Kutangisa 30
30
1Rahele kati ebona kuti aatowanila Jakubo bana kathamila nkulu uwe fupa. Ngono kadwa Jakubo kati, “Mundipe bana, kuzhe kwa ikoko, ndowofa.”
2Jakubo kagwadzila moyo Rahele kati kunli, “Apa ndimu tjimo tje Ndzimu iwo wakathama kuti usibe ne bana kene?”
3Rahele kabe eti, “Bhiliha nlandakadzi wangu woyu, nginani naye mu ng'umba ndizo andiwanile bana kuti namibo ndibake nsha.” 4Ndizo kampa nlandakadzi uwe Bhiliha kube nkadzi. Jakubo kangina naye mu ng'umba 5ngono kazwisenga kan'wanila mwana we tjilisana. 6Rahele kabe eti, “Ndzimu wandikumbula, wahwa kukumbila kwangu ukandipa mwana we tjilisana.” Ngekwa ikoku kampa zina eti Dani. 7Nlandakadzi wa Rahele Bhiliha katola ntumbu kakale ngono kawanila Jakubo mwana we tjilisana. 8Ipapo Rahele kati, “Ndagwisana kwazo ne nkulu wangu ngono ndakunda.” Ndizo kampa zina kati Nafutali.
9Kukati Liya ebona kuti aatjawana bana katola nlandakadzi uwe Zilipa kampa Jakubo kube nkadzi. 10Zilipa nlanda wa Liya kawanila Jakubo mwana we tjilisana. 11Ipapo Liya kati, “Ndina phazha seni!” Ndizo kantumila kati Gadi. 12Zilipa nlanda wa Liya kawanila Jakubo mwana we tjilisana we bubili. 13Ngono Liya kati, “Ndashatha seni! Bakadzi banowondidana kushatha.” Ndizo kantumila eti Asheri.
14Kukati mu nsi we kuvungwa koroni, Rubheni kabhuda kayenda mu shango ngono kawana malolo kabuya nawo kuna mmeyabe Liya. Rahele kati kuna Liya, “Ndokumbila kuti undipebo mamwe e malolo e mwana uwo.”
15Liya kadabila eti, “Kanti auzogutshika nge kunditolela nlume wangu? Ngono ngwenu woshokotola ne malolo e mwanangu kene?”
Rahele kabe eti, “Kwakalulwama ungalala nawe busiku igogu kumisa malolo e mwana uwo.”
16Ndizo kukati Jakubo ebuya madekwana edwa ku shango, Liya kabhuda kunonshanganidza. Ngono kandwa kati, “Nasi monolala kundili ngoti ndamutapa nge malolo e mwanangu.” Ndizo kanolala naye busiku igogo.
17Ndzimu ukahwa Liya kazwisenga kawanila Jakubo mwana we tjilisana we bushanu. 18Liya kabe eti, “Ndzimu wandipa mbhayilo ngoti ndapa nlume wangu nlandakadzi wangu.” Ndizo kantumila eti Isakari. 19Liya kazwisenga kakale kawanila Jakubo mwana we tjilisana we butathatu. 20Ngono kabe eti, “Ndzimu wandipa tjipo tjakanaka. Tjibaka tjino nlume wangu unowonditeta ngekuti ndan'wanila bakololo bali tathatu.” Ndizo kantumila kati Zebuluni. 21Shule kwe tjibaka kawana mwana we tjianadana kantumila kati Dina.
22Ndzimu ukakumbula Rahele ukan'dabila ukanthama kuti abe ne mbeleko awane bana. 23Kazwisenga ngono kawana mwana we tjilisana ndizo kabe eti, “Ndzimu wandidusa shoni.” 24Kantumila zina kati Josefa ngono kabe eti, “Yahwe ngabandipaphidzile nge mmwe mmbisana.”
