LUK 3

Usamɔ ko Jean Zui-bíí

(Zɔk Mt 3.1-12; Mk 1.1-8; Jn 1.19-28)

1Wannu Tibɛr Sezar ɔɔ wan tɛ pɛ ɓu-zua-mɔɔrɔ kaɗi, ɓɛɛ tɛ́ kale ŋgimbi'i nɛ́ Pɔns Pilat a̧ duk nɛ́ wannu Judee. Herod duk kɔ‘i nɛ́ wannu Galilee, in Filip nya kɔ̧-a̧ duk kɔ‘i nɛ́ wannu Ituree in Trakonitid. Ŋgimbi'i mbɛt, Lisanias duka nɛ́ wannu sɛn Abilɛn. 2Ɓɛɛ ŋgimbi'i Anna in Kaif yaa so nɛ́ gasa wan-ɗafi-sɔ̧, ɓɛɛ Sɔ̧ tɔ̧ wen ha̧ Jean, bem ko Zakarii ŋga-gbárà mɛ. 3Jean yara dam zika-nú Jurdɛn lɛŋ, tɔ̧ nɛnɛ‘e o bíí a̧ kpáí duka-a kɔ-wa, ɓɛɛ wa a̧ kpɛ́k zuia wa ha̧ Sɔ̧ mɛ e ɗaŋmɔ ha̧ wa, 4hee mɔ'ɔ nɛ̀ yɔra zaŋ kalata ko Esaii wi-tɔ̧-wen oi nú Sɔ̧ ga:

«Ŋma bíí hiɗi nɛ́ mɔ ŋga-gbárà mɛ‘e:

‹Ɛ̀nɛ̀ ɗáfí yuwar ko Gasa Wan,

ɛ̀nɛ̀ ɗáfí yuwar kɔ̧-a̧ nɛ̀ tana-a!#Es 40.3-5

5Gboŋgo lɛŋ tɛ kpe,

kusa kaya in zu-tɔ̧́ lɛŋ tɛ hir;

o gɔɔ war tɛ tan,

o ɗaŋ war tɛ yɔk.

6Ɓɛɛ o bíí lɛŋ tɛ zɔk yuwar-kpasa-bíí ko Sɔ̧.› »

Dee ŋmaa in o bíí in gɔna-kita

7Jean tɔ̧ɔ̧ ha̧ giiwi nɛ̀ tɛɛ ha̧ a̧ mɛ zui wa'e: «Ɛ́nɛ́, o kpar be-kóró, nɛ́ o a̧ usa ɗoŋ yuu nyimsea nɛ̀ tɛ‘i h’ɛ́nɛ́ o?#Mt 12.34; 23.33 8Ɛ̀nɛ̀ dé tom nɛ̀ usi'e ɛ́nɛ́ kpaia duka-a k’ɛ́nɛ́, ɓɛɛ k’ɛ́nɛ́ tɔ̧‘e: ‹Dáà k’ɛɛ nɛ́ Abraham› na; wen mi tɔ̧ɔ̧ h’ɛ́nɛ́‘e, Sɔ̧ nyɛma mɛ kifi o ta nɔ'ɔ nɛ̀ o bem ha̧ Abraham.#Jn 8.33 9Kinii, kpi̧i̧ a̧a̧ gun te; te lɛŋ nɛ̀ wai de waya-a na, wa tɛ gɔm pi̧ tɛ wee.»#Mt 7.19

10Giiwi aka Jean: «Ɓɛɛ mɔ n’ɛɛ tɛ de nɛ́ ge mɔ ge?» 11Ɓɛɛ a̧ kifi nú ha̧ wa: «Wi nɛ̀ a̧a̧ nɛ̀ laa yiitoo a̧ há̧ kpɔk ha̧ wi nɛ̀ bó nɛnɛ na. Wi nɛ̀ a̧a̧ nɛ̀ nyɔŋmɔ a̧ dé kale kpɔk mɔ‘i.» 12Nɛ́ mɔ'ɔ nɛ̀ o wi-ba-garama mbɛt tɛɛ tɛ a̧ ha̧ a̧ mɛ zui wa, ɓɛɛ wa ak a̧: «Wan-usi-mɔ, mɔ n’ɛɛ tɛ de nɛ́ ge mɔ ge?»#Lk 7.29 13A̧ kifa nú ha̧ wa: «K’ɛ́nɛ́ ba mɔ er bíí gan mɔ nɛ̀‘i gɔna h’ɛ́nɛ́ na.» 14O wi-biro mbɛt aka a̧: «K’ɛ́ɛ́, mɔ n’ɛɛ tɛ de nɛ́ ge?» A̧ kifa nú ha̧ wa: «K’ɛ́nɛ́ de mɔ nɛ̀ ŋgai in bíí na; k’ɛ́nɛ́ ɓir wen e nú bíí na; ɛ̀nɛ̀ é nɛ́ see'nɛ́ tɛ sede-tom k’ɛ́nɛ́ ɓɛɛ.»

