KU̧U̧NAŊMƆ 18

Sɔ̧ ha̧a̧ nú mɛ ha̧ bem ha̧ Abraham

1GASA WAN usa tɛ ha̧ Abraham sɛn ɗɔɔ o gasa te sɛn Mambre, ɓɛɛ ká Abraham duk so nɛ nù sɛn ká̧ nú tua-laa, ŋgimbi gbɛ̧ŋmɔ mɛ wese. 2A̧ baa yí-a nɛ ŋgɔn, ɓɛɛ a̧ zɔk o wiwii taar nɛ yor nɛ be nyɛi̧a-a. Ŋgimbi n'aa zɔka wa, a̧ maa yì nɛ haya-a we nɛ̀ ti wa, ɓɛɛ a̧ gu nù sɛn ti wa.#Heb 13.2 3A̧ tɔ̧a̧: «Nyaa, mi gɔma er ti'nɛ́, k’ɛ̀nɛ̀ nɛ́ kɔ̧a̧‘m, k’ɛ́nɛ́ ɓir yak tɛ ko wi-de-tom k’ɛ́nɛ́ na. 4-5Hee mɔ'ɔ n’ɛ̀nɛ̀ ɓira nɛ tɛ ko wi-de-tom k’ɛ́nɛ́ ga, ɔ dee ɛ̀nɛ̀ pɛ́m mɔ ha̧ wa ba be yì tɛnɛ h’ɛ́nɛ́ fɔr nɛ̀ naŋ‘nɛ́, ɓɛɛ ɛ́nɛ́ ɔma be tɛ‘nɛ́ sɛn ɗɔɔ te’ɛ kaŋ, ha̧‘m ha̧ be dɔ̧ brɛt mɛ ha̧ ŋgai h’ɛ́nɛ́ sɛ. Ɗoŋ mɔ‘i, ɓɛɛ ɛnɛ yaka mɔ k’ɛ́nɛ́.»

Wa kifa nú: «Mɛ̀ dé kànà hee mɛ tɔ̧a̧ ga.»

6Abraham kpánà nɔ̀ nɛ haya-a sitɛ Sara sɛn kɔ̧ tua-laa, ɓɛɛ tɔ̧: «Mɛ̀ bá be-ao fuu taar a̧ mɛ̀ vátí ha̧n nɛ makala.» 7Ɓɛɛ Abraham ma yì si fara nɛ o mɔ-dai kɔ̧-a̧ a̧a̧ sɛnɛ, a̧ baa de be-ndai kpɔk ha̧ ŋma wi-de-tom mɛ gɔn nɛ haya-a. 8A̧ baa kaŋa-yibere, in yibere ká bá nɛ̀ be-ndai nɛ wa gia'i kai a ti wa. Abraham yor kɔ‘i nɛ ŋgɔn sɛn katɛ wa sɛn ti te, ɓɛɛ wa nyɔŋ mɔ.

9Wa aka Abraham: «Kóò kɔ-mɛ Sara a̧a̧ sɛn dee?» Abraham kifa nú: «A̧ a̧a̧ sɛn kɔ̧ tua-laa mɛ‘i.» 10GASA WAN tɔ̧a̧: «Bin-mgba-pɛ, mi tɛ pii ɗoŋ sɛn kɔ̧ tua kɔ-mɛ hee ŋgimbi kinii ga, ɓɛɛ kóò kɔ-mɛ Sara tɛ kpa be-wiwii.» Sara duka sɛn ká̧ nú tua-laa ɗoŋ Abraham zii nɛ wen'i.#Rɔm 9.9 11Abraham in Sara sɔka so nyɛmna, pɛ wa dɔka; Sara kaɗa so zɔka zɛ kaɗi. 12Hegɔ, Sara mama mami nɛ kɔ̧ see tɔ̧ nɛnɛ: «Kinii hee mɔ'ɔ n'am sɔka kaɗi ga, mi a̧a̧ nɛ wɔ wiwii ɓɔ nde? Zɔk, dáa-wan-tua kɔ‘m nɛ́ gbɛ́rɛ́ mbɛt.»#1 Pi 3.6

13Ɓɛɛ GASA WAN tɔ̧ ha̧ Abraham: «Wen ge sa Sara mam mami ge? In wen ge sa Sara ak mɔ ndé, wi sɔka kaɗi, wi nyɛma mɛ kpa bem ɓɔ, ndé, wó'ɛ ge? 14Ŋma mɔ a̧a̧ sɛnɛ nɛ tɛ gan GASA WAN nde? Sɛn tɛ ŋgimbi’ɛ hɔ bin-mgba-pɛ, mi tɛ pii ɗoŋ sɛn kɔ̧ tua kɔ-mɛ, ɓɛɛ Sara tɛ kpa be-wiwii.»#Lk 1.37

15Sara kafa, ɓɛɛ tɔ̧: «Mi mam mami na», wen kíì dee a̧; ɓɛɛ GASA WAN kifi nú: «Nɛ́ kpasawen, mɛ mama mami.»

Abraham gɔma er wen zu Sɔdɔm

16O wi nɔ‘i kura mɛ yak si sɛn Sɔdɔm, ɓɛɛ Abraham nɛ in wa mɛ e wa yuwar. 17GASA WAN taa mɔ hee mɔ'ɔ ga: «Mɔ n'am tɛ de, mi tɛ hu̧si nɛ̀ Abraham nde? 18Nɛ̀ ɗoŋ mbɛt, Abraham tɛ duk nɛ ŋgaya dukbíí nɛ ɔ gasa, ɓɛɛ wa tɛ tok de yoŋgo zu dukbíí lɛŋ zu nù'ɛ nɛ̀ ɗoŋ-aa. 19Wen mi hoka so a̧ ha̧ a̧ mɛ ha̧ nú ha̧ o bem kɔ̧-a̧ in o bíí nutua kɔ̧-a̧, ha̧ wa mɛ kasi yuwar ko GASA WAN de nɛ mɔ nɛ yuwar-a in de nɛ kpasamɔ. Hegɔ GASA WAN tɛ de ha̧ mɔ n'aa ha̧a̧ so nú-a sɛnɛ ha̧ Abraham mɛ hɔ gba̧a̧.»

