Luc 16
16
Ma ngom ahle ma lemba
1Jesus mi de mi mam suma hata ala: Sama ndjondjoîna mi nga ki sa mam ma ngom ahlena. Suma a mba de mi salama ala: Sa mangâ nga mi b’lagang ahligiyeng ngeyo. 2Salama mi yumu, mi dum ala: Ni zla me an humut kang na ge? Ang ndumun ahle mana, ang dok kak sama ngom ahle mana d’uo d’a. 3Ma ngom ahlena mi de kurum ala: An mba ni le ni nana? Kayam salana nga mi digin ndei kur sun nda ngom ahlena. Ad’engên nga á zum mbi, zulona nga mi lan á tchen ahlena mi. 4An we vama an mba ni lena. Hina wani, fata a digin ndei kur sun nda ngom ahlenid’a, suma a mba van avo hataziya.
5Mi yi suma balâ hi salama kazina tutu pet. Mi de mi ma avo’â ala: Balâ hi salanina kangî ga ge? 6Ma balâ kama mi dala: Gogong ma nga mbulâ kis. Ma ngom ahlena mi dum ala: Ang hleï mbaktum mang nga balâ, ang kak kä tchetchem, ang mbut mbaktum mang nga balâ gogong ma ngad’a dok vahl.
7Bugola, mi de mi ma bal ma dingâ ala: Balâ kangî ga ge? Ma balâ kama mi dum ala: Gogong ma nga gemena kikis vahl. Ma ngom ahlena mi dum ala: Ang hleï mbaktum mang nga balâ, ang mbud’ut kikis fid’i.
8Ma ngom ahle ma bei d’ingêrâ, salama mi suburum yam lem mba mi lata, kayam suma kur atchogoi d’a wandina a kal suma a nga kur b’od’ina ki lemba kur atchogoi mazid’a.
9An nga ni dagiya, vagi banad’a ki ndjondjoî magid’a kur duniyad’a. Ata yima ti dapma, a mba vagi atazi kur azì ma didina. 10Sama d’engzeng yam ahle suma akid’einina, ni sama d’engzeng yam ahle suma nglona mi. Sama bei d’engzeng yam ahle suma akid’einina, ni sama bei d’engzeng yam ahle suma nglona mi. 11Kayam ndata, le agi nga d’engzeng yam ndjondjoî d’a bei d’ingêra d’uo ni, sama mba mi hagi ndjondjoî d’a gagazid’a á ngomba ni nge? 12Le agi nga d’engzeng yam ahlena hi sama ding nguo ni, ni nge mba mi hagi magina ge?
13Azong ma tuna mi ndak á le sunda mi suliyod’a mbà d’i, wani mba mi noî ma tuna, mba mi le yam ma dingâ mi, d’oze mba mi kak ki ma tuna, mba mi ar ma dingâ woi mi. Agi ndagagi nga á lagi sunda mAlona ki beged’a djak ki.
Jesus mi de woi yam ahlena teteng
(Gol Mat 11.12-13; 5.31-32; Mar 10.11-12)
14Fariziyêna a hum zla ndata pet, a ngulumu, kayam azi ni suma a le yam beged’ina. 15Jesus mi dazi ala: Agi ni suma min á mbut tagi d’ingêr avok sumina, wani Alona mi wagi hurugiya, kayam vama suma suburum adigazina ni vama tchona avok Alona.
16Gata hi Moise-sa ki mbaktumba hi suma djok vun Alonid’a a ei nadjeu dei gak mba kur atchogoid’a hi Jean ma le suma batembid’a. Tin ad’ud’a kur bur máma dei gak suma a nga tchi wal Zla d’a Djivid’a yam leud’a hAlonid’a. Nge nge pî nga mi b’at tam kad’enga á kal kua. 17Akulod’a kandagad’a a mba kal leyo, wani b’ir ra klera hi gatid’a mba d’i kal lei hawa d’i.
18Sama lara ma mi dik amamba woi mi vatcha d’a dingina, mi le ni mizeuna. Sama vatcha d’a ndjuvut mi digit teid’a, mi le ni mizeuna mi.
Ma ndjondjoîna azi ki Lazar
19Adjeu sama ndjondjoîna mi nga. Nga mi tchuk baru d’a hleud’a ki baru d’a hap pa guzut kal teglesa atamu. Burâ ki burâ mi nga kaka ki furîd’a ki tena. 20Ma ding ma houd’a nga, simiyêm ala Lazar, tam pet ni mbuleina. Mi nga bur kä avun azina hi sama ndjondjoî máma. 21Mi min á te bubuk te ma nga mi yak kä ad’u tabulâ hi sama ndjondjoînina. Adureina pî a mba a trâm mbilimu. 22Ma houd’a mi mid’a, malaikana a hlum sä gen Abraham. Ma ndjondjoîna mi mit mi, a tozomu.
23Nga mi fe ndaka ata yima azuleina. Mi hle iram akulo, mi we Abraham sä woi hina dei, Lazar sä gevem mi. 24Mi nde mi tchiya, mi dala: Abun Abraham, ang wan hohowonu, ang sunï Lazar, kayam mi nik yam tchitchid’am aduk mbina, mi b’lengên ki sinanu, kayam an nga ni fe ndaka aduk akud’a heî.
25Wani Abraham mi hulong dum ala: Gorona, ang djib’er djiviya. Ata yima ang nga kur duniyad’ina, ang fe ni djivid’a, wani Lazar mi fe ni ndaka. Ki tchetchemba, a b’lengêm wa hurum ka hî, wani ang nga kur ndaka. 26Le hina d’uo pî, gring ma ngolâ mi nga adigeya. Suma a min á tchol ka hî á iza gevengîna a ndak ki, suma tchol sä hî á mba ka hî gevemina a ndak kuo mi.
27Ma ndjondjoîna mi dala: Abunu, le hina ni, an nga ni tchenengû, ang sun Lazar avo habunu, 28kayam b’oziyona a nga vahl. Mi dazi zlad’a, ar azi mba kur ndak ka wanda d’i. 29Wani Abraham mi hulong dum ala: Azi nga ki Moise azi ki suma djok vun Alona á daziya; ar azi humuziya!
30Mi dum ala: Nga na d’i, abun Abraham. Wani le sana mi tcholï ata yima azuleina ka hî mi i geveziya ni, a mba mbut huruzi yam tcho mazid’a.
31Abraham mi hulong dum ala: Le azi hum Moise azi ki suma djok vun Alona d’uo ni, sana le mi tchol akulo aduk suma matna pî, azi mba humum mbi.
Currently Selected:
Luc 16: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
