MARK 11

Jesu yee Jerusalɛm hee wannu ga

(Zɔk Mt 21.1-11; Lk 19.28-40; Jn 12.12-19)

1Wa hɛɗa nɛ̀ Jerusalɛm, ká̧ Bɛtfage in Betanii, si ká̧ Kaya Te-nɔ̧́ mɛ kaɗi, ɓɛɛ Jesu tom o ŋma ŋgaiwi kɔ‘i yiitoo, 2ɓɛɛ tɔ̧ ha̧ wa: «Ɛ̀nɛ̀ nɛ́ tɛ be ye ti'nɛ́‘i. Hɔa-a k’ɛ́nɛ́ hegɔ, ɓɛɛ ɛ́nɛ́ tɛ kpa ŋma be tuifuu nɛ̀ wa kuna, nɛ̀ bíí tɛ daŋ zu a̧ nɛti na. Ɛ̀nɛ̀ búr a̧, ɓɛɛ ɛ̀nɛ̀ mgbɔ́ a̧ tɛnɛ ha̧‘m. 3Kà ŋma bíí nɛ́ aka'nɛ́‘e: ‹Ɛ́nɛ́ bur a̧ si déè?› Ɓɛɛ ɛ̀nɛ̀ kífí nú ha̧ a̧‘e: ‹Nɛ́ Gasa Wan a̧ kɔ̧ɔ̧ a̧, a̧ tɛ tom a̧ piinɛ ɗoŋ hɛ̧ɛ̧ kinii nɛ̀ haya-a.› » 4Nɛ́ mɔ'ɔ nɛ̀ wa yaka, ɓɛɛ wa nɛ́ɛ̀ kpa ŋma be tuifuu nɛ̀ bíí kuna zan ká̧ nú tua, nú war saaye, ɓɛɛ wa bur a̧. 5Ɓɛɛ o ŋma bíí nɛ̀ yaa so hi̧i̧ ak wa: «Nɛ́ ge'e de h’ɛ́nɛ́ mɛ bur be tuifuu ge?» 6Nɛ́ mɔ'ɔ nɛ̀ o ŋgaiwi ko Jesu kifa nú hee mɔ'ɔ nɛ̀ Jesu bàá tɔ̧ ha̧ wa ga, ɓɛɛ o wi nɔ‘i e ha̧ wa mɛ bur be tuifuu'i. 7Nɛ́ mɔ'ɔ nɛ̀ wa mgbɔɔ be tuifuu'i nɛnɛ ha̧ Jesu, wa tata laa kɔ-wa gɔn see-aa, ɓɛɛ Jesu daŋ duk sɛnɛ. 8O bíí nɛ̀ dɔka-a tata laa kɔ-wa yuwar, ɓɛɛ o ŋma gbin kɔ‘i nɛ́ wa̧a̧ nɛ̀ zaŋbɛɛ tɛ́ɛ̀ a yuwar. 9O wi-ya-ti Jesu in o wi-ya-ɗoŋ-aa gaia mɔ:

«Oee! Toka-de-yoŋgo a̧ dúk zu wi nɛ̀ tɛ‘i nɛ̀ nin Gasa Wan!#Gima 118.25-26

10 Toka-de-yoŋgo a̧ dúk zu mɔɔ-wan nɛ̀ tɛ‘i,

wan ko dáà k’ɛɛ David!

Osoko ha̧ Sɔ̧ yiwese ŋgɔn mɛ!»

11Jesu hɔɔ Jerusalɛm, ɓɛɛ ye kɔ̧́ Tua ko Sɔ̧. Ɗoŋ n'aa kɛ̧i̧a̧ mɔ zik katɛ a̧ kpa lɛŋ, a̧ gboo yak si Betanii in o ŋgaiwi kɔ̧-a̧ ɓu-zua-yiitoo, wen mɔ ga̧a̧ so kaɗi.

