Jean 8

Atcha d’a mizeuna

1Jesus mi i djak yam ahina d’a Olif-fa. 2Ki yorogo tcholola, mi hulong kur gong nga kud’ora hAlonid’a. Suma pet a mbeï gevemu, mi kak kä, nga mi had’aziya. 3Suma hat gata azi ki Fariziyêna a mba katcha d’a a vad’ï ata yima mizeunid’a. A tcholot avok suma pet, 4a de mi Jesus ala: Ma hat suma, atcha d’a wanda, ami vamizi nata yima mizeuna. 5Kur gata, Moise mi hami vuna ala arop suma hina na, ami durumizi ni kahuniyôna. Ang de nana mi na? 6A de hina á kugum tala azi fe lovota á vum ki zlad’a d’a. Wani Jesus mi d’ok yam kä, mi nde b’ir ki tchitchid’am kä andaga.

7Kid’a azi nga djobom kua kuad’a, mi hle yam akulo, mi dazi ala: Sama bei le tchod’a adigagi ni nge kla ni, ar mi gatcha ndata kahinad’a avogo. 8Jesus mi hulong d’ok yam kä, nga mi b’ir ki tchitchid’am kä andaga. 9Kid’a azi hum hina d’a, azi pet a buzuk kei tutu, tin ad’ud’a ata suma nglona gak mba yam ma danan kisâ, a ar Jesus vam tu katcha ndata tchola avoromu. 10Jesus mi tchol akulo, mi dat ala: Atchad’a, sum ndazina a ni lara d’ö? Sama kak sariyad’a ka’â nga d’i?

11Ti dum ala: Salana, sa nga d’i.

Jesus mi dat ala: An tanda nga ni kak sariyad’a kak kuo mi; ndak iya, ndak dok le tchod’a d’uo d’a.]

Jesus ni b’od’a hi suma kur duniyad’ina

12Jesus mi de mi Fariziyêna kua ala: An ni b’od’a hi suma kur duniyad’ina. Sama tit ad’una, mba mi tit kur nduvunda d’i, wani mba mi tit ni kur b’o manda.

13Fariziyêna a dum ala: Ang nga le glangâsâ yam tangû; glangâs mangâ mi ndak ki.

14Jesus mi hulong dazi ala: Le an le ni glangâsâ yam tan pî, glangâs mana ni gagazi, kayam an we yima an tcholï kuana ki yima an i kuana mi, wani agi wagi nga yima an tcholï kuana d’oze yima an i kuana d’uo mi. 15Agi kagi sariyad’a ni yam minda hi sumid’a, an nga ni ka sariyad’a yam sa d’i. 16Wani, le an ka sariyad’a pî, sariya manda ni gagazi, kayam an ni van tu d’i, wani an ni kAbun ma sununïna. 17Wani a b’ir kur mbaktum magi d’a gata ala: Glangâsâ hi suma mbà ni ndaga. 18An ni ma nga ni le glangâsâ yam tana, Abun ma sununïna nga mi le glangâsâ kan mi.

19Kayam ndata, azi djobom ala: Abung mi nga ni lara ge?

Jesus mi hulong dazi ala: Agi wan nga an ndi, agi wagi nga Abun ma sununïna d’uo mi. Ladjï agi wanu ni, agi mba wagi Abun mi.

20Jesus mi de zla ndata nata yima a tchuk bege d’a he d’a hawad’a kuana kid’a nga mi hat suma kur gong nga kud’ora hAlonid’a, wani sa tin nga abom atam mbi, kayam yi máma mi ndak nga biya d’i.

Yima an nga ni i kuana, agi ndak á igi kua d’i

21Kayam ndata, Jesus mi dazi kua ala: An nga ni iya. Agi mba halanu, wani agi mba bogi kur tcho magid’a. Yima an nga ni i kuana, agi ndak á igi kua d’i.

22Kayam ndata, Juif-fâ a de tazi ala: Mi i tchi ni tam zu? Kayam mi dala: Yima an nga ni i kuana, agi ndak á igi kua d’i. 23Jesus mi dazi ala: Agi ni suma kä na, an ni ma akulona, agi ni suma hi duniyad’ina, an ni hi duniyad’ina d’i. 24Kayam ndata, an dagi ala: Agi mba bogi kur tcho magid’a. Le agi hagi gagazid’a ala an ni Ma nga na d’uo ni, agi mba bogi kur tcho magid’a.

25Kayam ndata, azi dum ala: Angî nge ge?

Jesus mi dazi ala: An ni mam ma an dagizi zlam avo’â. 26An nga ki zla d’a ngola kagi á ded’a, á ka sariyad’a kagi mi. Wani mam ma sununïna, ni Ma gagazina. An nga ni de mi suma yam andagad’ina vama an humumï avunama.

27Wani azi we nga d’ala Jesus mi dazi ni yam Abumu d’a d’i. 28Kayam ndata, Jesus mi dazi ala: Fata agi gabagi wa an Gor Sana akulo ni, kur bur máma agi mba wagi ala an ni Ma nga na. An nga ni le va yam tan ndi, wani an nga ni de ni vama Abun had’andjina. 29Mam ma sununïna, mi nga ki sed’enu, nga mi aran van ndi, kayam an nga ni lahle suma lum tam djivid’ina burâ ki burâ.

