Luc 21

He d’a hawad’a hatcha d’a modono d’a hohoud’id’a

(Gol Mar 12.41-44)

1Jesus mi hle iram akulo nga mi gol suma ndjondjoîna a nga tchuk he d’a hawa mazid’a kur zandu’â kur gong nga kud’ora hAlonid’a. 2Mi watcha d’a modono d’a hohoud’a ti tchuk sisid’a mbà kur zandu’â. 3Jesus mi de mi mam suma hata ala: Gagazi, an nga ni dagiya, atcha d’a hohou d’a modono d’a wanda, ti tchuk kal suma dingâ pet, 4kayam suma a tchuk kur zandu’â petna a tchu’î bege mazi d’a zul atazid’a, wani ndat kur hohou mata ti tchu’î ahle suma ndat nga d’i ngom ki tatna pet.

Jesus mi de yam b’laka hi gong nga kud’orid’a

(Gol Mat 24.1-2; Mar 13.1-2)

5Suma hiuna a nga de tazi yam gong nga kud’ora hAlonid’a, yam min nda a minit kahina d’a djifa azi ki he d’a hawa d’a suma a he mAlonid’a mi. Ata yi máma, Jesus mi dazi ala: 6Burâ nga mi mba, ata yi máma, ahina d’a a mba arat akulo yam ndrat ahina d’a bei hôt kä woid’a nga d’i.

Ahle suma a le avok dabid’a hi duniyad’ina

(Gol Mat 24.3-14; Mar 13.3-13)

7Mam suma hata a djobom ala: Ma hat suma, ahle ndazina a mba le ni mindja ge? Vama simat ma mba mi le ba suma a mba wala ahle ndazina a mba wa go na ni me ge?

8Jesus mi dazi ala: Agi gologi tagi djiviya, ar sa mi vid’igi woi d’i. Kayam ablau suma a mba mba ki simiyênu, a mba dala: An ni Mesi máma, yi máma mi mba wa da’. Wani agi igi ad’uzi d’i. 9Fata agi humugi zla ayî ma durâ ki siwelid’a, ar vunadigagi d’i pat ti, kayam ahle ndazina mbeî a mba le, wani nad’u dabid’a hi duniyad’id’a ata yi máma d’i.

10Mi dazi kua ala: Andjaf ma dingâ mba mi tchol djangûna kandjaf ma dingâ, leu d’a dinga mba d’i tchol djangûna ki leu d’a dinga, 11andagad’a mba d’i yir ngola, baktarad’a ki tugud’ei d’a tcho d’a tchi matna a mba nde ata yina teteng, ahle suma mandarâ ngola ki simat ta nglod’a a mba tcholï akulo mi.

12Avok ahle ndazina pet, suma a mba vigigiya, a mba djobogi vunagi ngola, a mba igi avok suma ka sariyad’a kur gongîyo mazi suma toka, a mba tchugugi dangeina mi. A mba igi avok amuleina azi ki suma te yamba yam simiyênu. 13Ata yi máma, agi mba fagi lovota á le glangâsâ kanu. 14Kayam ndata, agi djib’eregi kurugi avok yam zla d’a de d’a agi mba dazizid’a d’i. 15Kayam an mba ni hagi zla d’a ded’a ki ned’a, tala magi suma djangûna pî a ndak á tchol á tchi tuguyod’a ki sed’egi d’uo d’a. 16Simiyêgiya, b’oziyogina, andjavagi ki buniyôgina a mba hagi abo suma, a mba tchi suma dingâ ablaud’a adigagiya. 17Suma pet a mba noyôgi woi yam simiyênu. 18Wani tumus sa kagid’a tu pî mba d’i vit tei d’i. 19Yam ve ta magid’a agi mba sud’ugi tagiya.

Jesus mi de woi yam b’laka hi Jerusalem-mba

(Gol Mat 24.15-21; Mar 13.14-19)

20Jesus mi had’azi kua ala: Wani fata agi wagi ades azigarâ mi ngui wa Jerusalem-mu ni, agi wagi ala b’lak mata mba wa go. 21Ata yi máma, suma kur Jude-na a ring a i aduk ahuniyôna, suma kur Jerusalem-ma a buzuk kei abua, suma a nga kur asinenina a hulong avo d’i. 22Kayam bur máma ni bur ma sä atchugula á ndak vun ahle suma a b’irizi kur mbaktumba hAlonid’ina. 23Kur bur máma suma a mba dala ni zla d’a hohoud’a yam arop suma wirâ karop suma a nga ki grona abozina. Kayam ndak ka ngola mba d’i mba yam andaga mazid’a, ayîna hAlonina mba mi mba kazi mi. 24A mba tchi suma dingâ ki mbigeu d’a fiyaka, a mba yo suma dingâ magomba aduk andjaf suma pet. Andjaf suma dingâ a mba miret Jerusalem kä kasezi gak atchogoi mazid’a ndaga.

Mbad’a hi Gor Sanid’a

(Gol Mat 24.29-31; Mar 13.24-27)

25Jesus mi had’azi kua ala: Suma a mba wahle suma simata nata afata azi ki tilâ ki tchitchiud’a. Yam andagad’a ka hî, andjaf suma a mba fe ndaka, a mba tcha tata abo siwela halum ma ngolîd’a, abo abil ma ngolâ mi. 26Suma a mba bo abo mandarâ yam ahle suma a nga mba yam andagad’ina, kayam ahle suma ad’eng suma akulona a mba yira. 27Ata yi máma, suma a mba wan an Gor Sana mba ni mbeï kur d’ugula kad’eng nga ngola ki subura mi. 28Wani fata ahle ndazina a tin ad’ud’a á led’id’a, agi gologi iragi akulo, kayam sut magid’a ti mba wa go.

Hat ta yam tulumid’a

(Gol Mat 24.32-35; Mar 13.28-31)

29Jesus mi dazi zla d’a d’ogola ala: Agi gologi tuluma azi kaguna pet. 30Fata azi nde wa d’ufâ ni, agi wagi ala amenda mba wa go. 31Hina mi, fata agi wagi ahle ndazina a nga led’a, agi wagi ala yima mbad’a hAlona á te leu mamba yam andagad’ina mi mba wa go. 32Gagazi, an nga ni dagiya, suma kur atchogoi d’a wandina a mba bo pet ti, gak ahle ndazina pet a mba le tua. 33Akulod’a kandagad’a a mba kal leyo, wani zla manda mba d’i kal lei d’i.

Ndjol la gagazid’a

34Jesus mi had’azi kua ala: Wani agi gologi tagi djiviya, ar agi tinigi hurugi yam ahle suma tena d’oze yam ahle suma tched’a ki djib’era hi duniyad’id’a tala bur máma mi mba kagi d’igi dauna na d’a d’i. 35Kayam bur máma mba mi mba ni d’igi dauna na yam suma yam andagad’ina pet. 36Wani ar agi burugi sena d’i, ar agi tchenegi Alona kayam agi fagi ad’enga á sud’ugi woi abo ahle suma a nga mbana, á tchologi avok an Gor Sana mi.

37Ki faleid’a, Jesus nga mi had’azi kur gong nga kud’ora hAlonid’a, wani ki fladege nga mi i bur yam ahina d’a a yat ala Olif-fa. 38Ki yorogo tcholol suma pet a mba kur gong nga kud’ora hAlonid’a á hum hat mamba.

Currently Selected:

Luc 21: BA

Highlight

Copy