Tjidumano tja Jakubo na Labani
25Kwakati Rahele asinotshibama Josefa, Jakubo kadwa Labani kati, “Imani nditjiyenda ndibgwilile kanyi kwedu ku shango ya kanyi kwedu. 26Tjindipani bakadzi bangu ne bana bangu bandakashingila ndizo ndiyende. Moziba kuti ndakamushingila ku ngapani.”
27Koga Labani iye kati kunli, “Ndokumbila kuti ha kuamutjilika gala usiyende. Ndakabona kuti Yahwe bakandikombolela nge kuko. 28Leba mbhailo waunoshaka ndowokupa iwo.”
29Jakubo kabe endwa eti, “Moziba kuti ndakamushingila tjini ne kuti zwithuwo zwenyu moziba kuti ndakazwitjengeta zubuyanana kungapani. 30Ndakati ndiswika pano makabe muna zwithuwo zwishomanana, koga ngwenu zwawanda kwazo. Yahwe bakamukombolela pamwe ne pamwe pandakabepo. Ngono ngwenu imi nsha wangu ndowoushingila lini?”
31Labani kabhuzwa kati, “Ndikupeni?”
Jakubo kadabila eti, “Musindipe tjimwe. Ha mungadumana ne tjandinokumbila ndingadwilila ndilisa zwithuwo zwenyu. 32Imani ndipalame pkhwizi ne mbudzi dzenyu dzose nasi nditheule pkhwizana imwe ne imwe ina manjanja ne ina mibala ne thema ne mbudzi imwe ne imwe ina manjanja ne mibala. Ndidzo dzinowobe mbhailo wangu. 33Kugalikabgwe kwangu ndiko kunowondimila tjibaka tjimwe ne tjimwe muzha kuwobona mbhailo wangu. Mbudzi imwe ne imwe yandinowobe ndi nayo isina mabala kene manjanja, kene pkhwizi imwe ne imwe isi thema kowotogwa kuti ndaikwiba.”
34Labani kadabila eti, “Kwakalulwama. Ngakube sekwa waleba.” 35Mu zhuba ilelo Labani katheula mbudzi ndume dzose dzakabe dzina mizila kene mibala ne hadzi dzose dzakabe dzina manjanja ne mibala ne pkhwizana thema dzose kadzipa bana babe kuti badzitjengete. 36Ipapo kazwithubukanya na Jakubo thambo inolizana gwendo gwe mazhuba matatu. Jakubo kasala elisa zwithuwo zwa Labani zwakasala.
37Jakubo katola thabi nyolo dze mpopula ne dze alimondi ne mpulane kadzithama mizila mitjena nge kudzisubula makwati etjuluka mamwe esubula etjuluka kusala kuna mizila mitema ne mizila mitjena. 38Kabe ebiga thabi idzedzo dzakasubugwa pa migoro inong'wisigwa zwithuwo vula kuti ilingisane ne zwithuwo ha zwizha kung'wa. 39Ndizo zwithuwo zwikakwiigwa zwili mbeli kwe thabi idzedzi ngono zwikazwala bana bana mizila ne manjanja ne zwibadzi.
40Jakubo katheula pkhwizana ngono kathama kuti zwithuwo zwasala zwilingisane ne zwithuwo zwa Labani zwina mizila ne zwitema. Ndizo kathubukanya zwithuwo zwizwe ne zwa Labani.
41Kwakabe kuti zwithuwo zwakasima zwikwiigwa, Jakubo ebiga thabi pa migoro mbeli kwe zwithuwo kuti zwikwiigwe pejo ne thabi. 42Koga kwakabe kuti akukwiigwa zwithuwo zwisakasima asingabige thabi pazwili. Ndizo zwithuwo zwisakasima zwikabe zwa Labani zwakasima zwikabe zwa Jakubo. 43Nge zila yakajali, Jakubo kafuma kabe ne zwithuwo zwinjinji ne balandakadzi ne balandalume ne kamela ne madonki.
Currently Selected:
Kutangisa 30: KBTP
Highlight
Share
Copy
Want to have your highlights saved across all your devices? Sign up or sign in
Kalanga Bible © Bible Society of Botswana, 2008, 2018.