30Kid’a mi de zla ndatid’a, suma ablaud’a a he gagazid’a kamu.

Gro vuta azi ki magumeina

31Kayam ndata, Jesus mi de mi Juif suma a hum gagazid’ina ala: Le agi gagi yagi kä ad’u zla manda ni, gagazi, agi ni man suma hata, 32agi mba wagi gagazid’a, gagazi ndata mba d’i mbud’ugi gro vuta.

33Azi hulong dum ala: Ami nandjafâ hi Abraham-ma, ami lami nga magom mi sa yami tu d’i. Ni nana ba, ang dala ang mba mbud’umi gro vuta ge?

34Jesus mi hulong dazi ala: Gagazi, an nga ni dagiya, sama lara pî ma nga mi le tchod’ina ni magoma hi tchod’ina. 35Magoma nga mi kak avo gak didin ndi, wani gor vuta nga mi kak gak didin. 36Le an Alona Goroma ni mbud’ugi gro vuta ni, agi mba kagagi ni gro vut ta gagazid’a. 37An wala agi nandjafâ hi Abraham-ma, wani agi nga halan á tchid’a, kayam zla manda fe nga yima kaka kurugi d’i. 38An dagi nahle suma an wazï avo Abuna, wani agi lagi nahle suma agi humugizi avun abugina mi.

39Azi hulong dum ala: Abumi ni Abraham.

Jesus mi dazi ala: Ladjï agi ni Abraham groma ni, agi lagi ni sunda hi Abraham-mba. 40Wani ki tchetchemba, agi nga halan á tchid’a, an ma dagi zla d’a gagazi d’a an humud’ï avun Alonid’a. Abraham mi le nga hina d’i. 41Agi nga lagi ni sunda habugid’a.

Kayam ndata, azi dum ala: Vud’umi nga kur mizeuna d’i, Abumi ni tu, nAlona.

42Jesus mi dazi ala: Ladjï Alona nAbugiya ni, agi mba lagi kanu, kayam an tcholï ni gen Alona ba, ni mba wana, kayam an mba ni yam tan ndi, wani ni mam ba, mi sununïya. 43Ni kayam me ba, agi humugi zla man nda ded’a d’uo ge? Ni kayamba agi ndagagi á hum zla manda d’uo d’a. 44Agi suma abugi ni Diable-na, agi min lagi ni minda habugid’a. Mam mi ma tchi matna kad’u tinda dei, mi nga mi tit yam gagazid’a d’i, kayam zla d’a gagazid’a nga kurum mbi. Ata yima nga mi de zla d’a kad’ina, mi de ni yam mam tamba, kayam mam mi ma ka zlad’a, ni zla d’a kad’a abut mi. 45Kayam an nga ni dagi ni zla d’a gagazid’a, agi nga hagi gagazid’a kan ndi. 46Ni nge adigagi ba, mi van ki zla d’a yam tcho d’a an lata ge? Le an nga ni de ni zla d’a gagazid’a ni, ni kayam me ba, agi hagi gagazid’a kan nduo ge? 47Sama hAlonina nga mi hum zlad’a hAlonid’a, wani agi nga humugizi d’i, kayam agi nga ni suma hAlonina d’i.

Jesus azi ki Abraham

48Juif-fâ a hulong dum ala: Zla d’a ami dat ala: Angî ma Samari-na, ang nga ki muzuk ma tchona kurungû d’a, ni zla d’a gagazid’a d’uo zu?

49Jesus mi hulong dazi ala: An nga ki muzuk ma tchona kurun ndi. An nga ni he ngola mAbunu, wani agi minigi á han ngola d’i. 50Wani an nga ni hal subura yam tan ndi. Ma suburuna mi nga, ni ma nga mi ka sariyad’a mi. 51Gagazi, an nga ni dagiya, le sama ngom zla manda ni, mba mi mit ti gak didin.

52Juif-fâ a dum ala: Ki tchetchemba, ami wami tetet ala ang nga ki muzuk ma tchona kurungû. Abraham mi mid’a, suma djok vun Alona a bo mi, wani ang dala: Le sama ngom zla manda ni, mba mi mit ti gak didin. 53Ang kal abumi Abraham ma mitna ki ngola zu? Suma djok vun Alona a bo woi mi. Ang mbut tang ala angî nge ge?

54Jesus mi hulong dazi ala: Le an subur tanu ni, subur manda ni hawa yak. Ma suburuna nAbunu, ni mam ma agi nga dagi ala mam nAlo magina na. 55Agi wum nga d’i, wani an wumu. Ladjï an dala: An wum nga d’uo ni, an mbut ni sama ka zlad’a d’igi agi na mi. Wani an wumu, an nga ni ge yan kä ad’u zla mamba mi. 56Abugi Abraham mi le furîd’a á we bur ma mba mana. Mi wum mi, mi le hur ma hapma.

57Kayam ndata, Juif-fâ a hulong dum ala: Ang le nga bizad’a dok vahl hluo tua mi na, ang we Abraham ni nana?

58Jesus mi dazi ala: Gagazi, an nga ni dagiya, avok bei a vut Abraham-mba, an nga. 59Kayam ndata, azi yo ahuniyôna á durumu, wani Jesus mi ngei tamu, mi nde woi kur gong nga kud’ora hAlonid’a.

Currently Selected:

Jean 8: BA

Highlight

Copy