Wi nɛ tɛ́ tɛ̀

15O bíí yaa pɛm nɛ̀ mɔ, ɓɛɛ kóó o ndé ta nɛ́ mɔ kɔ̧́ see zu mɔ ko Jean'e ndé: mɔ'ɔ wi’ɛ bo nɛ́ Mɛsii na nde? 16Ɓɛɛ Jean tɔ̧ ha̧ wa lɛŋ: «Kɔ‘m, mi zui nɛ́ ɛ́nɛ́ nɛ̀ yì, ɓɛɛ ŋma bíí nɛ̀ gana'm nɛ̀ ŋgai a̧ tɛ‘i, mi nyɛm mɛ bur nyak ndárà kɔ̧-a̧ na; kɔ̧-a̧, a̧ tɛ zui'nɛ́ nɛ̀ Sa̧a̧ Ɔmi in wee. 17A̧ a̧a̧ nɛ̀ mɔɔ-pɛfi-mɔ kɔ̧̀ er-a, wen pɛfa-a nɛ̀ fara-gusi-alkamaari, ha̧ a̧ mɛ mɔi̧ nɛ́ gba̧a̧-a̧ a kɔ̧́ dam kɔ̧-a̧, ɓɛɛ a̧ dɔɔ pumyulu-a tɛ wee nɛ̀ bi na ɓɔnsɛnɛ.»

Sɔŋkur tom ko Jean Zui-bíí

18Jean tɔ̧ɔ̧ o ŋma mbɔrɔ nɛ̀ dɔka-a mbɛt ha̧ wa, tɔ̧ nɛ̀ De Mbe Wen ha̧ wa. 19Jean tɔ̧ɔ̧ wen nɛ̀ ŋgaya-a zu Herod wen Herodiad, kóò ko nya Herod in wen dɔka ɗaŋmɔ n'aa duka so de.#Mt 14.3-4; Mk 6.17-18 20Herod dee mbe ɗaŋmɔ e zu o kuti-a nɔ‘i wen n'aa baa Jean pi̧ zɔɓɔ.

Zuia Jesu

(Zɔk Mt 3.13-17; Mk 1.9-11)

21Ɗoŋ nɛ̀ Jean zuia bíí lɛŋ kaɗi, a̧ zuia Jesu mbɛt, ɓɛɛ ŋgimbi nɛ̀ Jesu ɓɔna fara kɔfa Sɔ̧, yiwese hu̧i̧a̧, 22ɓɛɛ Sa̧a̧ Ɔmi nɛ̀ tɛ-a duk hee gbaku̧i ga zir pii zu Jesu. Ɓɛɛ ŋma tiger tɔ̧ wen nɛ̀ yiwese mɛ tɛnɛ‘e:

«Mɛ́ nɛ́ Bem kɔ‘m n'am kɔ̧ɔ̧ nyɛmna;

see-am lɛŋ a̧a̧ zu mɛ.»#3.22 ó ŋma texte tɔ̧a: mɛ́ nɛ́ Bem kɔ́‘m, mí a̧‘m kòó mɛ́ sɔ́sɔ́ɔ̀.#Ku̧u̧ 22.2; Gima 2.7; Es 42.1; Mt 3.17; Mk 1.11; Lk 9.35

Tugun pɛ́r-nàm ko Jesu

(Zɔk Mt 1.1-17)

23Ŋgimbi nɛ̀ Jesu ku̧u̧ nɛ̀ naŋ dee tom kɔ‘i, a̧ a̧a̧ nɛ̀ pɛ hee ɓu-taar ga, ɓɛɛ o bíí ta kɔ‘i'e ndé, a̧ nɛ́ bem ko Jozɛf, bem ko Heli, 24bem ko Matat, ko Levii, ko Mɛlki, ko Janai, ko Jozɛf, 25bem ko Matatias, ko Amɔs, ko Nahum, ko Hɛsli, ko Nagai, 26bem ko Maat, ko Matatias, ko Semein, ko Jozɛk, ko Joda, 27bem ko Joanam, ko Resa, ko Zorobabɛl, ko Salatiɛl, ko Nɛri 28bem ko Mɛlki, ko Adi, ko Kosam, ko Ɛlmadam, ko Ɛr, 29bem ko Jesu, ko Eliɛzɛr, ko Jorim, ko Matat, ko Levii, 30bem ko Simeɔŋ, ko Juda, ko Jozɛf, ko Jonam, ko Eliakim, 31bem ko Mɛlea, ko Mɛna, ko Matata, ko Nataŋ, ko David, 32bem ko Jɛse, ko Jobɛd, ko Boaz, ko Sala, ko Nasɔŋ, 33bem ko Aminadab, ko Admin, ko Arni, ko Ɛsrɔm, ko Farɛs, ko Juda, 34bem ko Jakob, ko Izak, ko Abraham, ko Tara, ko Nakɔr, 35bem ko Seruk, ko Ragau, ko Falɛk, ko Ebɛr, ko Sala, 36bem ko Kainam, ko Arfaksad, ko Sɛm, ko Nɔe, ko Lamɛk, 37bem ko Matusala, ko Enɔk, ko Iarɛt, ko Maleleɛl, ko Kainam, 38bem ko Enɔs, ko Sɛt, ko Adam, bem ko Sɔ̧.

Currently Selected:

LUK 3: GB11DC

Highlight

Copy