Romê-na 4

Abraham ni vama taka yam he gagazid’a

1Ei mba dei yam abui ngolo Abraham ma kur hliunina ala mi fe ni me ge? 2Le Abraham Alona mi mbud’um sama d’ingêrâ ni yam sun mam mba led’a ni, mi fe ni vama subur tama. Wani mi ndak á subur tam avok Alona d’i, 3kayam mbaktumba hAlonid’a ti dala: Abraham mi he gagazid’a yam Alona; ni kayam ndata ba, Alona mi ndumum sama d’ingêrâ ni yam he gagazi mamba. 4Wani sama le sunda nga mi fe wurak mamba; a nga ndumum wurak mam ndata d’igi he d’a hawad’a na d’i, wani ni d’igi wurak mamba na. 5Wani le sana mi le nga sun nduo ba, wani mi tin hurum yam Alo ma mi mbut suma tchona d’ingêrâ ni, Alona mi ndum tin hur mama ni d’ingêr mi. 6Ni hina ba, David mi dala: Sama Alona mi ndumum sama d’ingêrâ bei sun mam mba led’ina, mi le furîd’a. Mi dala:

7Suma Alona hurum mi vat tei yam tchila mazid’a

suma mi zlup yam tcho mazid’a kä mi na,

a le furîd’a.

8Sama Ma didina mi ndumum

nga tcho mamba kam mbuo na,

mi le furîd’a.

9Furî ndata ti ni yam suma ngat bayâd’a hol zu? Ti nga ni yam suma bei ngat bayâd’a mi d’uo zu? Kayam ei dei ala mbaktumba hAlonid’a ti dala: Alona mi ndum Abraham sama d’ingêrâ ni yam he gagazi mamba. 10Alona mi ndumum sama d’ingêrâ ni mindja ge? Ni kid’a mi ngat bayâd’a d’oze bei mi ngat bayâd’id’a zu? Wani navok ka bei mam ngat bayâd’id’a. 11Bugola, a ngad’am bayâd’a, wani bayâ mam mba ngata ni d’igi geuna na á tagei woi ala kid’a mam bei ngat bayâd’a tua d’a, Alona mi mbud’um sama d’ingêrâ yam he gagazi mamba. Kayam ndata, Abraham nabu suma a he gagazid’a yam Alonina pet. Le sum ndazina a ngat nga bayâd’a d’uo pî, Alona mi ndumuzi ni suma d’ingêrâ. 12Mam nabu suma ngat bayâd’a mi. Wani ni yam ngat bayâ mazid’a hol li, ni yam tit mazi d’a kur lovot ta he gagazid’a mi d’a, d’igi abui ngolo Abraham mi tit kua avok ka mam bei ngat bayâd’id’a na mi.

Alona mi hle vunam mi suma a hum gagazid’ina

13Vun ma hle ma Alona mi hle vunam mi Abraham kandjavam ala andaga d’a wanda mba d’i arî d’igi djo mazina na d’a, ni yam mba Abraham mi ge yam kä ad’u gata hi Moise-sa d’i, wani ni yam he gagazi mamba. 14Le ni suma a ge yazi kä ad’u gatina hol ba a mba te djona ni aziya ni, he gagazid’a hi sanid’a ni hawa, vun ma hled’a hAlonina mba mi mbut ni vama hawana mi. 15Ni kayam gata ba, ayîna hAlonina mi mba, wani le gata nga d’uo ni, tchila yam gata nga d’uo mi.

16Kayam Alona mi hlum vunamî yam he gagazid’a, kayam ti ka’î d’igi he d’a hawa mamba na yam andjafâ hi Abraham-ma pet; nga ni yam suma a ge yazi kä ad’u gatina hol li, wani ni yam suma a he gagazid’a d’igi Abraham na na. Mam nabui pet, 17d’igi mbaktumba hAlonid’a ti de na ala: Alona mi dala: An mba ni mbud’ung andjaf suma ablauna abuziya. Mam nabui avok Alo ma mam he gagazid’a kama. Alo máma nga mi he arid’a mi suma matna, nga mi yahle suma a nga d’uo na ala a nga. 18Abraham mi nga ki vama tin hurâ d’uo pî, mi he gagazid’a á djup á mbut abu andjaf suma ablauna, d’igi Alona mi dum na ala: Andjavang mba mi zulî hina dedege. 19Bizamî go ki kis. Ata yima mi gol tam d’igi sama matna na amamba Sara ndak á vut gor ruo na pî, tam tchuk nga lus yam he gagazi mamba d’i. 20Wani mi he gagazid’a yam vun ma hle ma Alona mi hlumzina bei gigrita ba. Nga mi sira ad’enga kur he gagazi mamba, nga mi gile Alona mi. 21Mam we tetet ala Alona mi ndak á le vama mi hlum vunam kama. 22Kayam ndata, Alona mi ndumum sama d’ingêrâ ni yam he gagazi mamba. 23Zla d’a Alona mi ndumum sama d’ingêrâ kata, a b’irit kä kur mbaktumba hAlonid’a ni yam mam tu d’i, 24wani a b’irit ni yam ei suma Alona mba mi ndumi suma d’ingêrâ, yam he gagazi d’a ei hat yam mam ma mi tchol Jesus Saleina akulo aduk suma matnina mi. 25Alona mi hum mbei á tchid’a yam tcho meid’a, wani mi tcholom akulo aduk suma matna á mbud’i suma d’ingêrâ avoromu.

Currently Selected:

Romê-na 4: BA

Highlight

Copy