Ad’u Tinda 25
25
Abraham andjavam ma dingâ
1Abraham mi vatcha d’a dinga, simiyêt ala Ketura. 2Ti vud’um Zimran, Joksan, Medan, Madiyan, Jisbak ki Suwa. 3Joksan mi vut Seba ki Dedan; Dedan groma ni suma Asur-râ, suma Letus-sâ ki suma Leuma-na. 4Madiyan groma ni Efa, Efer, Enok, Abida ki Elda. Azi pet ni Ketura grotna.
5Abraham mi hahle mama pet mi Isak, 6wani kid’a mam nga ki iram tua d’a, mi hahlena mamiyôm suma gureina grozina, mi walazi woi ki goroma Isak, mi dazi ala a i yam andagad’a abo ma yorogonid’a.
Abraham mi mid’a
7Wana ni biza d’a Abraham mi lata: Mi le bizad’a kis yam dok kid’iziya yam vahl, 8mi mbut mamara kikra, mi le furîd’a ki mamaramu, mi mid’a. 9Groma Isak azi ki Ismael a tozom kur zul la Makpela d’a kur asinena hi Efron Sohar ma Het-na d’a nga avok Mamre d’ara. 10Nasine ma Abraham mi guzum abo suma Het-nina; azi tos Abraham azi ki Sara ni kua. 11Bugol matna hi Abraham-ma, Alona mi b’e vunam yam goroma Isak; mam i mi kak avun golong nga Lahai-Royi-d’a.
Andjafâ hi Ismael-lâ
12Wana nandjaf Ismael Abraham gorom ma Agar ra Ezipte d’a magomba hi Sara-d’a ti vud’umzina: 13Wana ni simiyê Ismael groma ad’u vut mazid’a: Gorom ma ngolâ ni Nebayot. Bugola, a vut Kedar, Atpel, Mipsam, 14Misma, Duma, Masa, 15Hadat, Tema, Jetur, Nafis ki Ketma. 16Wana ni Ismael grom suma dogo yam mbàna simiyêzi ki yazi ma kaka ki zlub’u mazid’a ad’u andjavazi kamulei mazina mi. 17Wana ni biza d’a Ismael mi lata: Mi le bizad’a kis yam dok hindi yam kid’iziya, mi mid’a. 18Andjaf Ismael mi kak aduk Havila ki Sur, tinï ad’ud’a avun andaga d’a Ezipte-d’a dei gak mba Asiri; azi pet a kak ngagad’a yam b’oziyozina d’ar.
JAKOB
(25.19—36.43)
Rebeka ti vut Esau ki Jakob
19Wana ni zla d’a de d’a yam Isak Abraham goromid’a: Abraham mi vut Isak; 20Isak mi le bizad’a dok fid’i, mi ve Rebeka, gora hi Betuwel ma Aram ma nga kaka Padan-Aram-ma#25.20 Padan-Aram: Ni Mesopotami., ndat ni Laban wiyemba.
21Isak mi tchen Ma didina yam amamba, kayam ndat ni gendreged’a. Ma didina mi hum tchen mamba; amamba Rebeka ti ve wirâ. 22Grona a nde ndjiget tazi kurud’u, ti dala: Le ni na ni, an ve wirâ na na ge? Ti i tchen Ma didina.
23Ma didina mi hulong dat ala: Andjaf suma mbà a nga kurugu; andjaf suma mbà ndazina a mba wal woi ni kuruk dei. Ma dingâ mba mi kal ndrama kad’enga, ma ngolâ mba mi ge yam kä ad’u ma gorâ.
24Ata yima bur mat ma vuta nda’â, gol wani, ngoneîd’a nga kurud’u. 25Ma ndeï avo’â tamî hleud’a d’igi baru d’a tumusa na. Ni kayam ndata ba, a yum ala Esau#25.25 Esau: Nala, Ma tumusa. Ni mam ba, a yum ala Edom mi.. 26Bugol wani wiyema nde woyo, abom mi ved’a dodogasem Esau. Ni kayam ndata ba, a yum ala Jakob#25.26 Jakob: Nala, Ma ve dodogasema.. Ata yima a vud’uzina Isak bizamî dok karagaya.
Esau mi he ngol mamba mi Jakob yam tena
27Kid’a gro ndazina a djenga, Esau mi mbut sama nduwan ma tchahlena heîna; Jakob ni sama iram si’â, mi ni kaka kä avo. 28Isak mi le yam Esau, kayam mam nga mi te hliu ma Esau tchumzina. Wani Rebeka ti le ni yam Jakob.
29Wani bur tu, ata yima Jakob nga mi min te ma djivinina, Esau mi tcholï abagei ata yima nduwanda, mi seî heî, 30mi de mi Jakob ala: Meid’a tchan heî. Ang aran an te te ma hleu ma wana. Ni kayam ndata ba, suma a yi Esau ala Edom#25.30 Edom: Nala, Hleud’a..
31Wani Jakob mi hulong de mi Esau ala: Ang han ngol manga tua.
32Esau mi hulong dum ala: An lá matna abo meid’a d’oü mina, an le ni me ki ngol ge?
33Wani Jakob mi dum ala: Ang gunun tang tua. Ata yi máma Esau mi gunum tamu, mi gus ngol mamba woi abo Jakob. 34Jakob mi hum avungôna kalit ma kura; Esau mi te, mi tche, mi tchol mi iya; ni hina ba, Esau mi gol ngol mamba is.
Currently Selected:
Ad’u Tinda 25: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
