KU̧U̧NAŊMƆ 14

Abram kpasa Lot

1Amrafɛl wannu Sinɛar, Ariɔk wannu Elasar, Kedɔr-Laomɛr wannu Elam, in Tideal wannu Goyim 2nɛ̀ɛ́ mɛ́ bi Bera wannu Sɔdɔm, in Birsa wannu Gɔmɔr, Sinɛar, wannu Adma in Sɛmɛbɛr wannu Seboyim in wannu Bɛla (nɛ̀ duk nɛ́ Sɔar). 3O ɛ̧ɛ̧ nɔ'ɔ mɔɔrɔ'ɛ mɔi̧a ŋmaa kpa kɔ̧ ɗɔŋgɔ Sidim nɛ duk nɛ́ gba-tɔp Tɔŋ. 4Sɛn tɛ pɛ ɓu-zua-yiitoo, wa yaa so ɗɔɔ ŋgai ko Kedɔr-Laomɛr, ɓɛɛ tɛ ɓu-zua-taar pɛ, wa dee ŋgazu. 5Hegɔ tɛ ɓu-zua-naar pɛ, Kedɔr-Laomɛr tɛ̀ɛ́ in o wannu nɛ yor ɗoŋ-aa. Wa tika zu o be Refaim sɛn Astarot-Karnaim, o be Zuzɛ sɛn Ha̧m, o be Emii sɛn Sawe-Kiriataim, 6o be Hɔr sɛn zu kaya kɔ-wa sɛn Sɛir hɔ sɛn Ɛl-Paraŋ nɛ duk ká̧ ŋga-gbárà, 7ɓɛɛ wa pii ɗoŋ pii Ɛn-Mispat, sɛn nú Kadɛs; wa ɗaŋa nù ko o be Amalɛk in o be Amɔr nɛ ɔɔ sɛn Hasasɔŋ-Tamar.

8Hegɔ, o wannu Sɔdɔm, wannu Gɔmɔr, wannu Adma, wannu Seboyim in wannu Bɛla nɛ‘i sa'e Sɔar dika lɛŋ yor ɗoŋ ŋmaa nɛ biro in o wi nɛ duk mgbara ɗɔŋgɔ Sidim. 9O wannu nɔ‘i nɛ́ Kedɔr-Laomɛr, wannu Elam, Tideal wannu Goyim, Amrafɛl wannu Sinɛar in Ariɔk wannu Elasar. O wannu nɔ‘i naar'i baa biro duk nɛ̀ o wannu nɔ'ɔ mɔɔrɔ'ɛ.

10O bíí za̧a̧ so o kɔ̧ hee kɔ̧ kam-gìì ga sɛn kɔ̧ ɗɔŋgɔ Sidim nɛti, ɓɛɛ ŋgimbi nɛ o wannu Sɔdɔm in Gɔmɔr yuu nɛ mɔ, wa tika sɛnɛ. O oi wannu taar nɛ ɓɔna yuu mɔ si zu kaya. 11Hegɔ, o wi-gbin-biro kaia demɔ nú Sɔdɔm in Gɔmɔr lɛŋ, gu nɛ o nyɔnɔ kɔ-wa yak nɛnɛ mbɛt. 12Ɓɛɛ wa ba Lot, bem ko nya Abram in o mbɔi kɔ̧-a̧ lɛŋ yak nɛnɛ; a̧ duka so ɔ sɛn Sɔdɔm.

13Ŋma wi-yu-mɔ nɛ̀ɛ́ tɔ̧ wen-aa ha̧ Abram be hébreu nɛ ɔ ti gasa te ko Mambre, be Amɔr nya Ɛskɔl in Anɛr; o wi nɔ‘i taar'i yora so ɗoŋ Abram. 14Ŋgimbi nɛ Abram zia'e, wa baa bem ko nya-a̧ yaknɛ nɛ bara-biro, a̧ kaia o ŋgaŋa wi-de-tom 318, nɛ wa koo kɔ̧ tua kɔ̧-a̧, ɓɛɛ wa ndak ɗoŋ o wannu hɔ sɛn Dan. 15A̧ kɛ̧ɛ̧ o bíí kɔ̧-a̧ mɛ bi wa mɛ zɛ. A̧ bìí wa, ɓɛɛ a̧ ndak ɗoŋ wa hɔ Hoba ɗoŋ Damas nɛ ŋgɔn mɛ. 16A̧ kaia o mbɔi lɛŋ pii nɛ ɗoŋ, a̧ baa bem ko nya-a̧ Lot in o mbɔi kɔ̧-a̧ ba nɛ o kóò gu nɛ o bíí kɔ̧-a̧ pii ɗoŋ.

Mɛlkisedɛk toka de yoŋgo zu Abram

17Ɗoŋ pia-ɗoŋ ko Abram, ŋgimbi n'aa gbina nɛ biro ti Kedɔr-Laomɛr in o wannu nɛ yora so ɗoŋ-aa, wannu Sɔdɔm wee ti a̧ pii kɔ̧ ɗɔŋgɔ «Save» wen nɛ tɔ̧ «Ɗɔŋgɔ ko Wannu.» 18Nɛ́ mɔ'ɔ nɛ̀ Mɛlkisedɛk wannu Salɛm baa brɛt in o dɔ̧ɔ̧ tɛnɛ ha̧ Abram. Mɛlkisedɛk duka so nɛ́ wi-ɗafi-sɔ̧ ko Sɔ̧ nɛ̀ duk si ŋgɔn mɛ.#Heb 7.1-10 19A̧ toka de yoŋgo zu Abram tɔ̧ nɛnɛ‘e: «Sɔ̧ nɛ duk si ŋgɔn mɛ, wan nɛ dee yiwese in nù a̧ tok de yoŋgo zu Abram! 20Zɔnamɔ a̧ duk nɛ ko Sɔ̧ si ŋgɔn mɛ nɛ aa o wisɛn kɔ-mɛ er-mɛ!» Ɓɛɛ Abram ha̧ zu-mɔ lɛŋ n'aa kpaa ha̧ a̧ nɛ ha̧a̧mɔ.

21Wannu Sɔdɔm tɔ̧ɔ̧ ha̧ Abram: «Mɛ̀ há̧ nɛ́ o bíí ha̧‘m, ɓɛɛ mɛ̀ káí kɔ-mɛ nɛ o mbɔi.»

22Abram kifa nú ha̧ wannu Sɔdɔm: «Mi baa er-am nɛ ŋgɔn ha̧ GASA WAN Sɔ̧ si ŋgɔn nɛ dee yiwese in nù, 23kóó nɛ́ garaazi, kóó nyak-ndárà kpɔk, mi beka ba mɔ nɛ̀ duk nɛ́ kɔ-mɛ na, wen ká mɛ́ tɛ̀ɛ́ tɔ̧‘e, mɛ̀ nɛ́ wen zu wi a̧ Abram kifa nɛ̀ wanmbɔi. 24Mi beka ba ŋma mɔ er-mɛ na, kànà nɛ nyɔŋmɔ ko o ŋgaiwi kɔ‘m ɓɛɛ. Ɛskɔl, Anɛr in Mambre tɛ kai war mɔ ko o bíí nɛ nɛɛ in am.»

Currently Selected:

KU̧U̧NAŊMƆ 14: GB11DC

Highlight

Copy