Ad’u Tinda 21
21
Sara ti vut Isak
1Ma didina mi djib’er yam Sara d’igi mam dadjeu na, mi le ki sed’et d’igi mam de na. 2Sara ti ve wirâ, ti vut gorâ mi Abraham ki mamaram kur biza d’a Alona ngamzid’a. 3Abraham mi yi gorom ma Sara vud’umzina ala Isak. 4Abraham mi ngat goroma Isak bayâd’a kur bur ma klavandina d’igi Alona mi dum na. 5Ata yima Abraham mi vut goroma Isa’â, bizamî kis.
6Sara ti dala: Alona mi han vama sanda. Nge nge pî ma huma mba mi san yam zla manda. 7Ni nge ba, mba mi de mi Abraham ala: Sara d’i hapona mi gugureina ge, kayam an vud’um gorâ ki mamaramu.
Abraham mi dik Agar ki gorotna Ismael leyo
8Isak nga mi wula, mi ar apona bei tched’a. Ata yi máma Abraham mi le te ma ngolâ á luna kamu. 9Bur tu Sara ti we Ismael Agar ra Ezipte-d’a gorot ma ti vud’um mi Abraham-ma, nga mi las Isak. 10Kayam ndata, Sara ti de mi Abraham ala: Ang dik magom ndata woi ki gorotna, kayam gorotna mi te djona ki gorona Isak ki.
11Zla ndata zal Abraham hurum ngola yam goroma. 12Wani Alona mi de mi Abraham ala: Ar hurung zal yam zlad’a hi gorâ ki magom mangid’a d’i. Vama Sara ti duma ang humumu, kayam nandjafâ hi Isa’â hol ba, a mba ndumum andjavangû. 13Wani magomba gorotna pî, an mba ni zulum andjavam ngola, kayam mam mi gorongâ.
14Abraham mi nde yorogo tcholol, mi hlavungôna ki gugura mbina, mi he mi Agar, mi tinit gorotna keled’u, mi dat ala: Ndak iya. Ndat ti iya, ti vit tei hur ful ma Berseba-na.
15Ata yima mbina mi dap pei kur gugurina, ti tin gorotna kä ad’u azlupa, 16ti i kak sä woi hina dei d’igi sana mi yet yeûd’a ti i d’i nde kä na. Ti dala: Ar an we matna hi goronina d’i. Ti i d’i kak sä woi hina dei, ti nde tchina ki delet akulo.
17Alona mi hum del gorâ; malaikana hAlonina mi yi Agar ei akulo, mi dat ala: Agar, vama la’î me ge? Ndak le mandar ri, kayam Alona mi hum del gorâ ata yima mi nga kuana. 18Ndak tchol akulo, ndak hle goro’â akulo, ndak vum kabogu, kayam an mba ni zulum andjavam ngola.
19Alona mi malat irat teyo, ti we golonga, ti oî gugura ki mbina, ti he mi gorotna. 20Bugola, Alona mi ngom Ismael; mi djeng sana, mi kak abagei hur fulâ, mi mbut ni sama nduwanda ki yeûd’a, 21mi ka’î kur ful ma Paran-na; asum mbi vum gor ra Ezipte-d’a.
Abraham mi djin vunam ki Abimelek
22Kur atchogoi ndata, Abimelek ki Pikol ma ngolâ hi azigar mamina a mba gen Abraham, a dum ala: Ahle suma ang nga lazina pet, Alona mi nga ki sed’engû. 23Ki tchetchemba, ang gunun tang avok Alona ka hî ala ang mba mbud’un iran ki grona ki gron ngolona d’i. Ang lan djivid’a yam andaga d’a ang nga kaka kurut wanda d’igi an lang djivid’a na mi.
24Abraham mi dum ala: An nga ni gun tanu.
25Abraham mi ngop Abimelek yam golong nga azungeî mama a hlat kad’engid’a. 26Abimelek mi hulong dum ala: An we nga sama mi lahle ndazinina d’i; ang dan nga avok ki, an humî ini tua.
27Bugola, Abraham mi yo tumiyôna kamuzleina, mi hazi mi Abimelek; azi djak a djin vunaziya. 28Abraham mi yo gro tumiyôna kid’iziya, mi tinizi irazi vaziya. 29Abimelek mi de mi Abraham ala: Ang ka gro tumiyô suma kid’iziya suma wana irazi vazi na na ge?
30Abraham mi hulong dum ala: Ang ve gro tumiyô suma kid’iziya wana abonu; azi ni glangâs mana ala ni an ba ni ka golong ndata.
31Kayam ndata, suma a yi yi máma ala Berseba, kayam suma mbà ndazina a gun tazi ni kua.
32Abraham azi ki Abimelek a djin vunazi ni Berseba. Abimelek ki Pikol ma ngolâ hi azigar mamina a tchol a hulong yam andaga d’a Filistê-d’a.
33Abraham mi pe atchinda avo Berseba; ata yi máma mi tchen ki simiyê Ma didina Alo ma nga kur atchogoi d’a lara ge petna. 34Abraham mi kak ngola yam andaga d’a Filistê-d’a.
Currently Selected:
Ad’u Tinda 21: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
