Kutangisa 33
33
Jakubo eshangana na Esau
1Jakubo kamilidza mesho kabona Esau aswika ana balume bali mazana manna (400). Ndizo kathubukanya bana, bamwe kabapa Liya, bamwe Rahele, bamwe kabapa balandakadzi babe babili. 2Katungamidza balandakadzi ne bana babo, betobegwa ndi Liya ne bana babe, kukozha Rahele na Josefa shule. 3Jakubo iye nge kukwe kabatungamila ngono kathigama katendeka enshanganidza nkulu uwe. 4Koga Esau kalabuka kunonshanganidza, kangumbatila kamputa. Bubili gwabo bakalila. 5Kukati Esau emilidza mesho kabona bakadzi ne bana. Ngono kabhuzwa kati, “Ibaba ndi boani banawe?”
Jakubo kadabila eti, “Bana bangu imi nlanda wenyu, Ndzimu wakandipa ibo nge ngoni dzawo.” 6Balandakadzi ne bana babo bakathigama. 7Kukatobela Liya ne bana babe bakathigamabo. Ku bupelo kukazha Josefa na Rahele ngono na ibobo bakathigama.
8Esau kabhuzwa eti, “Matanga wose iyawa andashangana nawo akatakugwa unodwani ndiwo?”
Jakubo kadabila eti, “Kuti ndiamutjilike she wangu.”
9Koga Esau kati, “Zwangu zwandinazo zwinjinji zwakandilizana nnung'una wangu, zwaunadzo nge zwizo.”
10Jakubo kabe eti, “Aa, ndomukumbila amandihwila ngoni amutjilani tjipo tjangu. Ha ndabona buso gwenyu konga ndabona buso gwe Ndzimu ngoti mandiamutjila nge ludo. 11Ndokumbila muamutjile zwipo zwandamuzhila. Ndzimu wakandida ukandipa kose kwandinosheta.” Jakubo kantetedzela kuswikila eamutjila.
12Ipapo Esau kati, “Ngatitole gwendo gwedu. Ndowokutungamila.”
13Jakubo kashandula eti, “She wangu moziba kuti bana abathu bakasima ne kuti ndakafanila tjengeta pkhwizi ne ng'ombe dzitjamwisa bana badzo. Ha dzingatakugwa dzitatiwa zhuba ling'ompela, zose zwithuwo zwingafa. 14Ndizo mungayenda zwenyu muli mbeli, imi ndowotobela ndakabiga moyo ndilaugwa ngoyenda kwe zwithuwo zwandinotakula nenge kuyenda kwe bana kuswikila ndiswika kuna she wangu ku Seiri.”
15Esau kabe eti, “Ngono ima ndisiye bamwe bathu bangu nawe.”
Koga Jakubo kati, “Mowobe mukuthamilani ikoku wali? Ngandiamutjilike koga muna she wangu.” 16Ndizo mu zhuba ilelo Esau katangisa gwendo gugwe ebgwilila ku Seiri. 17Koga Jakubo kayenda ku Sukoti kwaakabaka nzi uwe ne matanga e ng'ombe dzidze. Ndizo wali bugalo igogo gudang'wa kuyi Sukoti.
18Jakubo wakaswika zubuyanana pejo ne nzi we Shekemu mu shango ye Kanana paakabaka mishasha iye edwa ku Padani Aramu. 19#Joshuwa 24:32; Johani 4:5Kadusa maloso e siliva ali zana katenga ntuthu mu bakololo ba Hamori tate ba Shekemu ngono kabiga nshasha uwe ipapo. 20Kabaka tjibeso tjinopisigwa zwibhayilo ipapo katjidana zina eti Eli Elohe Iziraela.
Currently Selected:
Kutangisa 33: KBTP
Highlight
Share
Copy
Want to have your highlights saved across all your devices? Sign up or sign in
Kalanga Bible © Bible Society of Botswana, 2008, 2018.
