Kutangisa 37
37
Josefa ne bakulu babe
1Jakubo wakagala mu shango yakagagwa ndi tate babe, shango ye Kanana. 2Eyi i ndongoloso ngekwe nsha wa Jakubo.
Josefa wakati ali nzhuzha una makole ali gumi lina makole ali kutendeka kabe elisa zwithuwo ne bakulu babe, bakololo ba Bhiliha ne ba Zilipa bakadzi ba tate babe ngono kabatjeta kuna tate babe.
3Iziraela wakabe eda Josefa kupinda bakololo babe bamwe bose, ngoti azwagwa akwegula ngono kanthumila jasi lakanaka lina maboko malefu. 4Ngono bakati bebona kuti unonda kubapinda bose bakambenga, bebe basingatjanlebese zubuyanana.
5Gumwe busiku Josefa kawolota ngono kati ebudza bakulu babe bakambenga kunyanyisa. 6Kabadwa kati, “Hwililani hwope dzangu dzandawolota. 7Takabe tisunga zwishwa zwe koroni mu nnda ngono ipapo tjishwa tjangu tjikamuka tjikama, zwenyu zwikama kutjipoteleka zwitjikotamila.”
8Bakulu babe bakandwa bakati, “Apa unodwa kuti unowotibusa ukabe mambo wedu iwe kene?” Ngono bakambenga kunyanyisa ngekwe mawoloto awe ne ngekwe tjaakaleba.
9Ngono kawolota dzimwe hwope kakale kabudza bakulu babe kati, “Ndawolota kakale ndibona zhuba ne mwedzi ne nyenyedzi dzili gumi lina kung'ompela zwindikotamila.”
10Koga wakati ebudza tate babe ne bakulu babe, tate babe bakantjemela beti, “I hwope dzakatini idzedzi dzawawolota? Apa mmeyabo nami ne bakulu babo towozha mbeli kuko tikakuthigamila kene?” 11#Mishingo 7:9Bakulu babe bakanthamila fupa, koga tate babe bakakulondolodza mu moyo wabo ikoku.
Josefa unotengesiwa
12Bakulu ba Josefa bakayenda ku danga kufudza pkhwizi dza tate babo pejo ne Shekemu. 13Iziraela kati kuna Josefa, “Bakulu babo bakudanga pejo ne Shekemu. Buya ndikutume ku bali.”
Iye kadabila eti, “Kwakalulwama.”
14Jakubo kabe eti kunli, “Yenda unolekula bakulu babo ne zwithuwo, ubuye undibudze kuti wawana kwakatini?” Ndizo kantuma kudwa ku nkuku we Heburoni.
Josefa kati eswika ku Shekemu 15kapungaila pungaila mu shango ngono kawangwa ne mmwe nlume kanbhuzwa kati, “Unoshakani?”
16Josefa kashandula eti, “Ndoshaka bakulu bangu. Mungandibudza kwabangabe befudza zwithuwo zwabo kene?”
17Nlume iwoyo kabe eti, “Bakafuluka imomu. Ndakabahwa beti banoyenda ku Dotani.” Ndizo Josefa kayenda ku Dotani.
18Bakulu babe bakambona atjithambo, ngono kati asathu kaswika pabali bakalangana kumbulaya. 19Bakalebesana beti, “N'woloti ihwowuje hwoyoyu waswika. 20Ngatimbulayeni tinlashile mu limwe le matshime iyawa. Towoti wakajiwa nge tjibandana. Ipapo towobona kuti kowoshingikalani nge mawoloto awe.”
21Rubheni kati ehwa ikoku kagwisa kunsunungula mu maboko abo. Wakati ku bali, “Ngatisimbulayeni.” 22“Musitebule malopa. Munlashile mu tshime ileli mu tjilambanyika, musitongo nlonga luboko.” Rubheni wakaleba ikoku kuti ansunungule mu bali ekon'yisa kuna tate babe. 23Ndizo Josefa wakati eswika pa bakulu babe bakammbula jasi lile lefu lina maboko malefu laakabe akaambala, 24ngono bakantola bakanlashila mu tshime. Tshime ilelo lakabe lisina tjimwe, lakabe lisina vula.
25Bakati batjigele pasi beja bakabona gupo le Baishimaeli lili mu gwendo kudwa ku Giliyadi. Kamela dzabo dzakabe dzakabelesiwa mimotsha ne nyonje. Bakabe bali mu zila beyenda ku Egipiti. 26Juda kabe eti ku bakulu babe ne ku banung'una babe, “Towobuyigwa ngeni ha tibulaya nnung'una wedu tikozwimba lufu gugwe. 27Buyani tintengeseni ku Baishimaeli, tisimbulayeni. Kana iko nnung'una wedu, i nyama ne lopa ledu.” Bakulu ne banung'una babe bakaduma. 28#Mishingo 7:9Ndizo kukati baseenyi be Midiyani beswika, bakulu ba Josefa bakankweba bendusa mu tshime bebe bentengesa makumi mabili e shekele dze siliva ku Baishimaeli bakayenda naye ku Egipiti.
29Rubheni kati ebgwilila ku tshime kawana Josefa asipo ngono kabhata zwiambalo zwizwe kazwipalula nge shungu. 30Kabgwilila ku banung'una babe kati ku bali, “Mwana aapo! Ndowolinga ngayi dumbu?”
31Ipapo bakabulaya mbudzi bakatola jasi la Josefa bakalidubika mu malopa. 32Bakatola jasi ilelo bakaliyisa kuna tate babo bakati, “Takanunga jasi ileli. Bonani kene lisi le mwana wenyu.”
33Jakubo kaliziba ngono kati, “I jasi le mwanangu! Wakajiwa nge tjibandana. Malebeswa Josefa wakamwaugwanyiwa.” 34Ipapo Jakubo kapalula zwiambalo zwizwe, kaambala jila le saka ngono kalilila nkololo uwe mazhuba manjinji. 35Bakololo babe bose ne bakololokadzi babe bose bakazha kunnyaladza, koga kalamba kunyaladziwa kati, “Aa, ndowongina mu ikumbu kuna mwanangu ndilila.” Sa ikoko tate babe bakanlilila.
36Bamidiyani ibo bakatengesa Josefa ku Egipiti kuna Potifa mmwe we hadzasha dza Faro, ali ntungamili we batjengeti babe.
Currently Selected:
Kutangisa 37: KBTP
Highlight
Share
Copy
Want to have your highlights saved across all your devices? Sign up or sign in
Kalanga Bible © Bible Society of Botswana, 2008, 2018.