Kutangisa 30
30
1Rahele kati ebona kuti aatowanila Jakubo bana kathamila nkulu uwe fupa. Ngono kadwa Jakubo kati, “Mundipe bana, kuzhe kwa ikoko, ndowofa.”
2Jakubo kagwadzila moyo Rahele kati kunli, “Apa ndimu tjimo tje Ndzimu iwo wakathama kuti usibe ne bana kene?”
3Rahele kabe eti, “Bhiliha nlandakadzi wangu woyu, nginani naye mu ng'umba ndizo andiwanile bana kuti namibo ndibake nsha.” 4Ndizo kampa nlandakadzi uwe Bhiliha kube nkadzi. Jakubo kangina naye mu ng'umba 5ngono kazwisenga kan'wanila mwana we tjilisana. 6Rahele kabe eti, “Ndzimu wandikumbula, wahwa kukumbila kwangu ukandipa mwana we tjilisana.” Ngekwa ikoku kampa zina eti Dani. 7Nlandakadzi wa Rahele Bhiliha katola ntumbu kakale ngono kawanila Jakubo mwana we tjilisana. 8Ipapo Rahele kati, “Ndagwisana kwazo ne nkulu wangu ngono ndakunda.” Ndizo kampa zina kati Nafutali.
9Kukati Liya ebona kuti aatjawana bana katola nlandakadzi uwe Zilipa kampa Jakubo kube nkadzi. 10Zilipa nlanda wa Liya kawanila Jakubo mwana we tjilisana. 11Ipapo Liya kati, “Ndina phazha seni!” Ndizo kantumila kati Gadi. 12Zilipa nlanda wa Liya kawanila Jakubo mwana we tjilisana we bubili. 13Ngono Liya kati, “Ndashatha seni! Bakadzi banowondidana kushatha.” Ndizo kantumila eti Asheri.
14Kukati mu nsi we kuvungwa koroni, Rubheni kabhuda kayenda mu shango ngono kawana malolo kabuya nawo kuna mmeyabe Liya. Rahele kati kuna Liya, “Ndokumbila kuti undipebo mamwe e malolo e mwana uwo.”
15Liya kadabila eti, “Kanti auzogutshika nge kunditolela nlume wangu? Ngono ngwenu woshokotola ne malolo e mwanangu kene?”
Rahele kabe eti, “Kwakalulwama ungalala nawe busiku igogu kumisa malolo e mwana uwo.”
16Ndizo kukati Jakubo ebuya madekwana edwa ku shango, Liya kabhuda kunonshanganidza. Ngono kandwa kati, “Nasi monolala kundili ngoti ndamutapa nge malolo e mwanangu.” Ndizo kanolala naye busiku igogo.
17Ndzimu ukahwa Liya kazwisenga kawanila Jakubo mwana we tjilisana we bushanu. 18Liya kabe eti, “Ndzimu wandipa mbhayilo ngoti ndapa nlume wangu nlandakadzi wangu.” Ndizo kantumila eti Isakari. 19Liya kazwisenga kakale kawanila Jakubo mwana we tjilisana we butathatu. 20Ngono kabe eti, “Ndzimu wandipa tjipo tjakanaka. Tjibaka tjino nlume wangu unowonditeta ngekuti ndan'wanila bakololo bali tathatu.” Ndizo kantumila kati Zebuluni. 21Shule kwe tjibaka kawana mwana we tjianadana kantumila kati Dina.
22Ndzimu ukakumbula Rahele ukan'dabila ukanthama kuti abe ne mbeleko awane bana. 23Kazwisenga ngono kawana mwana we tjilisana ndizo kabe eti, “Ndzimu wandidusa shoni.” 24Kantumila zina kati Josefa ngono kabe eti, “Yahwe ngabandipaphidzile nge mmwe mmbisana.”