Te-mbɔra nɛ̀ wai na

(Zɔk Mt 21.18-19)

12Nɛ́ mɔ sa̧a̧ kaɗi, ŋgimbi nɛ̀ wa gboo nɛnɛ nɛ̀ Betanii, wɔ gbɛɛ Jesu. 13Nɛ́ mɔ'ɔ n'aa zɔka ŋma te-mbɔra nɛ̀ oi wa̧a̧-a̧ nɛ̀ nyɛi̧a-a, ɓɛɛ a̧ nɛ́ si ká̧ a̧, gbak na, a̧ kpaa ŋma waya-a. Ŋgimbi n'aa ɗɔŋa siti, a̧ kpaa nɛ́ géé wa̧a̧-a̧ sɔɔ géè, wen ŋgimbi'i bo so nɛ́ ŋgimbi waya-a ko mbɔra na. 14Ɓɛɛ Jesu tɔ̧ ha̧ te-mbɔra'i: «Ká ŋma bíí nyɔŋ waya-mɛ ɓɔna ndó-ndó-ndó!»

Ɓɛɛ o ŋgaiwi kɔ̧-a̧ zii wen'i.

Jesu ndaka o wi-ɗɔr-mɔ kɔ̧́ Tua ko Sɔ̧ gbonɛ

(Zɔk Mt 21.12-17; Lk 19.45-48; Jn 2.13-22)

15Nɛ́ mɔ'ɔ nɛ̀ wa hɔɔ Jerusalɛm. Jesu yee kɔ̧́ Tua ko Sɔ̧, ɓɛɛ ndak o wi nɛ yaa hi̧i̧ ɗɔr nɛ̀ mɔ, hi̧fi nɛ̀ mɔ, gbonɛ. Ɓɛɛ a̧ ndur o taŋe ko o wi-kpai-sede in o gboŋgoe ko o wi-ɗɔr-pola a nù; 16a̧ e ha̧ ŋma bíí mɛ tui mɔ, kóó nɛ́ ge ndé, ɓir nɛnɛ nɛ̀ kɔ̧́ Tua ko Sɔ̧ na. 17Ɓɛɛ a̧ usi mɔ, tɔ̧ nɛnɛ ha̧ wa'e: «Bó nɛ́ Yɔramɔ tɔ̧a̧‘e: ‹O bíí tɛ sa Tua kɔ‘m nɛ́ tua-kɔfi-sɔ̧ ko o dukbíí lɛŋ,› na nde? K’ɛ́nɛ́ nɛ́ mɔ'ɔ n’ɛnɛ zika tua'i e nɛ̀ di̧i̧ ko o kpɔ̧i̧-gba̧a̧-nin!»#Es 56.7; Jer 7.11

18O gasa wan-ɗafi-sɔ̧ in o wi-usi-heembea zia nyɛrɛ mɔ‘i, ɓɛɛ wa kii yuwar nɛ̀ wa tɛ de mɛ gbɛ nɛ̀ Jesu, ɓɛɛ wa de nɛ kíí a̧ wen ɗɛɗɛ giiwi gɔna tɛ usamɔ kɔ̧-a̧.

19Mɛ́ ga̧a̧mɔ, ɓɛɛ Jesu in o ŋgaiwi kɔ‘i gbo saaye'i yak.

Te-mbɔra kora

(Zɔk Mt 21.20-22)

20Tɛ̀ ɓira-a kɔ-wa yak mɛ tutuyɛ, wa zɔka te-mbɔra'i nɛ̀ kora hɔ tɛ gun-aa mɛ lɛŋ. 21Tɛ̀ Pierre mbaŋa ɗoŋ mɔ nɛ̀ Jesu tɔ̧ɔ̧ so, ɓɛɛ tɔ̧ ha̧ a̧: «Wan-usi-mɔ, ɛ̀nɛ̀ zɔ́k te-mbɔra n’ɛnɛ baa fom so’ɛ, nɛ́ mɔ'ɔ nɛ̀ kora lɛŋ'ɛ.» 22Jesu kifa nú ha̧ wa, ɓɛɛ tɔ̧: «Ɛ̀nɛ̀ kɔ̧́ ɗɔaa ha̧ Sɔ̧. 23Nɛ́ kpasawen a̧‘m tɔ̧ h’ɛ́nɛ́; kà ŋma bíí tɔ̧ ha̧ kaya’ɛ: ‹Mɛ̀ kúr, mɛ̀ gbín a ɗɔɔ gba-tɔp,› kà wi’ɛi nɛ́ sii kafɛ nɛ̀ kɔ̧́ see na, ɓɛɛ kà a̧ ta'e mɔ‘i tɛ de wó, mɔ‘i tɛ de kànà ha̧ a̧ nɛ̀ mbetɛ.#Mt 17.20; 1 Kɔr 13.2 24Nɛ́ wen mɔ‘i, s'am tɔ̧ h’ɛ́nɛ́‘e ndé, mɔ lɛŋ n’ɛnɛ ak tɛ̀ kɔfa-sɔ̧, ɛ̀nɛ̀ tá‘e wi kpaa mɔ‘i kaɗi, ɓɛɛ ɛ́nɛ́ tɛ kpa mɔ‘i. 25Ɓɛɛ ŋgimbi n’ɛ̀nɛ̀ yor ŋgɔn kɔfi nɛ̀ Sɔ̧, k’ɛ̀nɛ̀ nɛ́ bòó nɛ̀ ŋma wen mgbara'nɛ́ in ŋma bíí, ɛ̀nɛ̀ é ɗaŋmɔ ha̧ wi’ɛi, wen ha̧ Dáà k’ɛ́nɛ́ nɛ̀ a̧a̧ yiwese mɛ e ɗaŋmɔ k’ɛ́nɛ́ h’ɛ́nɛ́ mbɛt. [#Mt 6.14-15 26Ɓɛɛ k’ɛ̀nɛ̀ é ɗaŋmɔ ha̧ ŋma bíí na, Dáà k’ɛ́nɛ́ nɛ̀ a̧a̧ yiwese beka e ɗaŋmɔ k’ɛ́nɛ́ h’ɛ́nɛ́ na mbɛt.]»

