Ad’u Tinda 19
19
Lot mi sut tei kur Sodom
1Ki fladeged’a malaika suma mbà ndazina a mba Sodom. Lot mi nga kaka kä avun azì ma Sodom-ma. Kid’a mi wazid’a, mi tchol mi d’uguloziya, mi grif kä, mi tchok yam kä andaga avoroziya, 2mi dazi ala: Suliyona, an nga ni tchenegiya, agi mbeyegi avo hazong magina, agi mbuzugi asegiya, agi burugi kä to; ndjivin yorogo tua ba, agi igiya.
Azi hulong dum ala: Hawa! Ami burumi nabu ka hî.
3Wani vunam kal kazi gak azi i avo hatamu, mi lazi tena, mi yazi avungô ma bei angufina, a te. 4Kid’a azi bur nga kä d’uo tua d’a, suma Sodom-ma, nala, azungeîna ki momorogeina pepet, a mba, a ngui azina hi Lot-na, 5a yï Lot tei a dum ala: Suma a mba adjï fladege avo hatangâ, a nga ni lara ge? Ang buzuguzï woyo; ami burumi ki sed’eziya.
6 Lot mi nde woi avun azina, mi duk vuna blogomu, 7mi dazi ala: B’oziyona, an tchenegiya, agi lagi tcho d’a hina d’a d’i. 8Gola! Grona a nga yuguneina mbà, ni suma a bur nga ki sa d’uo tua na. An i ni yogizï abua; agi lagi vama hurugi mina ki sed’eziya, wani agi lagi va ki sum ndazina d’i, kayam azi nakoyogei mana.
9Azi hulong dum ala: Ang hut tang ngeyo! Azi de kua ala: Sa máma mi mba ni mbeid’a adigeya, mi ndak á ka sariyad’a kei zu? Ang le hut tang ngei d’uo ni, ami lang ini vama tcho ma kal ma ami lum ini mi sum ndazinina. Azi hep Lot kad’enga, a hut go á hal á kus vun azina. 10Wani malaika ndazina a mat aboziya, a veï Lot krovo geveziya, a duk vun azina, 11a duk ir suma a nga abu avun azinina woi pet, gugureina ki suma nglona; azi nde hal vun azina pî, a fum mbi.
12Malaika ndazina a de mi Lot ala: Ang nga ki sum mang suma dingâ ka hî zu? Grong suma andjofâ ki suma aropma d’oze akuniyôngâ ki sa mang ma ding nga zu? Ang yozi woi kur azì máma, 13kayam Ma didina mi sunumï kayam ami i b’lagam mbeyo. Ami b’lagam mi, kayam käl la suma a kal kam avok Ma didinid’a ti kal ngola heî.
14 Lot mi i fakuniyôm suma a nga tit yam gromina, mi dazi ala: Agi tchologi atogo zak! Agi buzugugi woi ata yima wana kayam Ma didina nga mi b’la’î azì máma. Wani akuniyôma a golomî d’igi mam dazi ni zla d’a sanda na.
15Wani ki pipira, malaikana a tes Lot ped’et, a dum ala: Ang tchol akulo, ang vamanga ki grong suma arop suma mbà suma ka hina, kayam ami tchagi zlapa ki sum ndazina yam tcho mazid’a d’i.
16Wani kid’a Lot nga mi le lilinga tua d’a, malaikana a vum abom kamamba ki grom suma arop suma mbàna, a ndum mbei kel azina, kayam Ma didina mi min á sud’umu. 17Kid’a azi buzuk kei kela, malaikana tu mi de mi Lot ala: Ang ring sut tangû, ang gol irang blogong ngi, ang tchol aduk hur fula d’uo mi. Ang ring yam ahinad’a, kayam ang ba woi d’i.
18 Lot mi hulong dum ala: Salana, hawa! 19Gola! An azong mangâ; ang wan hohowonu, ang lan djivid’a ngola heî, ang sud’un wa. Wani an ndak á tcha yam ahinad’a bei ndaka fan á tchan ndi. 20Ang gol azì ma wana ni go, mi gogora, an i ni ngei tan kua; kayam mi gogora an i sut tan kua d’uo zu?
21Malaikana mi dum ala: Gola! An wang hohowong kua, an nga ni b’lak azì ma ang de kam máma d’i. 22Ang ring kua atogo, kayam an nga ni le va biya d’i, gak ang kal kua tua. Ni kayam ndata ba, suma a nga yi azì máma ala Sowar.
23Kid’a afata deîd’a, Lot mi kal Sowar. 24Ma didina nde mi yagï sufred’a#19.24 Sufred’a: Nala, Vama tam grumgrum ma ngal kakud’a akulo ngola d’uk yina huwak, his máma ni tchod’a. kakud’a ei akulo yam Sodom ki Gomor. 25Mi b’lak azì máma woi ki ful mamba ki suma a nga kaka kuruma pet kahle suma a deî yam andagad’ina mi. 26Ata yima atchad’a hi Lot-ta ti mbut irat ti gol blogotna, ti mbut d’igi ndjuvuna na, ti ar tchola gongzong.
27Abraham mi nde iram yorogo tcholol, mi i ata yima mam tchol avok Ma didina kuana, 28mi gol iram abo ma Sodom ki ma Gomor-râ ki ful mata pet, mi we andosâ nga mi d’us yam andagad’a d’igi andosâ halamba ngolina na.
29Wani ata yima Alona b’lak azì máma woi ki ful mamba b’la’â, mi djib’er yam Abraham. Ni kayam ndata ba, Alona mi pat Lot tei kur ndak ka ngola ata yima mam b’lak azì ma mam nga kaka kuana woina.
Lot grom sum aropma
30 Lot mi le mandarâ á kak kur Sowar, mi i yam ahinad’a ki grom suma arop suma mbàna, mi kak kur zul ahinad’a ki sed’eziya. 31Bur tu d’a ngola ti de mi wiyet ta gora ala: Gola! Iba mi mbut ni mamara; sa nga ka hî yam andaga d’a wanda tala mi mba mi vigi d’igi suma pet a nga le yam andagad’a hina d’a d’i. 32Ei i hei Iba süm ma ayîna, ei buri ki sed’emu, kayam ei djogom andjavamu.
33Azi he süm ma ayîna mabuzi mi gurud’a; kur andjege ndata d’a ngola ti i bur ki sed’emu. Mi we nga bur ma ti bur ki sed’ema, d’oze tchol la ti tchol id’a d’uo mi.
34Wani tcha ndjivinda, d’a ngola ti de d’a gora ala: Ndak gola! An bur kama andjege ki Iba; ei hum süm ma ayîna ini andjege kua, ndak i bur ki sed’em mi, kayam ei djogom andjavamu. 35Kur andjege ndata azi he süm ma ayîna mabuzi kua, d’a gora ti i bur ki sed’emu. Mi we nga bur ma ti bur ki sed’ema, d’oze tchol la ti tchol id’a d’uo mi.
36Ni hina ba, Lot grom suma mbàna a vik wureina ki sed’emu. 37D’a ngola ti vut gor mandjufâ, ti yum ala Mowap; ni suma Mowap-ma abuzi ngola gak ini. 38D’a gora ti vut gor mandjufâ, ti yum ala Benami; ni suma Amon-na abuzi ngolo gak ini.
Currently Selected:
Ad’u Tinda 19: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