20GASA WAN tɔ̧a̧: «Hiɗimɔ zu Sɔdɔm in Gɔmɔr ɔ gasa nyɛmna; ɗaŋmɔ kɔ-wa yaka zale. 21Mɛ̀ nɛ́ wen hegɔ mi tɛ nɛ ha̧‘m mɛ zɔk yuwar deemɔ kɔ-wa, kà nɛ́ nyɛma ɗoŋ mɔ n'am zia'i, ɓɛɛ kà nɛ́ bòò hegɔ, mi tɛ iŋ.»

22O bíí yiitoo baa war yak si Sɔdɔm, ɓɛɛ Abraham ɓɔn kɔ‘i ti GASA WAN. 23Abraham ɗɔla pii ti, ɓɛɛ tɔ̧́: «Nɛ̀ mbetɛ, ɛ́nɛ́ tɛ gbɛ o wi-de-mɔ nɛ yuwar-a in o wi-de-ɗaŋmɔ nde? 24Ŋmafara o wi-de-mɔ nɛ yuwar-a ɓu-mɔɔrɔ a̧a̧ sɛnɛ saaye’ɛ, ɓɛɛ ɛ́nɛ́ tɛ ɗaŋ ye’ɛ nɛ mbetɛ nde? Ɛ́nɛ́ beka e ɗaŋmɔ ha̧ ye’ɛ wen zu o wi-de-mɔ nɛ yuwar-a ɓu-mɔɔrɔ nɛ a̧a̧ sɛnɛ‘i na nde? 25Nɛ̀ mbetɛ, ɛ́nɛ́ nyɛm mɛ́ gbɛ o wi-de-mɔ nɛ yuwar-a kpɔk in o wi nɛ kita nyɛma mɛ tik na. Ɛnɛ nyɛm mɛ de hegɔ na. K’ɛ̀nɛ̀ de hegɔ, ɛ́nɛ́ tɛ gbɛ o wi-de-mɔ nɛ yuwar-a kpɔk in o wi nɛ kita nyɛma mɛ tik, ɓɛɛ mɔ bo hegɔ na. Bó nɛ́ wi-gɔn-kita zu nù lɛŋ tɛ gɔn kita nɛ yuwar-a na nde?»

26GASA WAN tɔ̧a̧: «Kà‘m nɛ́ kpaa o wi-de-mɔ nɛ yuwar-a ɓu-mɔɔrɔ sɛn saaye Sɔdɔm, ɓɛɛ mi tɛ e ɗaŋmɔ ha̧ o bíí saaye Sɔdɔm lɛŋ wen zu wa.»

27Abraham kifa nú: «Mi gee fuunu, gee bùk, mi kɔ̧ɔ̧ mɛ tɔ̧ wen ha̧ Gasa Wan kɔ‘m. 28Ŋmafara zu bíí ɓu-mɔɔrɔ, nɛ́ bíí mɔɔrɔ a̧ tɛ ɓɔn, ɓɛɛ ɛnɛ tɛ nyɛm ɗaŋa ye lɛŋ wen zu bíí mɔɔrɔ nɛ ɓɔna nde?» A̧ kifa nú: «Mi a̧ kpaa o wi-de-mɔ nɛ yuwar-a ɓu-naar-zua-mɔɔrɔ sɛnɛ, mi beka ɗaŋ ye na.»

29Abraham tɔ̧ɔ̧ woyo: «Ŋmafara wi tɛ kpa wa ɓu-naar.» Ɓɛɛ GASA WAN kifi nú: «Mi nyɛm mɛ de ŋma mɔ na, wen zu bíí ɓu-naar.»

30Abraham tɔ̧a̧: «Kà‘m nɛ́ tɔ̧ɔ̧ wen, ká Gasa Wan kɔ‘m kpa ɗaŋsee na. Ŋmafara wa tɛ ya nɛ́ bíí ɓu-taar.» Ɓɛɛ GASA WAN tɔ̧: «Kà‘m nɛ́ kpaa bíí ɓu-taar, mi beka de ŋma mɔ na.»

31Abraham tɔ̧ɔ̧ woyo: «Gasa Wan kɔ‘m, ɛ̀nɛ̀ é kànà benaŋ ha̧‘m tɔ̧ be wen woyo. Ŋmafara ɛnɛ tɛ kpa wa nɛ́ bíí ɓu-yiitoo.» Ɓɛɛ GASA WAN tɔ̧: «Mi beka ɗaŋ ye na, wen zu bíí ɓu-yiitoo.»

32Abraham tɔ̧a̧: «Ká see Gasa Wan kɔ‘m tu̧ na, ha̧‘m mɛ tɔ̧ sɔŋkur wen. Ɓɛɛ ka wa nɛ́ bòò nɛ́ bíí ɓu?» GASA WAN kifa nú: «Wen zu wa ɓu, mi beka ɗaŋ mɔ na.» 33Ɗoŋ ŋgimbi nɛ GASA WAN tɔ̧ɔ̧ wen in Abraham kaɗi, a̧ yaka, ɓɛɛ Abraham si ɗoŋ kɔ̧ tua kɔ‘i.

Currently Selected:

KU̧U̧NAŊMƆ 18: GB11DC

Highlight

Copy