LUK 10

Tom ko o betom 72

1Ɗoŋ mɔ‘i, Gasa Wan hoka o ŋma ŋgaiwi ɓu-mɔɔrɔ-ɗoŋ-yiitoo-zua-yiitoo#10.1 72: ó ŋma texte tɔ̧a nɛ́ 70., ɓɛɛ tom wa yiitoo yiitoo yak ti si saaye in fara lɛŋ n'aa tɛ nɛ̀ sɛnɛ. 2A̧ tɔ̧ɔ̧ ha̧ wa: «Nyɔnɔ dɛma nyɛmna, ɓɛɛ o wi-de-tom-aa dɔk na; wen hegɔ, ɛ̀nɛ̀ áí nú ha̧ wan-nyɔnɔ mɛ tom o wi-de-tom si fara-mɔi̧-nyɔnɔ kɔ̧-a̧.#Mt 9.37-38 3Ɛ̀nɛ̀ nɛ́! Mi tom nɛ́ ɛ́nɛ́ hee o be-sami mgbara o gbóò ga.#Mt 10.16 4K’ɛ́nɛ́ ba ŋgoɓo sede, ŋgoɓo-a-mɔ, in ndárà na, k’ɛ́nɛ́ fan bíí nɛ̀ yuwar na mbɛt.#Mt 10.7-14; Mk 6.8-11; Lk 9.3-5 5Nɛti h’ɛ́nɛ́ mɛ ye ŋma tua, ɛ̀nɛ̀ tɔ̧́‘e, ga̧a̧mɔ a̧ yé kɔ̧́ tua'i. 6Kà wan-tua'i nɛ́ duka nɛ́ bíí nɛ̀ kpɛka ga̧a̧mɔ ko Sɔ̧, ɓɛɛ ga̧a̧mɔ k’ɛ́nɛ́ tɛ duk zu-a; kà bó hegɔ na, ɓɛɛ ga̧a̧mɔ k’ɛ́nɛ́ tɛ pii ɗoŋ zu'nɛ́. 7Ɛ̀nɛ̀ ɔ́ kɔ̧́ tua'i, nyɔŋ nɛ̀ mɔ, nɔ nɛ̀ mɔ nɛ̀ wa tɛ ha̧‘nɛ́; wen wi-de-tom kpa kànà nɛ́ mɔɔ-oi-tom kɔ‘i. K’ɛ́nɛ́ ndɛn nɛ̀ kɔ̧́ tua nɛnɛ na.#1 Kɔr 9.14; 1 Tim 5.18 8Ye n’ɛnɛ tɛ hɔ sɛnɛ lɛŋ, kà bíí kpɛk'nɛ́, ɓɛɛ ɛ̀nɛ̀ nyɔ́ŋ mɔ nɛ̀ wa tɛ ha̧ h’ɛ́nɛ́‘i; 9ɛ̀nɛ̀ kpásí o wi-zɛɛ nɛ a̧a̧ saaye'i, ɓɛɛ ɛ̀nɛ̀ tɔ̧́ ha̧ wa'e ndé: ‹Wan ko Sɔ̧ hɔɔ tɛ‘nɛ́ kaɗi.› 10Ɓɛɛ ye n’ɛnɛ tɛ hɔ sɛnɛ lɛŋ nɛ̀ wa beka kpɛk'nɛ́ na, ɛ̀nɛ̀ nɛ́ɛ̀ yór bee-gara, ɓɛɛ ɛ̀nɛ̀ tɔ̧́:#Tom 13.51 11‹Géé fuunu saaye k’ɛ́nɛ́ nɛ̀ baa naŋ yɛ'ɛ, nɛ́ mɔ'ɔ n’ɛɛ mgbɔ a nù h’ɛ́nɛ́'ɛ. Ɓɛɛ ɛ̀nɛ̀ íŋ kana'e Wan ko Sɔ̧ hɔɔ kaɗi.› 12Nɛ́ mɔ‘i sa'm tɔ̧ h’ɛ́nɛ́‘e wese kita, kita tɛ ŋgai zu ye'i gan ko Sɔdɔm.»#Ku̧u̧ 19.24-28; Mt 11.24; 10.15

