LUKAS 20

E ngule njôane Yésus

(Mt 21:23-27; Mk 11:27-33; Lk 2:34-35)

1E wua ya mimôs mite, mbôlô Yésus a mbe a yeʼeleʼe bôt e nda Zambe été a a mbe a kateʼe mbamba foé, minlô betuni a beyeme bekalate a bemvendé be nga zu 2a jô na: kate bia ngule fé wo bo mam mete, nge na za a nga ve wo ngule njôan éte? 3A nga yalane be na: ma fe ma ye sili mi nsili. 4Katane ma, e nduane Yôanes ô nga so vé ye yôp ye bôt? 5Ve be nga fas e bebien été na: nge bia yalane na: e yôp, a ye jô na: amu jé mi nga bo te buni nye. 6A nge bia yalane na: E bôt, bôt bese ba ye lume bia mekok , a ba yeme na Yôanes a mbe nkulu mejô. 7E nde be nga yalane na be nji yem e vôme nduane te ô nga so. 8Yésus nye be na: Ma fe, me teke kate mia a ngule fé ma bo mam mete.

Nkana bebaʼale afube mindik

(Mt 21:33-46; Mk 12:1-12)

9Wôna a nga taté na a kane bôt e nkana wu na: môt éziñ a nga bé afube mindik, a ve de bebaʼale be belane de nté éziñ a a nga kôlô si jé asu ya kandane je ôbe ayap. 10Eyoñe nkolane bibuma, a nga lôme mbo ésaé e be bebaʼale afube na be ve nye bibuma bi afube mindik. Ane bebaʼale be nga bôm a bulane nye mo zesé. 11A nga lôme mbo ésaé mfe; be nga bôme nye be kpweʼele nye a bulane nye mo zesé. 12A nga beta lôme nyô lale, be nga balé nye meveñ a titane nye. 13E nde miene afube mindik a nga jô na: Ma ye bo aya? Ma ye lôme mone wom ma dañe nyeʼe, éko éziñ ba ye semé nye. 14Vʼéyoñe bebaʼale be nga yene nye, be nga fas e zañe jap a jô na: E nye a ne nliʼi élik, e ñwôane nye, nalé ate élik ja ye bo énjangan. 15A be nga wua nye afube mindiʼi atan a wôé nye. Eyoñe ji miene afube mindik a ye bo be aya? 16A ye so, a bo na bebaʼale bete be wôéban, a a ye ve afube mindik e be bebaʼale befe.

Eyoñe be nga wôʼô nalé, be nga jô na: jame te daa ye ke boban! 17Vʼéyoñ a fombôya be, Yésus a nga jô na: E jam é ne ntilane di da tinane ñhe aya:

akoʼo belôñ be nga wua fé

e suʼulaneya bo di ôsu, di ya jua?

18Nyô ase a ye ku akoʼo te yôp a ye buʼi été, a nyô da ye ku yôp, da ye koʼo nye.

19Minlô betuni a beyeme bekalate be nga jeñ ane be ne bi nye awolo te ebien, ve be nga ko bôte woñ. Be nga yeme na Yésus a nga kane nkana te asu dap.

E ñyaʼane Sézar Toya

(Mt 22:15-22; Mk 12:13-17)

20Be nga taté na ba ke ba fase Yésus: E nde be nga lôme bebole bôt e mbe bete be mbe be yenéʼé ane bôte ya buni, asu ya bi nye a jia ya bifia bié a kee nye e be bôte metiñ a e be éjôé ngovina. 21Bôte bete be nga sili nye nsili wu na: A Nyeʼele, bia yeme na wo kobô a yeʼele zôsôô , a na ô ne teke semé ngume môt, ve na wo yeʼele zene Zambe aval ane zôsôô a né. 22Ye é ne bia nkañesan ye momo na bi yaʼane Sézar toya ? 23Ve Yésus, éyoñ a yemeya mboon akute wop, a nga yalane be na: litaʼane ma e nsañe moné. 24Ô beʼe éyekaʼa a e ntilane za? Be nga yalane na: E bi bi Sézar. 25E nde a nga jô be na: bulaʼane ñhe Sézar e jôm é ne ji Sézar a Zambe e ji é ne ji Zambe. 26Be mbe teke nguleya bi nye a jia ya bifia bié e mise me bôt; ve, mbiban a éyalane jé, be nga tabe bivô.

Besadusieñ a ñwômane miñwuan

(Mt 22:23-33; Mk 12:18-27; 1 Ko 15)

27Bevoʼo ya Besadusieñ, e mbe ba yemete na ñwômane miñwuan ô ne momo, be nga subu a sili nye nsili wu na: 28A Nyeʼele: avale di e nde Môze a nga bendé bia: nge monyañe môt éziñ a wu, a bili minga ve teke mon, monyañ a ye luʼu minga a biaé monyañe mvoñe bôt. 29Da yené na bobenyañe zamgbwal be nga too. E Ntôl ô nga luk a wu teke mon. 30Ebatan a nyô lale be nga luʼu nkus; 31e nga kui nalé e be be zamgbwa, be nga wu teke liʼi bon . 32E mvuse jap, minga fe a nga wu. 33E ñwômane miñwuan, minga ate a ye bo e nyô za? Amu be zamgbwal be nga luʼu nye. 34Yésus a nga yalane be na: Bone ya zia biyoñe nyô ba nyoñe binga a beyôm, 35ve ba ba ye yené na ba yiane nyoñe ngap e zia biyoñ ja zu a e ñwômane miñwuan ba ye bo teke nyoñ nge binga nge beyôm. 36Ba ye fe bo teke wu, amu ba ye funane beéngele a ba ye bo bone be Zambe, amu be ne bone be ñwômane miñwuan. 37Miñwuan mia wômô, jame te e nde Môze a nga liti ajô ntut, éyoñ a loone Nti e Zambe Abraham, e Zambe Izak, a e Zambe Yakob. 38Ve da yené na: Zambe a nji bo e nyô miñwuan, ve nyô bevevee; amu e mfaʼa wé bese be ne bevevee. 39Bevoʼo ya beyeme bekalate be nga yalane na: A Nyeʼele, ô yemeya kobô. 40A be nga bo teke fe ayoʼo ya beta sili nye nsili éziñ.

Ye Krist a ne mone David?

(Mt 22:41-46; Mk 12:35-44; Yer 23:5-6)

41Yésus a nga jô be na: Be ne jô aya na Krist a ne e Mone David? 42David émien a jô e kalate besam na:

E Nti a nga jô e Nti wom na:

Tabeʼe e mbo nnôme wom,

43akekui ma bo besiñe bôé ételé mebo jôé.

44E David a loone nye Nti,

(Krist) a ne bo nye mon aya?

Bijô e be beyeme bekalate

(Mt 23:1-33; Mk 12:38-40)

45Eyoñe te bôte bese be vôʼôlôʼô nye, a nga jô beyéʼé bé na: 46Tabaʼane beyeme bekalate ntyee; ba nyeʼe ba wulu be beʼe meyabe bizingi; ba nyeʼe mebatan e mevôme bôte bese ba sulan, bito yʼôsu e meba me Zambe a bito yʼôsu e bisulan bidi. 47Ba mine menda minkus, ba bo ayabe meyeʼelane bebaduʼu. Ba ye tôban ngum avale melep ne teke fianga.

Currently Selected:

LUKAS 20: BULU09

Highlight

Copy