Jean 13

DIMAS SA DABI D’A JESUS MI LAT GO KI JERUSALEM-MBA

(13—19)

Jesus mi mbus mam suma hata aseziya

1Avok vun til ma Pa’â, ata yima Jesus mi we ler mam mba mba go á ar duniyad’a á hulong gen Abuma, mi le yam mam suma kur duniyad’ina le d’a kal papad’a.

2Avok tena, Diable mi kal wa zlad’a kur Judas Iskariyot Simon goroma á he Jesus abo suma. Kid’a azi nga avun tena tua d’a, 3Jesus mi wala Abum mi hum wa ahlena pet abomu, mam tcholï ni gevemu, nga mi hulong gevem mi d’a, 4mi tchol akulo avun tena, mi fok baru mama woyo, mi yo baru d’a set tad’a, mi djinit furumu. 5Bugola, mi vo mbina kur tazana, mi nde mbus mam suma hata aseziya, mi sed’ezi asezi woi ki baru d’a mi djinit furumba. 6Ata yima mi mba yam Simon Pierre-râ, Pierre mi dum ala: Salana, ni ang ba, mbuzun asen ndju?

7Jesus mi hulong dum ala: Vama an luma, ang nga wum ka tchetchem mbi, wani ang mba wum ad’um bugolo.

8Pierre mi hulong dum ala: Ang ndak á mbuzun asen ndi.

Jesus mi hulong dum ala: Le an mbuzung aseng nguo ni, angî mana d’i.

9Simon Pierre mi dum ala: Salana, ang mbuzun nasen hol li, wani ang mbuzun abon ki yan mi.

10Jesus mi dum ala: Sama mbus tam dana, nga mi hal mbusa d’i, arî asem hol, kayam tam pet ni yed’et. Agi ni yed’et, wani agi nga ni yed’et pet ti. 11Jesus mi we wa ma mba mi hum abo sumina. Ni kayam ndata ba, mi dala: Agi nga ni yed’et pet ti.

12Bugol la mi mbuzuzi asezi dad’a, mi yo baru mama, mi tchugum atamu, mi hulong kak kä, mi dazi ala: Agi wagi ad’u vama an lagizi wana ko zu? 13Agi nga yan ala Ma hat suma, Salamina. Agi yan nata yad’u, kayam an ni mamu. 14Le an ni Salagina ni ma had’agina mi ba, ni mbuzugi asegiya ni, agi pî mbuzugi asem tagi na mi. 15Kayam an simad’agi wa, agi lagi d’igi an lagi na mi. 16Gagazi, an nga ni dagiya, azongâ nga mi kal salama ki ngola d’i. Ma a sunuma nga mi kal salam ma sunuma ki ngola d’uo mi. 17Le agi wagi ahle ndazina, le agi lagi sunda kazi mi ni, agi lagi furîd’a.

18An de ni kagi pet ti, an we suma an manazina. Ni kayam zla d’a a b’irit kur mbaktumba hAlonid’a ala: Mam ma nga mi te tena ki sed’ena, mi mbut iram mi kak djangûna ki sed’enu d’a ndak memet. 19Ki tchetchemba, an nga ni dagi avok va máma bei mbad’a, kayam fata mi mbad’a, agi mba hagi gagazid’a ala an ni Ma nga na. 20Gagazi, an nga ni dagiya, sama ve sama an sunuma atama, mi van ni anu. Sama van an atama, mi ve nAbun ma mi sununïna atam mi.

Jesus mi de woi ala Judas mba mi hum abo suma

(Gol Mat 26.20-25; Mar 14.17-21; Luc 22.21-23)

21Kid’a Jesus mi de zla ndata dad’a, hurum hat ngola, mi lazi glangâsâ woi ala: Gagazi, an nga ni dagiya, ma dingâ tu adigagi mba mi han abo suma.

22Suma hata a nde gol ir taziya, kayam me a we nga sama mam nga mi de kama d’i. 23Ma dingâ aduk mam suma hata, ni ma Jesus mi le kam heîna, mi nga kaka kä avun tena go ki Jesus. 24Simon Pierre mi lum abomu, mi djobom ala: Ang djop Jesus go mi de ni yam nge ge?

25Ma hata ma mi nga go ki Jesus ma deng tam atama, mi djobom ala: Salana, ni nge ge?

26Jesus mi hulong dum ala: Ma an nga ni duvun avuna ni humzina, ni mamu. Ata yi máma, mi duvun avuna, mi hum mi Judas Simon Iskariyot goroma. 27Bugol la Judas mi vavuna dad’a, Seitan mi kal kurumu. Kayam ndata, Jesus mi de mi Judas ala: Vama ang luma, ang lum atogo.

28Wani aduk suma a nga ki sed’em avun tenina pet, sama wäd’u zla d’a mi dumzid’ina nga d’i. 29Kayam Judas ni sama bid’im mba gurzud’a nga aboma, suma hiuna a djib’er ala Jesus mi dum ala: Ang i guzî ahle suma ei minizi á vun tilîna, d’oze, Ang i he ni va mi suma hohoud’a kla ge. 30Kid’a Judas mi vavu máma dad’a, ata yi máma na wat mi ndabua, yina mbut andjege da’.

Vun ma he ma awilina

31Kid’a Judas mi ndabu dad’a, Jesus mi dala: Ki tchetchemba, subura hi an Gor Sanid’a ti nde woyo, subura hAlonid’a mba d’i nde woi kan mi. 32Le subura hAlonid’a ti nde woi kanu ni, Alona mba mi nde subura hi an Gor Sanid’a woi kam mam tamba, mba mi le atogo zak mi. 33Grona, an nga ki sed’egi tua ndjö. Agi mba halanu, wani d’igi an de mi Juif-fâ na ala: Yima an i kuana, agi ndak á igi kua d’i, ki tchetchemba an nga ni dagi hina mi. 34An nga ni hagi vun ma he ma awilina ala: Ar agi lagi yam tagiya. D’igi an le kagi na, ar agi lagi yam tagi na mi. 35Le agi nga lagi od’a yam tagiya ni, suma pet a mba wala agi ni man suma hata.

Jesus mi de woi yam tin vuna hi Pierre-râ

(Gol Mat 26.31-35; Mar 14.27-31; Luc 22.31-34)

36Simon Pierre mi dum ala: Salana, ang i ni lara ge?

Jesus mi hulong dum ala: Yima an i kuana, ang ndak á i ad’un ki tchetchemba d’i, wani ang mba iza ad’un ni bugol tua.

37Pierre mi dum ala: Salana, ni kayam me ba, an ndak á tit ad’ung ka tchetchem mbuo ge? An min he tan ndei kangû.

38Jesus mi hulong dum ala: Ang min he tang ngei kan ndju? Gagazi, an nga ni dangû, avok ahle’â bei hela, ang mba tin vunang kan yang hindi ala ang wan nga d’i.

Currently Selected:

Jean 13: BA

Highlight

Copy