O ye nɛ̀ beka kpɛk Jesu na

(Zɔk Mt 11.20-24)

13«Bɔnɛ a̧a̧ zu'nɛ́ o bíí Korazin! Bɔnɛ a̧a̧ zu'nɛ́ o bíí Bɛtsaida! Wen o mɔɔ-kifi nɛ̀ dee mgbara'nɛ́, a̧ dé so sɛn Tir in Sidɔŋ, o bíí ye nɔ‘i tɛ̀ɛ́ gaɓi so tɛ nɛ̀ bufu in wa tɛ̀ɛ́ a so bùk zu-wa mbɛt nɛ̀ haya-a mɛ usi'e wa kpaia duka-a kɔ-wa.#Es 23.1-18; Ez 26.1—28.26; Jɔɛl 4.4-8; Amɔs 1.9-10; Zak 9.2-4 14Nɛ̀ mbetɛ, wese kita, kita tɛ ŋgai zu'nɛ́ gan ko o bíí Tir in Sidɔŋ. 15K’ɛ́nɛ́, o bíí Kafarnaum, ɛ́nɛ́ tá k’ɛ́nɛ́‘e, ɛ́nɛ́ tɛ kusi hɔ yiwese mɛ nde? Ɛ́nɛ́ tɛ zir zir hɔ fara ko o fio mɛ.#Es 14.13-15

16«Wi nɛ̀ zii wen nú‘nɛ́, zii nɛ́ wen nú‘m; ɓɛɛ wi nɛ̀ bɛ̧‘nɛ́, bɛ̧ nɛ́‘m mbɛt, ɓɛɛ wi nɛ̀ bɛ̧‘m, bɛ̧ nɛ́ wen nú wi nɛ̀ toma'm tɛnɛ.»#Mt 10.40; Mk 9.37; Lk 9.48; Jn 13.20

Mɔ nɛ̀ o betom ko Sɔ̧ tɛ kpa desee wen-aa

17Nɛ́ mɔ'ɔ nɛ̀ o ŋgaiwi ɓu-mɔɔrɔ-ɗoŋ-yiitoo-zua-yiitoo nɔ‘i pia ɗoŋ nɛ̀ desee ɓɛɛ tɔ̧: «Gasa Wan, o ɗaŋ-sɔ̧ mbɛt mbo nɛ́ zu h’ɛ́ɛ́ wen zu nin'nɛ́!» 18Ɓɛɛ Jesu tɔ̧ ha̧ wa: «Mi zɔka so Satan nɛ̀ hɔ̧fa̧ tik nù nɛ̀ yiwese hee pi̧i̧-kórò ga. 19Wen hegɔ, mi ha̧a̧ ŋgai h’ɛ́nɛ́ mɛ i̧si̧ o gɔ́k in o tore, in h’ɛ́nɛ́ mɛ gan zu ŋgayamɔ ko wisɛn lɛŋ mbɛt, ɓɛɛ ŋma mɔ beka de ɗaŋmɔ in'nɛ̀ɛ̀ na.#Gima 91.13 20Ɓɛɛ ká tortɛ ba'nɛ́ wen nɛ̀ o ɗaŋ-sɔ̧ mbo nɛ́ zu h’ɛ́nɛ́ na, ɓɛɛ tortɛ a̧ bá‘nɛ́ wen nɛ̀ nin'nɛ́ yɔra yiwese mɛ kaɗi.»

Dáà in Bem

(Zɔk Mt 11.25-27; 13.16-17)

21Ŋgimbi'i, Sa̧a̧ Ɔmi dee ha̧ tortɛ mɛ de Jesu, ɓɛɛ Jesu tɔ̧: «Mi gasi'nɛ́, Dáà, Gasa Wan nɛ̀ ɔ wan zu yiwese in nù wen n’ɛnɛ hu̧sa̧ mɔ‘i nɛ̀ o wi-iŋ-mgbara-mɔ in o wi-iŋ-mɔ, ɓɛɛ ɛ́nɛ́ usi ha̧ o geɗek wi. Íì Dáà, mɔ n’ɛnɛ taa so mɛ de zaŋ demɔ k’ɛ́nɛ́ nɛ́ mɔ nɛ̀ dea'i.

