Ad’u Tinda 11
11
Ni gong nga fiyaka Babel-la
1Ei avok dei gak kur bur máma, suma yam andagad’ina pet vunazi ni tu, zla mazi d’a ded’a ni tu mi. 2Wani azi i irazi abo ma yorogona, azi fe yima djivi ma abo tam tuna yam andaga d’a Sinar-ra, azi kak kua. 3Azi de tazi ala: Ei iya, ei tchi derengelâ, ei geiziya. Derengelâ mi mbut d’igi ahuniyôna na mi mbut ni d’igi simod’a na ki lubu ma adrengâ.
4A de tazi kua ala: Ei i mini azì ma ngolâ ki gong nga ngol la fiyak ka yat do hur alonid’a, ar simiyeî mi yiya, kayam ei b’rawei woi yam andagad’a d’i.
5Kayam ndata, Ma didina mi tchugï asem kä á gol azina ki gong nga fiyak ka akulo d’a suma a nga minita. 6Ata yi máma mi dala: Gola! Azi pet ni suma tuna, azi de ni vun ma tuna mi; vama azi tinim ad’um á led’a ki tchetchembina, vama d’elezi bugol á le vama azi tin huruzi kam á luma nga d’i. 7Ar ei tchugi asei kä, ei walazi vunazi woi teteng, ar sa mi hum vun ndram mbi.
8Nata yi máma ba, Ma didina mi b’rawazi woi yam andagad’a pepet. Ni kayam ndata ba, azi ar bei min azì máma. 9Ni kayam ndata ba, a yi yi máma ala Babel, kayam ni kua ba, Ma didina mi gizeî vuna hi suma yam andagad’ina woi pet; ni kua ba, Ma didina mi b’rau suma woi yam andagad’a pet mi.
Andjafâ hi Sem-ma gak mba ata Abraham
10Wana nandjafâ hi Sem-ma: Sem mi le bizad’a kis, mi vut Arpaksat; ni kur biza d’a mbàd’a bugol mbiyo ma kusâ. 11Bugol la Sem mi vut Arpaksat vuta, mi le bizad’a kikis vahl, mi vut gro andjofâ ki gro aropma mi.
12Arpaksat mi le bizad’a dok hindi yam vahl, mi vut Sela. 13Bugol la Arpaksat mi vut Sela vuta, mi le bizad’a kikis fid’i yam hindi, mi vut gro andjofâ ki gro aropma mi.
14Sela mi le bizad’a dok hindi, mi vut Heber. 15Bugol la Sela mi vut Heber vuta, mi le bizad’a kikis fid’i yam hindi, mi vut gro andjofâ ki gro aropma mi.
16Heber mi le bizad’a dok hindi yam fid’i, mi vut Pelek. 17Bugol la Heber mi vut Pelek vuta, mi le bizad’a kikis fid’i yam dok hindi, mi vut gro andjofâ ki gro aropma mi.
18Pelek mi le bizad’a dok hindi, mi vut Rehu. 19Bugol la mi vut Rehu vuta, mi le bizad’a kikis mbà yam zlengâ, mi vut gro andjofâ ki gro aropma mi.
20Rehu mi le bizad’a dok hindi yam mbà, mi vut Seruk. 21Bugol la Rehu mi vut Seruk vuta, mi le bizad’a kikis mbà yam kid’iziya, mi vut gro andjofâ ki gro aropma mi.
22Seruk mi le bizad’a dok hindi, mi vut Nahor. 23Bugol la Seruk mi vut Nahor vuta, mi le bizad’a kikis mbà, mi vut gro andjofâ ki gro aropma mi.
24Nahor mi le bizad’a dok mbà yam zlengâ, mi vut Tera. 25Bugol la Nahor mi vut Tera vuta, mi le bizad’a kis yam dogo yam zlengâ, mi vut gro andjofâ ki gro aropma mi.
26Tera mi le bizad’a dok kid’iziya, mi vut Abram, Nahor ki Haran.
Andjafâ hi Tera-na
27Wana nandjafâ hi Tera-na: Tera mi vut Abram, Nahor ki Haran. Haran mi vut Lot. 28Haran mi mit avok abum Tera kur ambas sa a vud’um kuad’a avo Ur ra Kalde-d’a#11.28 Kalde: Nala, Andaga d’a Babilon-nda.. 29Abram azi ki Nahor a vik aropma; Abram amamba a yat ala Sarai, d’a hi Nahor-ra a yat ala Milka ni Haran goromba, mam mi Milka azi ki Jiska abuziya. 30Sarai ni gendreged’a, nga d’i vut ti.
31Tera mi yo goroma Abram ki Lot gorâ hi goroma Haran-na kakunomba Sarai atchad’a hi goroma Abram-mba, mi tchol ki sed’ezi avo Ur ra Kalde-d’a á i yam ambas sa Kanan-nda. Azi mbaza yam ambas sa Haran-nda, a kak kua. 32Tera mi le bizad’a kikis mbà yam vahl, mi mit avo Haran kolâ.
Currently Selected:
Ad’u Tinda 11: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