Tjidumano tja Jakubo na Labani
25Kwakati Rahele asinotshibama Josefa, Jakubo kadwa Labani kati, “Imani nditjiyenda ndibgwilile kanyi kwedu ku shango ya kanyi kwedu. 26Tjindipani bakadzi bangu ne bana bangu bandakashingila ndizo ndiyende. Moziba kuti ndakamushingila ku ngapani.”
27Koga Labani iye kati kunli, “Ndokumbila kuti ha kuamutjilika gala usiyende. Ndakabona kuti Yahwe bakandikombolela nge kuko. 28Leba mbhailo waunoshaka ndowokupa iwo.”
29Jakubo kabe endwa eti, “Moziba kuti ndakamushingila tjini ne kuti zwithuwo zwenyu moziba kuti ndakazwitjengeta zubuyanana kungapani. 30Ndakati ndiswika pano makabe muna zwithuwo zwishomanana, koga ngwenu zwawanda kwazo. Yahwe bakamukombolela pamwe ne pamwe pandakabepo. Ngono ngwenu imi nsha wangu ndowoushingila lini?”
31Labani kabhuzwa kati, “Ndikupeni?”
Jakubo kadabila eti, “Musindipe tjimwe. Ha mungadumana ne tjandinokumbila ndingadwilila ndilisa zwithuwo zwenyu. 32Imani ndipalame pkhwizi ne mbudzi dzenyu dzose nasi nditheule pkhwizana imwe ne imwe ina manjanja ne ina mibala ne thema ne mbudzi imwe ne imwe ina manjanja ne mibala. Ndidzo dzinowobe mbhailo wangu. 33Kugalikabgwe kwangu ndiko kunowondimila tjibaka tjimwe ne tjimwe muzha kuwobona mbhailo wangu. Mbudzi imwe ne imwe yandinowobe ndi nayo isina mabala kene manjanja, kene pkhwizi imwe ne imwe isi thema kowotogwa kuti ndaikwiba.”
34Labani kadabila eti, “Kwakalulwama. Ngakube sekwa waleba.” 35Mu zhuba ilelo Labani katheula mbudzi ndume dzose dzakabe dzina mizila kene mibala ne hadzi dzose dzakabe dzina manjanja ne mibala ne pkhwizana thema dzose kadzipa bana babe kuti badzitjengete. 36Ipapo kazwithubukanya na Jakubo thambo inolizana gwendo gwe mazhuba matatu. Jakubo kasala elisa zwithuwo zwa Labani zwakasala.
37Jakubo katola thabi nyolo dze mpopula ne dze alimondi ne mpulane kadzithama mizila mitjena nge kudzisubula makwati etjuluka mamwe esubula etjuluka kusala kuna mizila mitema ne mizila mitjena. 38Kabe ebiga thabi idzedzo dzakasubugwa pa migoro inong'wisigwa zwithuwo vula kuti ilingisane ne zwithuwo ha zwizha kung'wa. 39Ndizo zwithuwo zwikakwiigwa zwili mbeli kwe thabi idzedzi ngono zwikazwala bana bana mizila ne manjanja ne zwibadzi.
40Jakubo katheula pkhwizana ngono kathama kuti zwithuwo zwasala zwilingisane ne zwithuwo zwa Labani zwina mizila ne zwitema. Ndizo kathubukanya zwithuwo zwizwe ne zwa Labani.
41Kwakabe kuti zwithuwo zwakasima zwikwiigwa, Jakubo ebiga thabi pa migoro mbeli kwe zwithuwo kuti zwikwiigwe pejo ne thabi. 42Koga kwakabe kuti akukwiigwa zwithuwo zwisakasima asingabige thabi pazwili. Ndizo zwithuwo zwisakasima zwikabe zwa Labani zwakasima zwikabe zwa Jakubo. 43Nge zila yakajali, Jakubo kafuma kabe ne zwithuwo zwinjinji ne balandakadzi ne balandalume ne kamela ne madonki.
Currently Selected:
:
Highlight
Share
Copy
Want to have your highlights saved across all your devices? Sign up or sign in
Kalanga Bible © Bible Society of Botswana, 2008, 2018.