22«Dáà kɔ‘m ee mɔ lɛŋ er-am, ɓɛɛ ŋma bíí iŋ Bem na, kànà nɛ́ Dáà a̧ iŋa a̧ ɓɛɛ; ŋma bíí iŋ Dáà na mbɛt, kànà nɛ́ Bem a̧ iŋa a̧, in wi nɛ̀ Bem kɔ̧ɔ̧ mɛ usi Dáà ha̧ a̧.»#Jn 3.35; 10.15

23Hɔ-ɗoŋ-aa, a̧ zika tɛ a̧ sitɛ o ŋgaiwi kɔ̧-a̧, ɓɛɛ a̧ tɔ̧ ha̧ wa: «O bíí nɛ̀ zɔk mɔ n’ɛnɛ zɔk’ɛ ya kɔ‘i nɛ̀ desee! 24Mi tɔ̧ h’ɛ́nɛ́: o wi-tɔ̧-wen oi nú Sɔ̧ in o wannu nɛ̀ dɔka-a kɔ̧ɔ̧ so mɛ zɔk mɔ n’ɛnɛ zɔk’ɛ, ɓɛɛ wa zɔk na; wa kɔ̧ɔ̧ so mɛ zii mɔ n’ɛnɛ zii’ɛ, ɓɛɛ wa zii na mbɛt.»

Lizaŋ ko wi-de-demɔ Samarii

25Nɛ́ mɔ'ɔ nɛ̀ ŋma wi-usi-heembea kura ŋgɔn, ɓɛɛ ba wen zaŋ Jesu ak nɛ̀ a̧ hee mɔ'ɔ ga: «Wan-usi-mɔ, mɔ n'am tɛ de sɛka'm kpaa duka-kpasa kpoo nɛ kpoo nɛ̀ mɔɔ-oi nɛ́ ge?»#Mt 22.35-40; Mk 12.28-34 26Ɓɛɛ Jesu kifi nú ha̧ a̧: «Mɔ nɛ̀ wa yɔra zaŋ heembea nɛ́ ge? Mɛ́ tɔra bɔɔ kɔ-mɛ hèè ge?» 27Wi’ɛi kifa nú: «Mɛ̀ kɔ̧́ Gasa Wan Sɔ̧ kɔ-mɛ nɛ̀ see-mɛ lɛŋ, nɛ̀ sɔ̧-tɛ-mɛ lɛŋ, nɛ̀ ŋgai tɛ-mɛ lɛŋ, nɛ̀ taamɔ kɔ-mɛ lɛŋ; ɓɛɛ mɛ̀ kɔ̧́ ŋmà-mɛ hee kiitɛ-mɛ ga.»#Lev 19.18; Wee-ɗoŋ-he 6.5 28Ɓɛɛ Jesu tɔ̧: «Mɛ kifa nú nɛ̀ de-a, mɛ̀ dé hegɔ, ɓɛɛ mɛ tɛ duk kpasa.»#Lev 18.5

