya ndata d’i. 16Mi digizi woi ata yima ka sariyad’a. 17Suma pet a ve Sosten ma ngolâ hi gong nga toka hi Juif-fîd’ina, a nga tom avok yima ka sariyad’a, wani Galiyon mi gol ahle ndazina ni hawa na.

Paul mi hulong avo Antiyos

18Paul mi kak kua burâ ngola. Ata yi máma, mi ge b’oziyoina depa, mi djak kur batod’a á i Siri zlapa ki Prisil ki Akila. Paul mi wel yam mbei avo Sengkre, kayam mi hle vunam mAlona da’. 19Azi mbaza Efes, Paul mi ar Akila azi ki Prisil. Wani mam tamba mi kal kur gong nga toka, nga mi tchi tuguyod’a ki Juif-fâ. 20Ata yi máma, azi tchenem ala mi kak ki sed’ezi tua, wani mam min nga d’i. 21Wani mi gazi depa, mi dazi ala: Alona le mi mina ni, an mba hulongî gevegiya. Mi djak kur batod’a avo Efes, mi i Sesare.

22Kid’a mi mbaza avo Sesare-d’a, mi djak i Jerusalem á ge suma toka depa, mi kal mi i Antiyos. 23Kid’a mi kak sä kua ndjö d’a, mi tchol nga mi tit yam andaga d’a Galat-ta ki d’a Frizi-d’a. Mi nga mi sira suma hata pet kur he gagazi mazid’a.

Apolos mi nga avo Efes ki Korente

24Kur bur máma ma Juif-fâ, simiyêm ala Apolos, ambas mamba ni Alezandri, mi mba Efes. Ni ma we zla d’a ded’a heîna, mi we mbaktumba hAlonid’a ngola heî mi. 25A had’am wa lovota hi Salad’id’a. Tam nga d’i lum zlezleû, nga mi tchi wala, nga mi hat yam Jesus d’ingêr, wani mi we ni batemba hi Jean-d’a hol. 26Mi tin ad’ud’a á tchi wala bei mandarâ ba kur gong nga toka hi Juif-fîd’a. Wani kid’a Prisil azi ki Akila a hum zla mambid’a, a vum ataziya, a nga vum ad’u lovota hAlonid’a woi tetet. 27Bugol la Apolos mi min i Akai-d’a, b’oziyoina a min ala mi i mi, a lum mbaktumba abom mi suma a he gagazid’a kur ambas ndatina ala a vum ataziya. Kid’a mi mbazid’a, mi ndjun suma a he gagazid’ina kayam Alona mi tagazi suma mamba. 28Kayam mi kal yam Juif-fâ aduk suma, nga mi vazi ad’ud’a woi kur mbaktumba hAlonid’a ala Jesus ni Mesi.

Currently Selected:

Sunda hi suma a sunuzinid’a 18: BA

Highlight

Copy