Ŋgai ko Jesu

(Zɔk Mt 21.23-27; Lk 20.1-8)

27Wa pia ɗoŋ Jerusalɛm woyo, ɓɛɛ hee mɔ'ɔ nɛ̀ Jesu duk yar nɛnɛ nɛ̀ kɔ̧́ Tua ko Sɔ̧ ga, o gasa wan-ɗafi-sɔ̧, o wi-usi-heembea in o kuti-wi tɛ̀ɛ̀ tɛ a̧, 28ɓɛɛ ak a̧: «Mɔ nɛ̀ mɛ de’ɛ, mɛ de tɛ ŋgai ko o? Nɛ́ o'o ha̧ ŋgai'i ha̧ mɛ o?» 29Ɓɛɛ Jesu kifi nú ha̧ wa: «Mi a̧a̧ nɛ̀ ŋma akamɔ mɛ ak nɛ̀ ɛ́nɛ́ mbɛt. Ɛ̀nɛ̀ kífí nú ha̧‘m, sɛka'm tɔ̧ɔ̧ ndaa ŋgai n'am de nɛ̀ mɔ'ɔ h’ɛ́nɛ́. 30Zuia-bíí nɛ̀ Jean duka so zui nɛnɛ'ɛ, tɛ̀ɛ́ nɛ̀ tɛ́ Sɔ̧ náà, kóó tɛ̀ɛ́ nɛ̀ tɛ̀ bíí nde? Ɛ̀nɛ̀ kífí nú ha̧‘m!» 31Ɓɛɛ wa kii mɔ tɔ̧ nɛ̀ wen in o ŋmaa: «K’ɛ̀ɛ̀ tɔ̧‘e ndé, zuia-bíí nɛ̀ Jean zuia so'i, tɛ̀ɛ́ nɛ̀ tɛ́ Sɔ̧ wó, ɓɛɛ a̧ tɛ ak ɛɛ‘e ndé, wen ge s’ɛɛ kɔ̧ ɗɔɔ wen ko Jean na ge?» 32A̧ k’ɛɛ tɔ̧‘e, tɛ̀ɛ́ nɛ̀ tɛ̀ bíí wó, o bíí tɛ de wen in yɛ̀ɛ́. Kíì giiwi de so nɛ́ wa, wen taamɔ ko bíí lɛŋ‘e Jean nɛ́ wi-tɔ̧-wen oi nú Sɔ̧ nɛ̀ mbetɛ. 33Ɓɛɛ wa kifi nú ha̧ Jesu: «Ɛ́ɛ́ iŋ k’ɛ́ɛ́ na.» Ɓɛɛ Jesu tɔ̧ ha̧ wa: «Mi mbɛt, mi beka tɔ̧ ndaa ŋgai n'am de nɛ̀ mɔ‘i h’ɛ́nɛ́ na.»

Currently Selected:

MARK 11: GB11DC

Highlight

Copy