29Hee mɔ'ɔ n'aa kɔ̧ɔ̧ mɛ usi'e mɔ nɛ‘i ak'i duk nɛ̀ yuwar-a ga, a̧ tɔ̧a̧: «Ŋma'm nɛ́ o?» 30Ɓɛɛ Jesu tɔ̧: «Ŋma bíí zira so nɛ̀ Jerusalɛm si Jeriko, ɓɛɛ tik er o kpɔ̧i̧-gba̧a̧-nin. Ɗoŋ nɛ̀ wa kaia mɔ er-a, gusi a̧ kaɗi, wa ee a̧ duk tɔ̀kɔ̀rɔ̀ hee fio ga, ɓɛɛ wa yak kɔ-wa. 31Ŋma wan-ɗafi-sɔ̧ zira so nɛ̀ yuwar'i, nɛ́ mɔ'ɔ n'aa zɔka wi’ɛi, ɓɛɛ mbaŋ nɛ̀ katɛ a̧ yak. 32Ŋma be zuduk ko Levii mbɛt hɔɔ hi̧i̧ zɔ́k a̧, ɓɛɛ mbaŋ nɛ̀ katɛ a̧ yak mbɛt. 33Nɛ́ mɔ'ɔ nɛ̀ ŋma be Samarii nɛ̀ nɛ́ kɔ‘i nɛ́ gɛnɛ hɔɔ katɛ wi’ɛi. A̧ zɔka wi’ɛi ɓɛɛ ko de a̧.#2 Kal Ny 28.15 34A̧ nɛɛ si katɛ a̧, hɛr da̧i̧ kɔ̧-a̧, a̧ nɔ̧́ in dɔ̧ɔ̧ sɛnɛ, ɓɛɛ hɔ-ɗoŋ-aa, ba a̧ e zu tuifuu kɔ‘i, ɓɛɛ mgbɔ a̧ nɛnɛ si kɔ̧́ tua-zir-gɛnɛ, ɓɛɛ zɔk a̧ nɛ̀ de-a. 35Mɛ bin, a̧ kaia kɔya sede yiitoo ha̧ ha̧ wi-pɛm tua-zir-gɛnɛ, ɓɛɛ tɔ̧ ha̧ a̧: ‹Mɛ̀ zɔ́k a̧ nɛ̀ de-a; mɔ nɛ̀ mɛ tɛ ɗaŋ gan zu mɔ n'am ha̧a̧ ha̧ mɛ'ɛ, nɛ́ mi a̧‘m tɛ yoɓi wese n'am tɛ pii ɗoŋ.› 36Tɛ̀ taamɔ kɔ-mɛ, mgbara o wi nɔ‘i taar'i, nɛ́ o a̧ deemɔ kɔ̧-a̧ usa'e a̧ nɛ́ ŋmà-wi ko wi nɛ̀ tika kɔ̧̀ er o kpɔ̧i̧-gba̧a̧-nin'i o?» 37A̧ kifa nú-a: «Nɛ́ wi nɛ dee ko ha̧ a̧‘i!» Ɓɛɛ Jesu tɔ̧ ha̧ a̧: «Mɛ mbɛt, mɛ̀ nɛ́, ɓɛɛ mɛ̀ dé hegɔ.»

Marthe in Marii

38Jesu in o ŋgaiwi kɔ‘i a̧a̧ yuwar, ɓɛɛ Jesu ye ŋma ye, nɛ́ mɔ'ɔ nɛ̀ ŋma okoo, nin-a nɛ́ Marthe, mgbɔɔ Jesu si tɛ̀ kɔ‘i.#Jn 11.1 39Marthe a̧a̧ nɛ̀ nya-wi, nin-a nɛ́ Marii, ɓɛɛ Marii duk nù ká̧ naŋ Gasa Wan zii nɛ̀ wen kɔ̧-a̧. 40Marthe sakala tɛ dee tom kɔ̧́ tua nɛ̀ dɔka-a nyɛmna. Nɛ́ mɔ'ɔ n'aa nɛa, ɓɛɛ tɔ̧: «Gasa Wan, ea'm nɛ̀ nya'm e de nɛ̀ tom ɛ̀n'am'i de ŋma mɔ tɛ‘nɛ́ na nde? Ɛ̀nɛ̀ tɔ̧́ ha̧ a̧ gbák ám.» 41Gasa Wan kifa nú ha̧ a̧: «Marthe, Marthe, mɛ́ ta mɔ sakali nɛnɛ zu mɔ nɛtɛ nɛtɛ wen ge? 42Mɔ kpɔk nyɛma, ɓɛɛ nɛ́ Marii a̧ hoka demɔ nɛ̀‘i beka ba er-a yinɛ na.»

Currently Selected:

LUK 10: GB11DC

Highlight

Copy